26-Jun-2026

ବରପାଲି (ସୁଦାମ ଦୀପ)ପଦ୍ମପୁର–ପାଟଣାଗଡ଼ ରାସ୍ତାର ରଜାପଡ଼ା ଠାରେ ଘଟିଛି ଏକ ଅଭାବନୀୟ ସଡ଼କ ଦୁର୍ଘଟଣା। ଭାରସାମ୍ୟ ହରାଇ ଏକ ଟ୍ରକ ରାସ୍ତା କଡ଼ରେ ଥିବା ଏକ ଘର ଭିତରକୁ ପଶିଯାଇଥିବା ଜଣାପଡ଼ିଛି। ଏହି ଘଟଣାରେ ଘରର ବ୍ୟାପକ କ୍ଷୟକ୍ଷତି ହୋଇଥିବା ବେଳେ ଜଣେ ମହିଳା ସାମାନ୍ୟ ଆହତ ହୋଇଛନ୍ତି। ସୂଚନା ଅନୁସାରେ, ରଜାପଡ଼ା ନିକଟରେ ଥିବା ସବିତା ତାଣ୍ଡିଙ୍କ ଘର ଭିତରକୁ ଏକ ଟ୍ରକ ହଠାତ୍ ଭାରସାମ୍ୟ ହରାଇ ପଶିଯାଇଥିଲା। ଘଟଣା ସମୟରେ ସବିତା ତାଣ୍ଡି ଘରେ ଥିବା ବେଳେ ଟ୍ରକ ଧକ୍କାରେ ସେ ସାମାନ୍ୟ ଆହତ ହୋଇଥିଲେ। ତେବେ ତାଙ୍କ ଦୁଇ ପୁଅ ଅଳ୍ପକେ ରକ୍ଷା ପାଇଯାଇଥିବା ଜଣାପଡ଼ିଛି। ଟ୍ରକଟି ଘର ଭିତରକୁ ପଶିଯିବା ଫଳରେ ଘରର କାନ୍ଥ, ଆସବାବପତ୍ର ସମେତ ଅନ୍ୟାନ୍ୟ ସାମଗ୍ରୀ ନଷ୍ଟ ହୋଇ ବ୍ୟାପକ କ୍ଷତି ହୋଇଛି। ହଠାତ୍ ଏଭଳି ଦୁର୍ଘଟଣା ଘଟିବାରୁ ପରିବାର ଲୋକଙ୍କ ମଧ୍ୟରେ ଭୟର ମାହୋଲ ସୃଷ୍ଟି ହୋଇଥିଲା। ଅନ୍ୟପଟେ, ଦୁର୍ଘଟଣା ପରେ ଟ୍ରକଟି ରାସ୍ତା ଉପରେ ପଡ଼ିଥିବା ପଦ୍ମପୁର–ପାଟଣାଗଡ଼ ରାସ୍ତାରେ ଯାତାୟାତ କିଛି ସମୟ ପାଇଁ ବାଧାପ୍ରାପ୍ତ ହୋଇଥିଲା। ଖବର ପାଇ ପଦ୍ମପୁର ପୋଲିସ ଓ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚିଥିଲେ। ଅଗ୍ନିଶମ ବାହିନୀ ଓ ପୋଲିସର ସହଯୋଗରେ ଟ୍ରକକୁ ରାସ୍ତା ଉପରୁ ହଟାଯାଇଥିଲା। ଏହା ସହ ଘଟଣାର କାରଣ ସମ୍ପର୍କରେ ପଦ୍ମପୁର ପୋଲିସ ତଦନ୍ତ ଆରମ୍ଭ କରିଛି। ଟ୍ରକ ଚାଳକଙ୍କ ଭୁଲ କିମ୍ବା ଅନ୍ୟ ବକୌଣସି କାରଣରୁ ଏହି ଦୁର୍ଘଟଣା ଘଟିଛି, ସେନେଇ ତଦନ୍ତ ପରେ ସ୍ପଷ୍ଟ ହେବ।