28-Jul-2026

ଭୁବନେଶ୍ୱର(ପ୍ରେରଣା ଖବର)- ଭୁବନେଶ୍ୱର କଳିଙ୍ଗ ଷ୍ଟଡିୟମର ଡାଲମିଆ ଭାରତ ଗୋପିଚାନ୍ଦ ବ୍ୟାଡମିଣ୍ଟନ ଉତ୍କର୍ଷ କେନ୍ଦ୍ର (ସଟଲ) ଠାରେ ଚାଲିଥିବା ୟନେକ୍ସ ସନରାଇଜ ସର୍ବ ଭାରତୀୟ ଜୁନିୟର ବ୍ୟାଡ ମିଣ୍ଟନ ପ୍ରତିଯୋଗିତାର ସମସ୍ତ ଯୋଗ୍ୟତା ପର୍ଯ୍ୟାୟ ଖେଳ ସରିଯାଇଛି । ଆଜି ଠାରୁ ଏହି ପ୍ରତିଯୋଗିତାର ମୁଖ୍ୟ ଡ୍ର ଖେଳ ଆରମ୍ଭ ହୋଇଯିବ । ସିଙ୍ଗଲ୍ସ ବାଳକ, ବାଳିକା ବିଭାଗରେ ୩୨ଜଣ ଲେଖାଏଁ ଖେଳାଳି ଏବଂ ବାଳକ ଡବଲ୍ସ , ବାଳିକା ଡବଲ୍ସ ଏବଂ ମିକ୍ସ ଡବଲ୍ସ ବିଭାଗରେ ଯୋଗ୍ୟତା ପର୍ଯ୍ୟାୟରୁ ୧୬ଟି ଲେଖାଏଁ ଯୋଡି ମୁଖ୍ୟ ଡ୍ର ପ୍ରତିଯୋଗିତାକୁ ଉତ୍ତିର୍ଣ୍ଣ ହୋଇଛନ୍ତି । ମୁଖ୍ୟ ଡ୍ର ରେ ଟାଇଟଲ ପାଇଁ ମୁଖ୍ୟ ଦାବେଦାର ଓଡିଆ ଖେଳାଳି ତନଭି ପତ୍ରି  ତାଙ୍କର ଅଭିଯାନ ଆରମ୍ଭ କରିବେ । ପୂର୍ବରୁ ସିଧାସଳଖ ଏଣ୍ଟ୍ରି ପାଇଥିବା ଏହି ବିଭାଗ ଗୁଡିକରେ ସମାନ ସଂଖ୍ୟକ ଖେଳାଳିଙ୍କ ସହ ଯୋଗ୍ୟତା ପର୍ଯ୍ୟାୟରୁ ଉତ୍ତିର୍ଣ୍ଣ ହୋଇଥିବା ଖେଳାଳିମାନେ ପ୍ରତିଦ୍ୱନ୍ଦିତା ସମ୍ମୁଖିନ ହେବେ । ଯୋଗ୍ୟତା ପର୍ଯ୍ୟାୟ ରୁ ଓଡିଆ ବାଳକ ଯୋଡି ବାପୁନ ରାଉତ ଓ ଜୟକୃଷ୍ଣ ଗର୍ଡିଆ ତାଙ୍କ ପ୍ରତିଦ୍ୱନ୍ଦି ମାଲସାମ ଲୁଆ ଓ ସାଥୀ ଅର୍ଣ୍ଣବ ଶର୍ମାଙ୍କୁ ୧୫-୧୦, ୧୩-୧୫ ଓ ୧୫-୧୩ ରେ ହରାଇ

ମେନ୍ ଡ୍ରକୁ ଉତ୍ତୀର୍ଣ୍ଣ ହୋଇଛନ୍ତି । ଠିକ୍ ସେହିପରି ଓଡିଆ ବାଳିକା ଯୋଡି ସ୍ୱାତୀ ନାଏକ ଓ ନିମିସା ଓଝା ପ୍ରତିପକ୍ଷ ଯୋଡି ନିଧି ଆତ୍ମାରାମ ଓ ସେଲଭା ସମୃଦ୍ଧି ଙ୍କୁ ୯-୧୫, ୧୫-୧୦, ୧୫-୮ ପଏଣ୍ଟରେ ହରାଇ ଯୋଗ୍ୟତା ପର୍ଯ୍ୟାୟରେ ମୁଖ୍ୟ ଡ୍ରରେ ସାମିଲ ହୋଇଛନ୍ତି । ପୂର୍ବରୁ ଯୋଗ୍ୟତା ଭିତ୍ତିରେ ସିଧାସଳଖ ଏଣ୍ଟ୍ରି ପାଇଥିବା ଓଡିଶା ଖେଳାଳିମାନେ ହେଲେ ବାଳକ ସିଙ୍ଗଲ୍ସ ରେ ଦିବ୍ୟମ୍ କେଜ୍ରିୱାଲ ଓ ସୁଭ୍ରକେତନ ମଲ୍ଲିକ, ବାଳିକା ସିଙ୍ଗଲ୍ସ ରେ ତନଭି ପତ୍ରି, ନିମିଶା ଓଝା ଓ ଜେସିକା ସାହୁ, ମିକ୍ସ ଡବଲ୍ସ ରେ ଦିବ୍ୟମ କେଜ୍ରିୱାଲ ସାଥୀ ସ୍ୱୀଟିପ୍ରୀୟା, ବାଳକ ଡବଲ୍ସ ରେ ଦିବ୍ୟମ କେଜ୍ରିୱାଲ ସାଥୀ ସୁଭ୍ରକେତନ ମଲ୍ଲିକ, ବାଳିକା ଡବଲ୍ସ ରେ ଅସ୍ୱିକା ମିଶ୍ର ସାଥୀ ସ୍ୱିଟିପ୍ରୀୟା ପ୍ରଧାନ । ୨୯ ତାରିଖରୁ ମୁଖ୍ୟ ଡ୍ର ଖେଳ ଆରମ୍ଭ ହୋଇ ଆସନ୍ତା ୧ ତାରିଖ ଦିନ ପ୍ରତିଯୋଗିତା ଚୁଡାନ୍ତ ପର୍ଯ୍ୟାୟ ଖେଳ ଶେଷ ହୋଇ ପ୍ରତିଯୋଗିତା ଉଦ୍‌ଯାପିତ ହେବ ବୋଲି ଓସ୍‌ବା ସଂପାଦକ ନିଳିନ କୁମାର ଜଣାଇଛନ୍ତି ।