10-Jun-2026

ବଲାଙ୍ଗିର(ପ୍ରେରଣା ଖବର): ବଲାଙ୍ଗିର ସହରର ଗାନ୍ଧୀନଗର ପଡ଼ାରେ ଘଟିଥିବା ମର୍ମନ୍ତୁଦ ସଡ଼କ ଦୁର୍ଘଟଣାରେ ମା’ ଓ ଝିଅଙ୍କ ଅକାଳ ମୃତ୍ୟୁ ଘଟଣାକୁ ନେଇ ବିଜୁ ଜନତା ଦଳ (ବିଜେଡି) ପକ୍ଷରୁ ଗଭୀର ଶୋକ ପ୍ରକାଶ କରାଯାଇଛି। ଏହି ଘଟଣାରେ ଦୋଷୀଙ୍କ ବିରୋଧରେ କଠୋର ଆଇନଗତ ପଦକ୍ଷେପ ଏବଂ ମୃତକ ପରିବାରକୁ ଆର୍ଥିକ ସହାୟତା ପ୍ରଦାନ ଦାବି କରି ଆଜି ବଲାଙ୍ଗିର ବିଜୁ ଜନତା ଦଳ ପକ୍ଷରୁ ନଗର ସଭାପତି ସମ୍ଭୁ ନାଗ ଏବଂ ବିଜୁ ଛାତ୍ର ଜନତା ଦଳ ସଭାପତି ସୁମନ କୁମାର ନନ୍ଦଙ୍କ ନେତୃତ୍ୱରେ ଏକ ପ୍ରତିନିଧି ଦଳ ବଲାଙ୍ଗିର ଆଦର୍ଶ ଟାଉନ ଥାନା ଅଧିକାରୀଙ୍କୁ ସାକ୍ଷାତ କରି ଦାବିପତ୍ର ପ୍ରଦାନ କରିଥିଲେ।
ପ୍ରତିନିଧି ଦଳ ଦୁର୍ଘଟଣା ଘଟାଇଥିବା ଟ୍ରକର ସମସ୍ତ କାଗଜପତ୍ର, ଫିଟନେସ୍‌, ବୀମା, ପରମିଟ ଏବଂ ଚାଳକଙ୍କ

ଲାଇସେନ୍ସ ଯାଞ୍ଚ କରିବା ସହିତ ଟ୍ରକ ଚାଳକ ଏବଂ ଗାଡ଼ି ମାଲିକଙ୍କ ବିରୋଧରେ ନିରପେକ୍ଷ ଓ ଦୃଢ଼ କାର୍ଯ୍ୟାନୁଷ୍ଠାନ ନେବାକୁ ଦାବି କରିଥିଲେ। ସେହିପରି ତାଲପାଳିପଡ଼ାର ମୃତକ ପରିବାରକୁ ତୁରନ୍ତ ଯଥୋଚିତ ଆର୍ଥିକ ସହାୟତା ପ୍ରଦାନ କରିବାକୁ ମଧ୍ୟ ନିବେଦନ କରାଯାଇଥିଲା।
ଏହାସହ ବିଜେଡି ପକ୍ଷରୁ ବଲାଙ୍ଗିର ସହରରେ ଚଳାଚଳ କରୁଥିବା ସମସ୍ତ ୬ ଚକିଆ ଓ ଭାରୀ ଯାନର ସ୍ୱତନ୍ତ୍ର ଯାଞ୍ଚ ଅଭିଯାନ ଚଳାଇ ସେମାନଙ୍କର କାଗଜପତ୍ର, ଫିଟନେସ୍‌ ଓ ବୈଧତା ଯାଞ୍ଚ କରିବାକୁ ଦାବି କରାଯାଇଥିଲା। ଯାଞ୍ଚ ସମୟରେ ତ୍ରୁଟିପୂର୍ଣ୍ଣ କିମ୍ବା ଅବୈଧ କାଗଜପତ୍ର ଥିବା ଯାନଗୁଡ଼ିକ ବିରୋଧରେ କଠୋର ପଦକ୍ଷେପ ଗ୍ରହଣ କରିବା ସହ ଭାରୀ ଯାନ ଚଳାଚଳ ପାଇଁ ଏକ ନିର୍ଦ୍ଧିଷ୍ଟ ସମୟସୀମା ନିର୍ଦ୍ଧାରଣ କରିବାକୁ ମଧ୍ୟ ଦାବି ଉଠାଯାଇଥିଲା।
ଏହି ଅବସରରେ ମୃତ ମା’ ଓ ଝିଅଙ୍କ ଅମର ଆତ୍ମାର ସଦଗତି କାମନା କରାଯାଇଥିବା ବେଳେ ଭବିଷ୍ୟତରେ ଏଭଳି ଦୁର୍ଘଟଣା

ରୋକିବା ପାଇଁ ପ୍ରଶାସନ ପକ୍ଷରୁ ଆବଶ୍ୟକ ସତର୍କତାମୂଳକ ଓ ପ୍ରତିରୋଧମୂଳକ ପଦକ୍ଷେପ ଗ୍ରହଣ କରିବାକୁ ମଧ୍ୟ ଦାବି କରାଯାଇଥିଲା।
ଏହି କାର୍ଯ୍ୟକ୍ରମରେ ମୁନିସିପାଲିଟି ଉପାଧ୍ୟକ୍ଷା ଗାୟତ୍ରୀ ଭୋଇ, କାଉନସିଲର ଲଲାଟେନ୍ଦୁ ପଟ୍ଟନାୟକ, ସନ୍ତୋଷିନୀ କୁଁଅର, ଗଙ୍ଗାଧର ଚାନ୍ଦ, ନନ୍ଦିନୀ ପୋଢ଼, ପିଙ୍କି କବାଟ, କିଶୋର କୁମ୍ଭାର, ସତ୍ୟ ନାୟକ, ବିଜେଡିର ବରିଷ୍ଠ ନେତା ନରସିଂହ ବାଗ, ବିଧୁଭୂଷଣ ତ୍ରିପାଠୀ, ପ୍ରଭାସ ପାଣିଗ୍ରାହୀ, ଦିଲ୍ଲୀପ ବଗର୍ତ୍ତି, ବିଭୂତି ଭୂଷଣ ମିଶ୍ର, ଗୁଞ୍ଜ ଖାନ, ସତ୍ୟବ୍ରତ ନାଥ, ନିତେଶ ପୋଢ଼, ସୁବଳ ମହାକୁର,ଇରସାଦ ଖାନ,ମାନୁ ପଟ୍ଟନାୟକ, ପ୍ରଦୀପ ପରୁଆ, ବଣ୍ଟି ଚନ୍ଦ,ସନ୍ତୋଷ ସାହୁଙ୍କ ସମେତ ବହୁ ଦଳୀୟ କର୍ମକର୍ତ୍ତା, ଯୁବ ଓ ଛାତ୍ର ନେତା ଉପସ୍ଥିତ ଥିଲେ।