09-Jul-2026

ନୂଆପଡ଼ା (ରାମନାଥ ପଣ୍ଡା )
ଦୀର୍ଘ ବର୍ଷ ଧରି ନିଷ୍ଠା ଓ ପରିଶ୍ରମର ସହିତ ସେବା ଯୋଗାଇ ଆସୁଥିବା ଯୋଗାଣ ସହାୟକଙ୍କ ନ୍ୟାୟସଙ୍ଗତ ଦାବିଗୁଡିକୁ ସରକାର ଶୁଣୁ ନାହାନ୍ତି, ଗତ ଜୁନ ୧୬ ତାରିଖରେ ଯୋଗାଣ ସହାୟକମାନେ ରାଜ୍ୟ ସରକାର ଓ ରାଜ୍ୟ ପ୍ରଶାସନକୁ ଏକ ଲିଖିତ ନୋଟିସ ମଧ୍ୟ ପ୍ରଦାନ କରିଥିଲେ ଦାବି ଗୁଡ଼ିକର ସମାଧାନ ପାଇଁ ଏବଂ  ସରକାରଙ୍କ ନୂତନ ପ୍ରଚଳିତ ସି ଏମ ଏ ୟାଇ ଯୋଜନା ଓ ବୃହତ୍ତର ଜନସ୍ବାର୍ଥକୁ ସମ୍ମାନ ଜଣାଇ ଖାଦ୍ୟଶସ୍ୟ ବଣ୍ଟନ କାର୍ଯ୍ୟ ସଫଳ କରିବା ପାଇଁ ସହଯୋଗ କରିବାର ଆଶ୍ୱାସନା ଦେଇଥିଲେ ଯୋଗାଣ ସହାୟକ ।ସେହି ସମୟରେ ଯୋଗାଣ ସହାୟକମାନେ ସ୍ପଷ୍ଟ ଭାବରେ ଜଣାଇଥିଲେ ଯେ ଯଦି ସରକାର ୧୦ ଜୁଲାଇ ୨୦୨୬ ସୁଦ୍ଧା ସେମାନଙ୍କ ଦାବି ଗୁଡ଼ିକର ସମାଧାନ ନ କରନ୍ତି ତେବେ ସାମ୍ବିଧାନିକ ଓ ଗଣତାନ୍ତ୍ରିକ ଅଧିକାର ବଳରେ ୧୦ ଜୁଲାଇ ୨୦୨୬ ଠାରୁ ସାମୁହିକ ଛୁଟିରେ ରହିବାକୁ ବାଧ୍ୟ ହେବେ ଏବଂ ଗଣତାନ୍ତ୍ରିକ ଆନ୍ଦୋଳନକୁ ଅଧିକ ତୀବ୍ର କରିବେ ବୋଲି ସେତେବେଳେ ପ୍ରକାଶ କରିଥିଲେ । ଏସବୁ ଜାଣି ମଧ୍ୟ ଜୁଲାଇ ଓ ଅଗଷ୍ଟ ମାସ ପାଇଁ ଖାଦ୍ୟଶସ୍ୟ ବଣ୍ଟନର ଆବଣ୍ଟନ ବର୍ତ୍ତମାନ  ଜାରି କରାଯାଇଛି ।ଏହି ପରିପ୍ରେକ୍ଷୀରେ ସେମାନେ ବୋଡ଼େନ ବି ଡି ଓ ଚିନ୍ମୟ କୁମାର ସାଗରଙ୍କୁ ଲିଖିତ ବିନମ୍ର ଅନୁରୋଧ କରିଛନ୍ତି ଯେ ୧୦ ଜୁଲାଇ ଠାରୁ ସାମୁହିକ ଛୁଟିରେ ରହିବେ ଯୋଗାଣ ସହାୟକମାନେ ତେଣୁ ଉକ୍ତ ମାସଗୁଡ଼ିକର ଖାଦ୍ୟଶସ୍ୟ ବଣ୍ଟନ କାର୍ଯ୍ୟ କରିବା ପାଇଁ ସରକାର କିମ୍ବା ଜିଲ୍ଲା ପ୍ରଶାସନ ସେମାନଙ୍କ ସଂଘର ସଦସ୍ୟମାନଙ୍କ ଉପରେ ପ୍ରତ୍ୟକ୍ଷ ବା ପରୋକ୍ଷ ଭାବରେ କୌଣସି ପ୍ରକାରର ଚାପ ପ୍ରୟୋଗ ନ କରନ୍ତୁ ବୋଲି ସଂଘର ସଭାପତି ପ୍ରେମ ବିଶ୍ଵାଳ,ସମ୍ପାଦକ ଦୁଷ୍ମନ୍ତ ବେହେରା,ଲକ୍ଷ୍ମୀକାନ୍ତ ଜଗତ, ଅଶୋକ ସାହୁ,ରଞ୍ଜିତ ବାଗ, ମହେନ୍ଦ୍ର ବାଗ, ଥବିରାମ ପାଣ୍ଡେ,ଯଶୋବନ୍ତ ମାଝୀ,ଅନୁରାଗ ବାଗ,ଆଲୋକ ବେହେରା ପ୍ରମୁଖ ଜଣାଇଛନ୍ତି ।