12-Feb-2021

ରାୟପୁର (ପ୍ରେରଣା ଖବର ବ୍ୟୁରୋ): ପ୍ରେମ ସାସ୍ବତ-ସୁନ୍ଦର-ଚିରନ୍ତନ । କିନ୍ତୁ ବେଳେବେଳେ ପ୍ରେମ ଏକତରଫା ମଧ୍ୟ ହୋଇଥାଏ । ଅନେକ ସମୟରେ ଏହାର ପରିଣତି ମଧ୍ୟ ଭୟଙ୍କର ହୋଇଥାଏ । ସେହିଭଳି ଏକ ଘଟଣା ଘଟିଛି ଛତିଶଗଡର ମହାସମୁନ୍ଦରେ । ଏକ ତରଫ ପ୍ରେମରୁ ଯୁବତୀଙ୍କୁ ଅତି ବିଭତ୍ସଭାବେ ହତ୍ୟା କରିଛି ଯୁବକ ।

ସୂଚନା ଅନୁସାରେ, ମହାସମୁନ୍ଦ ଜିଲ୍ଲା ବେଲାସୋଣ୍ଡା ଅଞ୍ଚଳରେ ଏହି ଘଟଣା ଘଟିଛି । ଯୁବତୀଜଣକ ତାଙ୍କ ଭଉଣୀଙ୍କ ସହିତ ମେଡିସିନ୍‌ ଦୋକାନକୁ ଯାଇଥିଲେ । ଔଷଧ ନେଇ ଘରକୁ ଫେରୁଥିବା ବେଳେ, ଏକତରଫା ପ୍ରେମ କରୁଥିବା ଯୁବକ ଚନ୍ଦ୍ରଶେଖର ଏବଂ ତାର ୨ଜଣ ସାଙ୍ଗ ସେମାନଙ୍କ ନିକଟରେ ପହଞ୍ଚିଥିଲେ । ଭାଲେଣ୍ଟାଇନ୍‌ ସପ୍ତାହ ର ପ୍ରୋମିସ୍‌ ଡେ’ ଯୁବକଜଣକ ଉକ୍ତ ଯୁବତୀଙ୍କୁ ଜବରଦସ୍ତ ଧରିପକାଇଥିଲେ । ଉଭୟ କିଛି ସମୟ ପାଇଁ କଥା ମଧ୍ୟ ହୋଇଥିଲେ । କିଛି ସମୟ କଥା ବାର୍ତ୍ତା ମଧ୍ୟରେ ଯୁବକଜଣକ ବନ୍ଧୁକ ବାହାର କରି ଯୁବତୀଙ୍କୁ ଗୁଳି କରିଥିଲା । ଘଟଣାସ୍ଥଳରେ ହିଁ ଯୁବତୀଙ୍କର ମୃତ୍ୟୁ ଘଟିଥିଲା ।

ଏହା ପରେ ଅଭିଯୁକ୍ତ ଏବଂ ତାର ଦୁଇଜଣ ସାଙ୍ଗ ଘଟଣାସ୍ଥଳରୁ ଫେରାର ହୋଇଯାଇଥିଲେ । ଦିନ ଦ୍ବିପ୍ରହରରେ ଏହି ହତ୍ୟାକାଣ୍ଡ ଘଟିବା ପରେ ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳିଯାଇଛି । ଘଟଣାସ୍ଥଳରେ କୋତବାଲୀ ପୋଲିସ ପହଞ୍ଚି ଯାଞ୍ଚ ଜାରି ରଖିଛି । ମୁଖ୍ୟ ଅଭିଯୁକ୍ତ ଚନ୍ଦ୍ରଶେଖର ପୋଲିସ ନିକଟରେ ଆତ୍ମସମର୍ପଣ କରିଛି । ତାର ଦୁଇ ଜଣ ସାଙ୍ଗଙ୍କୁ ଧରିବା ପାଇଁ ପୋଲିସ ଚଢଉ ଜାରି ରଖିଛି ।

ଘଟଣା ସମ୍ପର୍କରେ ପୋଲିସ କହିଛି ଯେ, ଯୁବକ ଏବଂ ଯୁବତୀ ଉଭୟ ପରସ୍ପରକୁ ପୂର୍ବରୁ ଜାଣିଥିଲେ । ତେବେ ଯୁବତୀଜଣକ ଅଭିଯୁକ୍ତ ଯୁବକ ସହିତ କଥା ହେବାକୁ ମନାକରିଦେଇଥିଲେ । ଏଥି​‌ରେ କ୍ଷୁବ୍ଧ ହୋଇ ଯୁବତୀଙ୍କୁ ଦେଖା କରିବାକୁ ଆସି ଗୁଳିକରି ହତ୍ୟା କରିଛି । ଘଟଣାରେ ସଂପୃକ୍ତ ଅଭିଯୁକ୍ତର ଦୁଇଜଣ ସହଯୋଗୀଙ୍କୁ ଧରିବା ପାଇଁ ଚଢଉ ଜାରି ରଖିଛି ପୋଲିସ ।