19-May-2026

ନୂଆପଡା(ପରମେଶ୍ୱର ମେହେର) : ଜିଲ୍ଲାପାଳ ମଧୁସୂଦନ ଦାଶ ଆଜି କୋମନା ବ୍ଲକ ସମ୍ମିଳନୀ କକ୍ଷରେ କେନ୍ଦ୍ର ସରକାରଙ୍କ “ଜନ ଭାଗିଦାରୀ : ସବସେ ଦୂର, ସବସେ ପହେଲେ” ଅଭିଯାନର ଶୁଭାରମ୍ଭ କରିଛନ୍ତି ।

ଏହି ଅବସରରେ ଜିଲ୍ଲାପାଳ ଆଦିବାସୀ ବହୁଳ ଗ୍ରାମଗୁଡ଼ିକରେ ସରକାରଙ୍କ ବିଭିନ୍ନ ଜନକଲ୍ୟାଣମୂଳକ ଯୋଜନା ସମ୍ବନ୍ଧରେ ଲୋକମାନଙ୍କୁ ଅବଗତ କରାଇବା ସହ ବିଭିନ୍ନ ଯୋଜନାର ହିତାଧିକାରୀମାନଙ୍କୁ ସୁବିଧା ବଣ୍ଟନ କରିଥିଲେ ।

ନିକଟ ଅତୀତରେ କେନ୍ଦ୍ର ସରକାର “ପ୍ରଧାନମନ୍ତ୍ରୀ ଜନଜାତି ଆଦିବାସୀ ନ୍ୟାୟ ମହାଅଭିଯାନ (PM-JANMAN)” ଏବଂ “ଧରତୀ ଆବା ଜନଜାତୀୟ ଗ୍ରାମ ଉତ୍କର୍ଷ ଅଭିଯାନ (DA-JGUA)” ଭଳି ଗୁରୁତ୍ୱପୂର୍ଣ୍ଣ ଯୋଜନା ଆରମ୍ଭ କରିଥିବା। ଏହାର ସଫଳ କାର୍ଯ୍ୟକାରିତା ଓ ଜନସମ୍ପୃକ୍ତିକୁ ଆହୁରି ସୁଦୃଢ କରିବା ପାଇଁ “ଜନ ଭାଗିଦାରୀ : ସବସେ ଦୂର, ସବସେ ପହେଲେ” ଅଭିଯାନ ଆରମ୍ଭ କରାଯାଇଛି ।

ଏହି ଅଭିଯାନର ମୁଖ୍ୟ ଲକ୍ଷ୍ୟ ହେଉଛି କ୍ଷେତ୍ରସ୍ତରରେ ସମ୍ପର୍କ ବଢ଼ାଇବା, ସରକାରୀ ସେବାର ସର୍ବାଧିକ ପହଞ୍ଚ ସୁନିଶ୍ଚିତ କରିବା, ସ୍ୱାସ୍ଥ୍ୟ ସେବାକୁ ମଜବୁତ କରିବା ଏବଂ ଆଦିବାସୀଙ୍କ ଜୀବନ ଓ ଜୀବିକାର ମାନ ଉନ୍ନତ କରିବା ।

ମେ’ ୧୮ ରୁ ମେ’ ୨୫ ପର୍ଯ୍ୟନ୍ତ ଚାଲିବାକୁ ଥିବା ଏହି ଅଭିଯାନରେ ନୂଆପଡା ଜିଲ୍ଲାର ଆଦିବାସୀ ବହୁଳ ମୋଟ ୨୮୫ଟି ଗ୍ରାମକୁ ସାମିଲ କରାଯାଇଛି । ଏଥିରେ ନୂଆପଡା ବ୍ଲକର ୫୧ଟି, କୋମନା ବ୍ଲକର ୧୩୨ଟି, ଖଡ଼ିଆଳ ବ୍ଲକର ୧୮ଟି, ବୋଡେନ ବ୍ଲକର ୭୦ଟି ଏବଂ ସିନାପାଲି ବ୍ଲକର ୧୪ଟି ଗ୍ରାମ ଅନ୍ତର୍ଭୁକ୍ତ ରହିଛି ।

ଅଭିଯାନ ଅନ୍ତର୍ଗତ ପ୍ରତ୍ୟେକ ଗ୍ରାମରେ ସଚେତନତା ଶିବିର, ଅଭିଯୋଗ ଗ୍ରହଣ ଓ ଶୁଣାଣି, ମାଗଣା ସ୍ୱାସ୍ଥ୍ୟ ଶିବିର, ବୃକ୍ଷରୋପଣ କାର୍ଯ୍ୟକ୍ରମ, ସରକାରୀ ସୁବିଧା ବଣ୍ଟନ ଏବଂ ଜୀବିକାଭିତ୍ତିକ ସହାୟତା କାର୍ଯ୍ୟକ୍ରମ ଆୟୋଜନ କରାଯିବ । ଏହା ମାଧ୍ୟମରେ ଲୋକମାନଙ୍କ ପାଖରେ ସରକାରୀ ଯୋଜନାର ଲାଭ ପହଞ୍ଚାଇବାକୁ ପ୍ରୟାସ କରାଯିବ ।

ଜିଲ୍ଲାପାଳ ଜିଲ୍ଲାବାସୀଙ୍କୁ ଏହି ଜନମୁଖୀ ଅଭିଯାନର ସୁଯୋଗ ନେଇ ସରକାରୀ ଯୋଜନାର ଲାଭ ଉଠାଇବାକୁ ଆହ୍ୱାନ ଦେଇଥିଲେ ।

ବନଖଣ୍ଡ ଅଧିକାରୀ, ପ୍ରାନ୍ତୀୟ, ଅଜିଜ ଖାନ, ମୁଖ୍ୟ ଉନ୍ନୟନ ଅଧିକାରୀ ଲମ୍ବୋଧର ଧରୁଅ, ଉପ ଜିଲ୍ଲାପାଳ ସୁର୍ମି ସୋରେନ୍ ପ୍ରମୁଖ ଉପସ୍ଥିତ ଥିଲେ।