18-Jul-2026

ନର୍ଲା (ସଞ୍ଜିବ ଦାସ )
କଳାହାଣ୍ଡି ଜିଲ୍ଲା ନର୍ଲା ସ୍ଥିତ ଓଡ଼ିଶା ଆଦର୍ଶ ବିଦ୍ୟାଳୟର (OAV) ଦୁଇ ଜଣ କୃତୀ ଛାତ୍ର ସ୍ୱୟଂ ସ୍ୱାଗତ କର ଏବଂ ସୁବ୍ରତ ସାହାଣି ଚଳିତ ବର୍ଷ ବିଭିନ୍ନ ପ୍ରତିଷ୍ଠିତ ସର୍ବଭାରତୀୟ ପ୍ରବେଶିକା ପରୀକ୍ଷାରେ ଉଲ୍ଲେଖନୀୟ ସଫଳତା ହାସଲ କରି ସମଗ୍ର ଅଞ୍ଚଳ ପାଇଁ ଗୌରବ ଆଣିଦେଇଛନ୍ତି।
ବିଦ୍ୟାଳୟର ମେଧାବୀ ଛାତ୍ର ସ୍ୱୟଂ ସ୍ୱାଗତ କର ସର୍ବଭାରତୀୟ ମେଡ଼ିକାଲ ପ୍ରବେଶିକା ପରୀକ୍ଷା (NEET-UG) ରେ *୬୫୫ ନମ୍ବର ରଖି ସର୍ବଭାରତୀୟ ସ୍ତରରେ ୧୧୨୨ ସ୍ଥାନ (AIR) ଅଧିକାର କରିଛନ୍ତି। ସେହିପରି ଭାରତ ସରକାରଙ୍କ ଅଣୁଶକ୍ତି ବିଭାଗ ଅଧୀନରେ ପରିଚାଳିତ ଜାତୀୟ ବିଜ୍ଞାନ ଶିକ୍ଷା ଓ ଗବେଷଣା ପ୍ରତିଷ୍ଠାନ (ନାଇଜର) ର ସ୍ନାତକ ପ୍ରବେଶିକା ପରୀକ୍ଷା (NEST-୨୦୨୬) ରେ ସେ ସର୍ବଭାରତୀୟ ସ୍ତରରେ ୧୩ତମ ସ୍ଥାନ ଏବଂ ଭାରତୀୟ ବିଜ୍ଞାନ ଶିକ୍ଷା ଏବଂ ଗବେଷଣା ପ୍ରତିଷ୍ଠାନ ପ୍ରବେଶିକା ପରୀକ୍ଷା (IAT) ରେ ୧୮୬ ତମ ସ୍ଥାନ ଅଧିକାର କରିଛନ୍ତି। ଏହା ସହ ଜାତୀୟ ପ୍ରଦ୍ୟୋଗିକ ସଂସ୍ଥା (NIT) ପ୍ରବେଶିକା ପରୀକ୍ଷାରେ ମଧ୍ୟ ସେ ନିଜର କୃତିତ୍ୱ ପ୍ରଦର୍ଶନ କରିଛନ୍ତି। ସ୍ୱୟଂ ହେଉଛନ୍ତି ଜାତୀୟ ପୁରସ୍କାର ପ୍ରାପ୍ତ ଶିକ୍ଷକ ସନ୍ତୋଷ କୁମାର କର ଏବଂ ଶିକ୍ଷୟିତ୍ରୀ ସସ୍ମିତା ଦାଶଙ୍କ ସୁପୁତ୍ର। ଏହା ପୂର୍ବରୁ ସେ CBSE ଦ୍ୱାରା ଆୟୋଜିତ ଦ୍ୱାଦଶ ଶ୍ରେଣୀ ପରୀକ୍ଷାରେ ୯୫.୬% ଅଙ୍କ ରଖି ଉତ୍ତୀର୍ଣ୍ଣ ହୋଇଥିଲେ।
ଅନୁରୂପ ଭାବେ ବିଦ୍ୟାଳୟର ଅନ୍ୟ ଜଣେ କୃତୀ ଛାତ୍ର ସୁବ୍ରତ ସାହାଣି ମଧ୍ୟ NEET-UG ପରୀକ୍ଷାରେ ୫୬୯ ନମ୍ବର ରଖି ସର୍ବଭାରତୀୟ ସ୍ତରରେ ୨୪୦୭୫ ରାଙ୍କ (AIR) ହାସଲ କରି ସଫଳତାପୂର୍ବକ କୃତକାର୍ଯ୍ୟ ହୋଇଛନ୍ତି। ସୁବ୍ରତ ହେଉଛନ୍ତି ଶିକ୍ଷକ ଶରତ କୁମାର ସାହାଣି ଏବଂ ସଞ୍ଜୁକ୍ତା ସାହାଣିଙ୍କ ସୁପୁତ୍ର।ଶିକ୍ଷା ପରିବାରରୁ ଆସିଥିବା ଏହି ଦୁଇ ଜଣ ଛାତ୍ରଙ୍କର ସଫଳତା ପାଇଁ ବିଦ୍ୟାଳୟର ସମସ୍ତ ଶିକ୍ଷକ ଶିକ୍ଷୟିତ୍ରୀ, ଅଭିଭାବକ, ସ୍ଥାନୀୟ ବୁଦ୍ଧିଜୀବୀ ଓ ଜନସାଧାରଣ ଉଭୟ ଛାତ୍ର ଏବଂ ସେମାନଙ୍କ ପିତାମାତାଙ୍କୁ ଶୁଭେଚ୍ଛା ଜଣାଇବା ସହ ସେମାନଙ୍କର ଉଜ୍ଜ୍ୱଳ ଭବିଷ୍ୟତ କାମନା କରିଛନ୍ତି।