09-Sep-2026

ବରଗଡ(ତୁଳସୀ ଚରଣ ଦାଶ):  ଭାରତରେ ଥିବା ଚାରୋଟି ଧାମ ମଧ୍ୟରୁ ପୂର୍ବରେ ପୁରୀ ଓ ପଶ୍ଚିମରେ ଦ୍ୱାରକା ଧାମ ଅଛି। ପ୍ରତିବର୍ଷ ଲକ୍ଷ ଲକ୍ଷ ଶ୍ରଦ୍ଧାଳୁ ଏହି ଧାମମାନଙ୍କୁ ଯାଇଥାନ୍ତି। ତେଣୁ, ଏହି ଦୁଇଧାମକୁ ରେଳ ଦ୍ଵାରା ଯୋଡିବାକୁ ପୁରୀ ଓ ଓଖା (ଦ୍ୱାରକା) ମଧ୍ୟରେ ଓଡ଼ିଶାର ମଧ୍ୟଭାଗ ଦେଇ ଟ୍ରେନ ଚଳାଇବାକୁ ସମ୍ବଲପୁର ଓ ବରଗଡ଼ ସଚେତନ ନାଗରିକମାନେ ପୂର୍ବତନ କେନ୍ଦ୍ରମନ୍ତ୍ରୀ ତଥା ସମ୍ବଲପୁର ସାଂସଦ ଶ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ଲିଖିତ ଭାବରେ ଜଣାଇଛନ୍ତି।
ବର୍ତ୍ତମାନ, ପୁରୀରୁ ଓଖାକୁ ମାତ୍ର ଗୋଟିଏ ଟ୍ରେନ ଚାଲୁଅଛି। କିନ୍ତୁ, ଏହା ଆନ୍ଧ୍ରପ୍ରଦେଶର ବିଜୟୱାଡା ଦେଇ ପ୍ରାୟ ୨୭୭୭ କିମି ଅତିକ୍ରମ କରି ଯାଉଛି ଏବଂ ଏହି ଟ୍ରେନ ଦ୍ୱାରା ଓଡ଼ିଶାର ମାତ୍ର ତିନୋଟି (ପୁରୀ, ଖୋର୍ଦ୍ଧା ଓ ଗଞ୍ଜାମ) ଜିଲ୍ଲାବାସୀ ଉପକୃତ ହେଉଛନ୍ତି। ତେଣୁ, ପୁରୀରୁ ଓଖାକୁ ଆଉ ଏକ ନୂତନ ଟ୍ରେନ ସମ୍ବଲପୁର ଓ ଟିଟିଲାଗଡ ଦେଇ ଚଳାଇଲେ ଏହା ପ୍ରାୟ ୨୪୯୩ କିମି ଅତିକ୍ରମ କରିବ ଏବଂ ଏହା ଦ୍ୱାରା ୯ ଟି (ପୁରୀ, ଖୋର୍ଦ୍ଧା, କଟକ, ଢେଙ୍କାନାଳ, ଅନୁଗୋଳ, ସମ୍ବଲପୁର, ବରଗଡ଼, ବଲାଙ୍ଗୀର ଓ ନୂଆପଡା) ଜିଲ୍ଲାବାସୀ ଉପକୃତ ହୋଇପାରିବେ। ଏହାଦ୍ୱାରା ଦୂରତା ମଧ୍ୟ ପ୍ରାୟ ୩୦୦ କିମି ଓ ସମୟ ପ୍ରାୟ ୬ ଘଣ୍ଟା ହ୍ରାସ ପାଇବ।
ଗୁଜରାଟର ରାଜକୋଟ, ମୋରବି, ଜାମନଗର ଆଦି ଶିଳ୍ପସମୃଦ୍ଧ ସହରରେ ପଶ୍ଚିମଓଡିଶାରୁ ଅନେକ ଲୋକ ଯାଇ ସେଠାରେ କାମ କରୁଛନ୍ତି। ଏହି ଟ୍ରେନ ଚାଲିଲେ, ସେମାନେ ଆଉ ଟ୍ରେନ ନ ବଦଳାଇ ସିଧା ଗୋଟିଏ ଟ୍ରେନରେ ଯାତାୟାତ କରିପାରିବେ।ତେଣୁ, ଧାର୍ମିକ, ଅର୍ଥନୈତିକ, ପର୍ଯ୍ୟଟନ ତଥା ସାମାଜିକ ଦୃଷ୍ଟିକୋଣରୁ ବିଚାର କରି ଏହି ଦୀର୍ଘଦିନରୁ ରହିଥିବା ରେଳ ଚଳାଇବା ଦାବିକୁ ପୂରଣ କରିବାକୁ ଶ୍ରୀ ପ୍ରଧାନଙ୍କୁ ନିବେଦନ କରାଯାଇଥିଲା। 
         ---------×××---------