12-Jun-2026

ତରଭା(ପ୍ରେରଣା ଖବର): ସୁବର୍ଣ୍ଣପୁର ଜିଲ୍ଲା ତରଭା ବ୍ଲକ ଅନ୍ତର୍ଗତ ପୁଆ ଓ ଦେଉଳପଦର ପେକ୍ସରେ ଚାଷିମାନେ ରବିଧାନ ବିକ୍ରି କରିନପାରି ଶୋଷିତ ହେଉଥିବା ଅଭିଯୋଗ ହୋଇଛି । ମୁଖ୍ୟତଃ ମିଲର୍ସଙ୍କ ମନମାନୀ କାରଣରୁ ଧାନକିଣାରେ ଅବ୍ୟବସ୍ଥା ଦେଖାଦେଇଥିବା ଜଣାପଡିଛି । ତେବେ ଯୋଗାଣବିଭାଗ,ସମବାୟ ବିଭାଗର ଅଧିକାରୀ ଓ ମିଲର୍ସଙ୍କ ମଧୁଚନ୍ଦ୍ରିକାରେ ଚାଷମାନେ ଶୋଷଣର ଶୀକାର ହେଉଥିବା ଅଭିଯୋଗ ହୋଇଛି । ଚାଷିମାନେ ଟୋକନଧରି ଜଗିବସିଛନ୍ତି କିନ୍ତୁ ପେକ୍ସକୁ ମିଲର୍ସ ଗାଡିପଠାଉନଥିବାରୁ ଧାନ ବିକ୍ରୀ ହୋଇପାରୁନାହିଁ ବୋଲି ଚାଷିମାନେ ଅଭିଯୋଗ କରିଛନ୍ତି । ଏନେଇ ଜିଲ୍ଲା ଯୋଗାଣଅଧିକାରୀଙ୍କୁ ଚାଷିମାନେ ଜଣାଇଥିଲେ ହେଁ ସେ କୌଣସି ପଦକ୍ଷେପ ନେଉନଥିବାରୁ ଚାଷିଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି । ଆହୁରି ସାଙ୍ଘାତିକ ଅଭିଯୋଗ ଆସିଛି ଯେ,ଏହି ଦୁଇ ପେକ୍ସରୁ ଧାନ ଉଠାଇବାକୁ ସିଆଲଜୁରିର ଲଳିତା ରାଇସମିଲ ଓ ଶିତଳ ରାଇସମିଲକୁ ଟେଗ କରାଯାଇଛି । କିନ୍ତୁ ଏହିମିଲର ମାଲିକ ସୁଧିରଙ୍କୁ ଚାଷି କିମ୍ବା ଅନ୍ୟ ଗଣମାଧ୍ୟମ ପ୍ରତିନିଧି ଫୋନ କଲେ ସେ ଆସନ୍ତା କାଲି ଗାଡି ପଠାଯିବ ବୋଲି କହି ଗାଲୁ ମାରୁଛନ୍ତି । ଆହୁରି ଅଭିଯୋଗ ହେଉଛି ଯେ,ଚାଷିଙ୍କୁ ପେକ୍ସ ବଦଳରେ ମିଲକୁ ସିଧାସଳଖ ଧାନ ନିଆଯାଇ ସେଠାରେ ମାପ କରାଇ ସ୍ଲିପ ଆଣିବାକୁ ବାଧ୍ୟ କରାଯାଉଛି । ମିଲର୍ସ ପାଖକୁ ଚାଷି ଧାନ ନେଲେ ସେଠାରେ କ୍ୱିଣ୍ଟାଲପିଚ୍ଛା ୩କିଲୋ କାଟି ମାପଓଜନ କରି ସ୍ଲିପ ଦେଉଛି । ତାକୁ ପେକ୍ସରେ ଏଣ୍ଟି କରାଯାଇ ଚାଷିଙ୍କ ଆକସାଉଣ୍ଟରେ ଟଙ୍କା ଦିଆଯାଉଛି । ଚାଷିମାନେ ମିଲକୁ ଧାନନେଲେ ମଧ୍ୟ ତାଙ୍କୁ ଗାଡିଖର୍ଚ୍ଚ ଦିଆଯାଉନାହିଁ । ଅନ୍ୟ ପଟେ ଗାଡିଭଡା ଓ ଶ୍ରମିକଙ୍କ ମଜୁରୀ ମିଳିମିଶି ହଡପ କରାଯାଉଥିବା ଅଭିଯୋଗ ଉଠୁଛି । ଚାଷିଙ୍କୁ ଏହି ଶୋଷଣ ବିରୁଦ୍ଧରେ ଆଗାମୀଦିନରେ ଚାଷିମାନେ ଆନ୍ଦୋଳନକୁ ଓହ୍ଲାଇବାକୁ ସଜବାଜ ଚାଲିଛି । ଏପଟେ ବର୍ଷା ହେବା ଉପରେ ଥିବା ବେଳେ ମଣ୍ଡିରେ ଓ ଚାଷିଙ୍କ ଖଳାରେ ଧାନ ପଡିରହିଛି । ଚାଷିଙ୍କୁ ହଇରାଣ କରାଯାଇ ମଧ୍ୟସ୍ଥି ଜରିଆରେ କମଦରରେ ଧାନ କିଣାଯାଇ ଫଲ୍ସଏଣ୍ଟ୍ରି କରି ମିଲର୍ସ ମାଲେମାଲ ହେବାକୁ ଷଢଯନ୍ତ୍ର କରୁଥିବା ଚାଷି ଅଭିଯୋଗ କରିଛନ୍ତି । ମିଲର୍ସ ଆସୁନଥିବାରୁ ଧାନ ବିକ୍ରୀରେ ଅସୁବିଧା ହେଉଥିବା ଡାହିମାଳର ଗୌତମ ସାହାଙ୍କ ସମେତ ଅନ୍ୟାନ୍ୟ ଚାଷି ଅଭିଯୋଗ କରିଛନ୍ତି । ସେପଟେ ପୁଆ ପେକ୍ସର ସଂପାଦକ ଥିବା ଦେବେନ୍ଦ୍ର ସାହାଙ୍କୁ ପଚାରିବାରୁ ମିଲର୍ସକୁ ଅନେକଥର ଫୋନ କଲେ ମଧ୍ୟ ଗାଡିପଠାଉନଥିବା କହିଛନ୍ତି । ଫଳରେ ମିଲର୍ସର ଦୁିର୍ନୀତିଖୋର ମନୋଭାବ କାରଣରୁ ଚାଷୀମାନେ ଶୋଷଣର ଶୀକାର ହେଉଥିବା ଅଭିଯୋଗ ହୋଇଛି । ସୁବର୍ଣ୍ଣପୁର ଜିଲ୍ଲାପାଳ ତୁରନ୍ତ ଏହି ଅଭିଯୋଗର ତଦନ୍ତ କରାଇ ଚାଷୀ ଙ୍କର ଧାନବିକ୍ରୀରେ ସହାୟକ ହେବେ ବୋଲି ଚାଷିମାନେ ଆଶା ବାନ୍ଧିଛନ୍ତି ।