24-Jul-2026

ବରପାଲି (ସୁଦାମ ଦୀପ )
 ବରଗଡ଼ ଲୋକସଭା ସାଂସଦ ଶ୍ରୀ ପ୍ରଦୀପ ପୁରୋହିତ କେନ୍ଦ୍ର ପ୍ରତିରକ୍ଷା ମନ୍ତ୍ରୀ ଶ୍ରୀ ରାଜନାଥ ସିଂହଙ୍କୁ ଭେଟି ବରଗଡ଼ ଜିଲ୍ଲା ଏବଂ ପଶ୍ଚିମ ଓଡ଼ିଶାର ପୂର୍ବତନ ସୈନିକ, ସେମାନଙ୍କ ପରିବାର ଓ ଯୁବପିଢ଼ୀଙ୍କ ସ୍ୱାର୍ଥ ସହ ଜଡିତ ତିନୋଟି ଗୁରୁତ୍ୱପୂର୍ଣ୍ଣ ଦାବି ଉପସ୍ଥାପନ କରିଛନ୍ତି। ଏ ସମ୍ପର୍କରେ ସେ ପ୍ରତିରକ୍ଷା ମନ୍ତ୍ରୀଙ୍କୁ ଏକ ବିସ୍ତୃତ ପତ୍ର ପ୍ରଦାନ କରି ଶୀଘ୍ର ପଦକ୍ଷେପ ନେବାକୁ ଅନୁରୋଧ କରିଛନ୍ତି। ସାଂସଦ ଶ୍ରୀ ପୁରୋହିତ ତାଙ୍କ ପତ୍ରରେ ଉଲ୍ଲେଖ କରିଛନ୍ତି ଯେ ବରଗଡ଼ ଜିଲ୍ଲାରେ ବହୁ ସଂଖ୍ୟକ ପୂର୍ବତନ ସୈନିକ ଓ ସେମାନଙ୍କ ପରିବାର ବସବାସ କରୁଛନ୍ତି। ବରଗଡ଼ ଜିଲ୍ଲା ଭେଟେରାନ୍ସ ଆସୋସିଏସନ (BDVA) ୨୦୧୬ ମସିହାରୁ ୨ ହଜାରରୁ ଅଧିକ ପୂର୍ବତନ ସୈନିକ ଓ ସେମାନଙ୍କ ନିର୍ଭରଶୀଳଙ୍କ କଲ୍ୟାଣ ପାଇଁ କାର୍ଯ୍ୟ କରୁଥିବା ସତ୍ତ୍ୱେ ଆବଶ୍ୟକ କଲ୍ୟାଣକାରୀ ଭିତ୍ତିଭୂମିର ଅଭାବ ଯୋଗୁଁ ସେମାନେ ବିଭିନ୍ନ ସମସ୍ୟାର ସମ୍ମୁଖୀନ ହେଉଛନ୍ତି।ବର୍ତ୍ତମାନ ସମ୍ବଲପୁରରେ ଥିବା ଜିଲ୍ଲା ସୈନିକ କଲ୍ୟାଣ ବୋର୍ଡ ସମ୍ବଲପୁର, ବରଗଡ଼, ବଲାଙ୍ଗୀର, ସୁବର୍ଣ୍ଣପୁର, ସୁନ୍ଦରଗଡ଼, ଦେବଗଡ଼ ଓ ଝାରସୁଗୁଡ଼ା ସହ ସାତୋଟି ଜିଲ୍ଲାକୁ ସେବା ଯୋଗାଇ ଆସୁଛି। ଏହାର ବିଶାଳ କାର୍ଯ୍ୟପରିସର କାରଣରୁ ବରଗଡ଼ ଜିଲ୍ଲାର ପୂର୍ବତନ ସୈନିକମାନଙ୍କୁ ପେନ୍‌ସନ, ଡକ୍ୟୁମେଣ୍ଟେସନ ଓ ଅନ୍ୟାନ୍ୟ କଲ୍ୟାଣକାରୀ ସୁବିଧା ପାଇଁ ଦୀର୍ଘ ଦୂରତା ଯାତ୍ରା କରିବାକୁ ପଡୁଛି। ତେଣୁ ବରଗଡ଼ରେ ଏକ ସ୍ୱତନ୍ତ୍ର ଜିଲ୍ଲା ସୈନିକ କଲ୍ୟାଣ ବୋର୍ଡ  ସ୍ଥାପନ କରିବାକୁ ସେ ଦାବି କରିଛନ୍ତି।ସେହିପରି ସମ୍ବଲପୁରରେ ଥିବା ଏକମାତ୍ର ସିଏସଡି କ୍ୟାଣ୍ଟିନ ଉପରେ ସାତୋଟି ଜିଲ୍ଲାର ପୂର୍ବତନ ସୈନିକ ନିର୍ଭରଶୀଳ ଥିବାରୁ ବୃଦ୍ଧ ସୈନିକମାନଙ୍କୁ ଅନେକ ଘଣ୍ଟା ଯାତ୍ରା ଓ ଅପେକ୍ଷା କରିବାକୁ ପଡୁଛି। ଏହି ଅସୁବିଧା ଦୂର କରିବା ପାଇଁ ବରଗଡ଼ରେ ଏକ ସିଏସଡି ଏକ୍ସଟେନ୍‌ସନ କାଉଣ୍ଟର ଖୋଲିବାକୁ ସାଂସଦ ଅନୁରୋଧ କରିଛନ୍ତି।
ପତ୍ରରେ ସାଂସଦ ଆହୁରି ଉଲ୍ଲେଖ କରିଛନ୍ତି ଯେ ପଶ୍ଚିମ ଓଡ଼ିଶା ଦେଶର ସଶସ୍ତ୍ର ବାହିନୀକୁ ବହୁ ସଂଖ୍ୟାରେ ଯୁବକ ଯୋଗାଇ ଆସୁଥିଲେ ମଧ୍ୟ ଏହି ଅଞ୍ଚଳରେ କୌଣସି ସୈନିକ ସ୍କୁଲ ନାହିଁ। ବରଗଡ଼ ଜିଲ୍ଲାର ପଦ୍ମପୁରଠାରେ ସୈନିକ ସ୍କୁଲ ସ୍ଥାପନ ପାଇଁ ଆବଶ୍ୟକ ସମସ୍ତ ପ୍ରକ୍ରିୟା ପୂରଣ ହୋଇସାରିଛି ଏବଂ ସୈନିକ ସ୍କୁଲ ସୋସାଇଟି ନିକଟରେ ଆବେଦନ ମଧ୍ୟ ପଞ୍ଜୀକୃତ ହୋଇଛି। ଏହି ସ୍କୁଲ ସ୍ଥାପନ ହେଲେ ଅଞ୍ଚଳର ଗ୍ରାମାଞ୍ଚଳ ଯୁବପିଢ଼ୀ ଉନ୍ନତ ଶିକ୍ଷା ସହ ପ୍ରତିରକ୍ଷା କ୍ଷେତ୍ରରେ କ୍ୟାରିୟର ଗଢ଼ିବାର ସୁଯୋଗ ପାଇବେ ଏବଂ ଅଞ୍ଚଳର ସାମାଜିକ-ଆର୍ଥିକ ବିକାଶରେ ସହାୟକ ହେବ।ଶେଷରେ ସାଂସଦ ଶ୍ରୀ ପୁରୋହିତ ପ୍ରତିରକ୍ଷା ମନ୍ତ୍ରୀଙ୍କୁ ବରଗଡ଼ରେ ଜିଲ୍ଲା ସୈନିକ କଲ୍ୟାଣ ବୋର୍ଡ ସ୍ଥାପନ, ସିଏସଡି ଏକ୍ସଟେନ୍‌ସନ କାଉଣ୍ଟର ମଞ୍ଜୁରୀ ଏବଂ ପଦ୍ମପୁର ପ୍ରସ୍ତାବିତ ସୈନିକ ସ୍କୁଲକୁ ଅନୁମୋଦନ ପ୍ରଦାନ କରିବାକୁ ଦୃଢ଼ ଭାବେ ଅନୁରୋଧ କରିଛନ୍ତି। ଏହି ପଦକ୍ଷେପ ପୂର୍ବତନ ସୈନିକ, ସେମାନଙ୍କ ପରିବାର ଏବଂ ପଶ୍ଚିମ ଓଡ଼ିଶାର ଯୁବପିଢ଼ୀଙ୍କ ପାଇଁ ଏକ ଐତିହାସିକ ସଫଳତା ସାବ୍ୟସ୍ତ ହେବ ବୋଲି ସେ ଆଶା ପ୍ରକାଶ କରିଛନ୍ତି। ଉପରୋକ୍ତ ସମସ୍ୟା ସଂକ୍ରାନ୍ତରେ ଗଠନ ମୂଳକ ଆଲୋଚନା ହୋଇଥିବାରୁ ସାଂସଦ ଶ୍ରୀ ପୁରୋହିତ କେନ୍ଦ୍ର ମନ୍ତ୍ରୀଙ୍କୁ କୃତଜ୍ଞତା ଜ୍ଞାପନ କରିଥିଲେ ।