11-Sep-2026

ବଲାଙ୍ଗୀର (ପ୍ରେରଣା ଖବର)- ସ୍ୱାସ୍ଥ୍ୟ ସଂପର୍କିତ ବିଭିନ୍ନ ସମସ୍ୟାକୁ ନେଇ ଆଜି ବଲାଙ୍ଗୀର ଜିଲ୍ଲା ସିଭିଲ ସୋସାଇଟିର ଏକ ପ୍ରତିନିଧି ମଣ୍ଡଳୀ  ରାଜ୍ୟ ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ଡ. ମୁକେଶ ମହାଲିଙ୍ଗଙ୍କ ସହ ଆଲୋଚନା କରି ଏକ ଦାବିପତ୍ର ପ୍ରଦାନ କରିଛନ୍ତି । ଆଲୋଚନାରେ ଟ୍ରାଫିକ୍ ସମସ୍ୟା ଓ ଆମ୍ବୁଲେନ୍ସ ଯାତାୟତର ସୁବିଧା ପାଇଁ ଭୀମ ଭୋଇ କଲେଜ ଓ ହସ୍ପିଟାଲରୁ ଗନ୍ଧରେଲ ରାସ୍ତା ଦେଇ ରିଙ୍ଗ୍ ରୋଡ ଓ ବାଇପାସ୍ ରାସ୍ତାକୁ ସଂଯୋଗ କରିବା ପାଇଁ ଏକ ନୂତନ ରାସ୍ତା ନିର୍ମାଣ ନିମନ୍ତେ ବିହିତ ପଦକ୍ଷେପ ନେବା ପାଇଁ ସ୍ୱାସ୍ଥ୍ୟମନ୍ତ୍ରୀଙ୍କ ନିକଟରେ ଦାବି କରାଯାଇଛି । ଏହି ପ୍ରସଙ୍ଗରେ ହସ୍ପିଟାଲ ଓ କଲେଜରେ ବିଭିନ୍ନ ବିଭାଗ ଯଥା ନିୟୁରୋଲୋଜି, ନେଫ୍ରୋଲୋଜି, ନ୍ୟୁରୋ ସର୍ଜରୀ ଓ ପ୍ଲାଷ୍ଟିକ ସର୍ଜରୀ ଆଦି ଖୋଲିବା ପାଇଁ ନିଷ୍ପତ୍ତି ହୋଇସାରିଛି ବୋଲି ସ୍ୱାସ୍ଥ୍ୟ ମନ୍ତ୍ରୀ ସିଭିଲ ସୋସାଇଟିର ପ୍ରତିନିଧି ମାନଙ୍କୁ କହିଥିଲେ । ପ୍ରତିନିଧି ମଣ୍ଡଳୀରେ ବଲାଙ୍ଗୀର ଜିଲ୍ଲା ସିଭିଲ ସୋସାଇଟିର ଆବାହକ ଇଂ. ବେଲାରସିଂ ଭୋଇ, ସଂଯୋଜକ ମନୋରଂଜନ ସାହୁ, ସଭ୍ୟ ମନୋରଂଜନ ମିଶ୍ର, ଦିବାକର ହୋତା, ରଘୁ ନନ୍ଦନ ସିଂହ, ସୁବୋଧ ନାଗ, ଦୁର୍ବାଦଳ ମହାକୁର ପ୍ରମୁଖ ଆଲୋଚନାରେ ଅଂଶଗ୍ରହଣ କରିଥିଲେ ।