03-May-2026

ବଲାଙ୍ଗିର(ପ୍ରେରଣା ଖବର): ଓଡିଶା ଯୁବ ରାଜନୀତିରେ ଏକ ପରିଚିତ ମୁହଁ ଅଙ୍କିତ ସାହୁଙ୍କୁ ବଲାଙ୍ଗିର ଜିଲ୍ଲା ଯୁବ କଂଗ୍ରେସର ସଭାପତି ଭାବେ ନିଯୁକ୍ତ କରାଯାଇଛି। ତାଙ୍କ ନିଯୁକ୍ତିକୁ ଜିଲ୍ଲାର ଯୁବ ନେତା, କର୍ମୀ ଓ ସମର୍ଥକମାନେ ସ୍ୱାଗତ କରିଛନ୍ତି। ଅଙ୍କିତ ସାହୁ ବର୍ତ୍ତମାନ ଭାରତୀୟ ଯୁବ କଂଗ୍ରେସର ରାଷ୍ଟ୍ରୀୟ ପ୍ରବକ୍ତା ଭାବେ କାର୍ଯ୍ୟରତ ଅଛନ୍ତି ଏବଂ ଯୁବ ରାଜନୀତି, ସଂଗଠନୀୟ ନେତୃତ୍ୱ ଓ ସାର୍ବଜନିକ ଯୋଗାଯୋଗ କ୍ଷେତ୍ରରେ ତାଙ୍କ ସକ୍ରିୟ ଭୂମିକା ପାଇଁ ପରିଚିତ। ଦିର୍ଘ ଦିନ ଧରି ସେ ଯୁବ ସମସ୍ୟା ଉପରେ ସ୍ୱର ଉଠାଇବା ସହ ସଂଗଠନକୁ ତୃଣମୂଳ ସ୍ତରରେ ସୁଦୃଢ କରିବାରେ ନିରନ୍ତର କାମ କରୁଛନ୍ତି। ଏହାପୂର୍ବରୁ ସେ ଏସ୍‌ଏସ୍‌ୟୁଆଇର ଜିଲ୍ଲା ଅଧ୍ୟକ୍ଷ ଭାବେ କାର୍ଯ୍ୟ କରି ଥିଲେ ଏବଂ ଛାତ୍ର ସଂଗଠନକୁ ଶକ୍ତିଶାଳୀ କରିବାରେ ଉଲ୍ଲେଖନୀୟ ଭୂମିକା ନିଭାଇଥିଲେ। ପରେ ସେ ଭାରତୀୟ ଯୁବ କଂଗ୍ରେସ ର ଜିଲ୍ଲା ଉପାଧ୍ୟକ୍ଷ ଭାବେ ମଧ୍ୟ ଦାୟିତ୍ୱ ନିର୍ବାହ କରିଥିଲେ । ସେହି ପରି ସେ ଭାରତୀୟ ଯୁବ କଂଗ୍ରେସର ଜାତୀୟ ମିଡିଆ ପ୍ୟାନେଲିଷ୍ଟ ଭାବେ ମଧ୍ୟ କାର୍ଯ୍ୟ କରି ସଂଗଠନର ପକ୍ଷରୁ ବିଭିନ୍ନ ମାଧ୍ୟମରେ ନିଜ ମତ ପ୍ରକାଶ କରିଛନ୍ତି। ଦଳୀୟ କର୍ମୀମାନେ ଆଶା ପ୍ରକାଶ କରିଛନ୍ତି ଯେ ଶ୍ରୀ ସାହୁଙ୍କ ନେତୃତ୍ୱରେ ବଲାଙ୍ଗିର ଜିଲ୍ଲା ଯୁବ କଂଗ୍ରେସ ଆହୁରି ସଶକ୍ତି ହେବ ଏବଂ ଯୁବମାନଙ୍କ ସହଭାଗୀତା ବଢିବ। ଜିଲ୍ଲାର ବିଭିନ୍ନ ସ୍ଥାନରୁ ସମର୍ଥନ ଓ ଶୁଭେଚ୍ଛୁମାନେ ଶ୍ରୀ ସାହୁଙ୍କୁ ଅଭିନନ୍ଦନ ଜଣାଇଥିବା ବେଳେ ତାଙ୍କ ନୂତନ ଦାୟିତ୍ୱ ପାଇଁ ଶୁଭେଚ୍ଛା ଜଣାଇଛନ୍ତି। ରାଜନୀତିକ ମହଳରେ ମଧ୍ୟ ଏହାକୁ ଯୁବ ନେତୃତ୍ୱ ପାଇଁ ଏକ ସକାରାତ୍ମକ ପଦକ୍ଷେପ ଭାବେ ଦେଖାଯାଇଛି। ଏହି ଅବସରରେ ଅଙ୍କିତ ସାହୁ ଦଳର ଶିର୍ଷ ନେତୃତ୍ୱ ଯଥା ଲୋକସଭାରେ ବିରୋଧୀ ଦଳ ନେତା ରାହୁଲ ଗାନ୍ଧୀ, ଅଖିଳ ଭାରତୀୟ କଂଗ୍ରେସ କମିଟି ଅଧ୍ୟକ୍ଷ ମଲ୍ଲୀକାର୍ଜୁନ ଖଡଗେ, ପୂର୍ବତନ ମନ୍ତ୍ରୀ ନରସିଂହ ମିଶ୍ର, ଭାରତୀୟ ଯୁବ କଂଗ୍ରେସ ରାଷ୍ଟ୍ରୀୟ ପ୍ରଭାରୀ ମନୀଷ ଶର୍ମା, ଭାରତୀୟ ଯୁବ କଂଗ୍ରେସ ରାଷ୍ଟ୍ରୀୟ ଅଧ୍ୟକ୍ଷ ଉଦୟ ଭାନୁ ଚିବ, ବଲାଙ୍ଗିର ବିଧାୟକ ପ୍ରାର୍ଥୀ ତଥା ବରିଷ୍ଠ କଂଗ୍ରେସ ନେତା ସମରେନ୍ଦ୍ର ମିଶ୍ର, ଯୁବ କଂଗ୍ରେସ ରାଷ୍ଟ୍ରୀୟ ସମ୍ପାଦକ ତଥା ପ୍ରଭାରୀ ମହେଶ ଦେଶମୁଖ, ସହ ପ୍ରଭାରୀ ରିୟାନ ରାଜୁ, ରାଜ୍ୟ ଯୁବ କଂଗ୍ରେସ ସଭାପତି ରଂଜିତ ପାତ୍ର ଓ ଅନ୍ୟାନ୍ୟ ନେତୃବୃନ୍ଦଙ୍କୁ ଧନ୍ୟବାଦ ଜଣାଇଥିବା ସହ ବଲାଙ୍ଗିର ଜିଲ୍ଲାର ଯୁବମାନଙ୍କ ସ୍ୱାର୍ଥ ଓ ସଂଗଠନର ସୁଦୃଢତା ପାଇଁ ନିରନ୍ତର କାର୍ଯ୍ୟ କରିବେ କରିବେ ବୋଲି କହିଛନ୍ତି।