15-Jun-2026

କଟକ(ତପନ ମହାନ୍ତି) ସ୍ଥାନୀୟ ଗତିରାଉତପାଟଣା ପଞ୍ଚାୟତ ସ୍ଥିତ କ୍ରିକେଟ ପଡିଆରେ ଏକ ବହୁମୁଖୀ ଷ୍ଟାଡିୟମ ନିର୍ମାଣ ନିମନ୍ତେ ଶିଳାନ୍ୟାସ କରାଯାଇଛି। ରବିବାର ଅପରାହ୍ନରେ ଗ୍ରାମ୍ୟ ନିର୍ମାଣ, ପଞ୍ଚାୟତରାଜ ଓ ଜଳଯୋଗାଣ ମନ୍ତ୍ରୀ ରବିନାରାୟଣ ନାଏକ ଏହାର ଶିଳାନ୍ୟାସ କରିଥିଲେ।

ଗ୍ରାମ୍ୟ ନିର୍ମାଣ ବିଭାଗ ପକ୍ଷରୁ ନିର୍ମିତ ହେବାକୁ ଥିବା ଏହି ବହୁ ମୁଖୀ ଷ୍ଟାଡିୟମରେ ୧୩. ୯ କୋଟି ଟଙ୍କା ଖର୍ଚ୍ଚ ହେବ। ଏଥିରେ ଉଭୟ ଇଣ୍ଡୋର ଓ ଆଉଡୋର ଖେଳ ଖେଳିବା ପାଇଁ ସମସ୍ତ ପ୍ରକାର ସୁବିଧା ରହିବ। ଗ୍ରାମାଞ୍ଚଳ ପିଲାମାନେ ଏଠାରେ ବିଭିନ୍ନ କ୍ରୀଡାରେ ଅଭ୍ୟାସ କରି ଜାତୀୟ ଓ ଅନ୍ତର୍ଜାତୀୟ ସ୍ତରରେ ନିଜର ସ୍ଥାନ ସୃଷ୍ଟି କରି ପାରିବେ ବୋଲି ମନ୍ତ୍ରୀ ଶ୍ରୀ ନାୟକ ପ୍ରକାଶ କରିଥିଲେ। ଏହି ଶିଳାନ୍ୟାସ କାର୍ଯ୍ୟକ୍ରମରେ ସ୍ଥାନୀୟ ବିଧାୟକ ଇଂ ପ୍ରକାଶ ଚନ୍ଦ୍ର ସେଠୀ ଯୋଗ ଦେଇ କହିଲେ କ୍ରୀଡାର ବିକାଶ ପାଇଁ ରାଜ୍ୟ ସରକାରଙ୍କ ଏପରି ପଦକ୍ଷେପ ବାସ୍ତବିକ ଅଭିନନ୍ଦନିୟ।  ଏହି ଷ୍ଟାଡିୟମ ମାତ୍ର ୧୫ ମାସ ମଧ୍ୟରେ ଶେଷ ହେବ। ଫଳରେ ସ୍ଥାନୀୟ ଅଞ୍ଚଳର ପିଲା ମାନେ ଘର ପାଖରେ ଖେଳିବାର ସୁଯୋଗ ପାଇବେ।

କାର୍ଯ୍ୟକ୍ରମରେ କଟକ ସଦର ବ୍ଲକ ଅଧକ୍ଷା ଭାଗ୍ୟଲକ୍ଷ୍ମୀ ରାଉତ ଯୋଗ ଦେଇ ନିଜର ଖୁସି ବ୍ୟକ୍ତ କରିବା ସହିତ ନିଜ ଗାଁ, ପଞ୍ଚାୟତରେ ଏପରି ଏକ ବହୁମୁଖୀ ଷ୍ଟାଡିୟମ ନିର୍ମାଣ ନିଷ୍ପତି ହୋଇଥିବାରୁ ମନ୍ତ୍ରୀ, ବିଧାୟକ ଓ ପ୍ରଶାସନକୁ କୃତଜ୍ଞତା ଜଣାଇଥିଲେ। ଏହି କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ଜିଲ୍ଲା ପରିଷଦ ସଭ୍ୟ ପ୍ରଦୀପ୍ତ ମହାଳି, ବିଜେପି ନେତା ହୃଷିକେଶ ଜେନା,  ସ୍ଥାନୀୟ ସରପଞ୍ଚ ସୋନାଲି ପ୍ରଧାନ ସରକାରଙ୍କ ଏପରି ନିଷ୍ପତିର ପ୍ରଶଂସା କରିଥିଲେ। ଏହି କାର୍ଯ୍ୟକ୍ରମରେ ବହୁ ସଂଖ୍ୟାରେ ସ୍ଥାନୀୟ ଅଞ୍ଚଳବାସୀ ଉପସ୍ଥିତ ଥିଲେ।