18-Oct-2026

ସୁବର୍ଣ୍ଣପୁର (ମନୋରଞ୍ଜନ ତ୍ରିପାଠୀ)ପବିତ୍ର ଦେବଭୂମି ତଥା ଦ୍ୱିତୀୟ ବାରାଣସୀ ଭାବେ ପରିଚିତ ମନ୍ଦିରମାଳିନୀ ନଗରୀ ସୁବର୍ଣ୍ଣପୁରରେ ଶାରଦୀୟ ନବରାତ୍ରୀର ଅଷ୍ଟମ ଦିବସରେ ମା’ ସୁରେଶ୍ୱରୀ, ମା’ ଭଗବତୀ ଓ ମା’ ଦୁର୍ଗାଦେବୀ ମହାଗୌରୀ ବେଶରେ ଭକ୍ତମାନଙ୍କୁ ଦର୍ଶନ ଦେଇଛନ୍ତି। ଦେବୀଙ୍କ ଧବଳକାନ୍ତିମୟୀ ରୂପ ଓ କରୁଣାମୟୀ ମୁଖମଣ୍ଡଳ ଶ୍ରଦ୍ଧାଳୁଙ୍କ ମନରେ ଭକ୍ତି, ଶାନ୍ତି ଓ ଆଧ୍ୟାତ୍ମିକ ଆନନ୍ଦ ଭରିଦେଇଛି।

ନବଦୁର୍ଗାଙ୍କ ଅଷ୍ଟମ ସ୍ୱରୂପ ମା’ ମହାଗୌରୀ ପବିତ୍ରତା, ନିର୍ମଳତା ଓ ଶାନ୍ତିର ପ୍ରତୀକ। ପୌରାଣିକ ବିଶ୍ୱାସ ଅନୁସାରେ, ଦେବୀଙ୍କ ଆରାଧନା ମନର ମଳିନତା ଦୂର କରି ସତ୍ୟ, ଧର୍ମ ଓ ସଦାଚାରର ପଥରେ ଅଗ୍ରସର ହେବାକୁ ପ୍ରେରଣା ଦିଏ।
ମନ୍ଦିର ପରିସରରେ ଧୂପଦୀପ, ଶଙ୍ଖଘଣ୍ଟା ଧ୍ୱନି ଓ ମନ୍ତ୍ରପାଠ ମଧ୍ୟରେ ଭକ୍ତିମୟ ପରିବେଶ ସୃଷ୍ଟି ହୋଇଥିଲା। ଶ୍ରଦ୍ଧାଳୁମାନେ ମା’ଙ୍କ ଦର୍ଶନ କରି ପରିବାରର ସୁଖଶାନ୍ତି, ସମାଜର ମଙ୍ଗଳ ଓ ବିଶ୍ୱକଲ୍ୟାଣ କାମନା କରିଥିଲେ। ପ୍ରେମ, ଦୟା, କ୍ଷମା ଓ ମାନବିକତାକୁ ଜୀବନରେ ଆପଣାଇବା ହିଁ ମହାଗୌରୀଙ୍କ ଆରାଧନାର ମୁଖ୍ୟ ବାର୍ତ୍ତା।