05-Mar-2026

ବଲାଙ୍ଗିର (ପ୍ରେରଣା ଖବର): ବଳାଙ୍ଗିର ଜିଲ୍ଲା ମାଛଚାଷ ବିଭାଗ ଏବଂ ଯୁବୋଦୟ  କଲେଜ ଅଫ ଆଡଭାନ୍ସ୍ଡ ଟେକ୍ନୋଲୋଜି, ସକମା, ବଳାଙ୍ଗିର ଯୁକ୍ତଭାବେ ଜୀବବିଜ୍ଞାନ  ଓ ଉଦ୍ଭିଦ ବିଜ୍ଞାନ ଯୁକ୍ତ ତିନ  ବିଭାଗର ଛାତ୍ରଛାତ୍ରୀମାନଙ୍କ ପାଇଁ ଏକ ଶିକ୍ଷାତ୍ମକ ଭ୍ରମଣ ଆୟୋଜନ କରିଥିଲେ। ଏହି ଭ୍ରମଣର ମୁଖ୍ୟ ଉଦ୍ଦେଶ୍ୟ ହେଉଛି ମାଛଚାଷ ଓ ମତ୍ସ୍ୟ ପ୍ରବନ୍ଧନ ସମ୍ପର୍କିତ ବିଭିନ୍ନ ପ୍ରକ୍ରିୟାକୁ ପ୍ରାୟୋଗିକ ଭାବେ ଅଧ୍ୟୟନ କରାଇବା। ଏହି କାର୍ୟକ୍ରମଟି ପଟ୍ନାଗଡ଼ ଅଞ୍ଚଳର ସପନ ଫିଶ ସିଡ଼ ଫାର୍ମ ଠାରେ ଆୟୋଜିତ ହୋଇଥିଲା।

ଏହି ପ୍ରଶିକ୍ଷଣ କାର୍ୟକ୍ରମରେ ବଳାଙ୍ଗିର ଜିଲ୍ଲାର ମାଛଚାଷ ଅଧିକାରୀ ଶ୍ରୀ ପ୍ରଫୁଲ୍ଲ କନହର, ସହକାରୀ ମାଛଚାଷ ଅଧିକାରୀ  ଶ୍ରୀ ମୁକେଶ ଏବଂ ଫାର୍ମର ମାଲିକ ଶ୍ରୀ ସପନ କୁମାର ପାତ୍ର ଉପସ୍ଥିତ ରହି ଛାତ୍ରଛାତ୍ରୀମାନଙ୍କୁ ମାଛଚାଷ ସମ୍ପର୍କିତ ବିଭିନ୍ନ ପ୍ରକ୍ରିୟା ବିଷୟରେ ସ୍ପଷ୍ଟ ଓ ପ୍ରାୟୋଗିକ ତଥ୍ୟ ଜଣାଇଥିଲେ।
ଏହି ଭ୍ରମଣ ସମୟରେ ଛାତ୍ରଛାତ୍ରୀମାନେ ମାଛ ଚାଷ ପ୍ରଣାଳୀ, ମାଛ ଚାରା ଉତ୍ପାଦନ, ପୋଖରୀ ପ୍ରବନ୍ଧନ, ଏବଂ ଆଧୁନିକ ଆକ୍ୱାକଲଚର ପ୍ରଣାଳୀ ବିଷୟରେ ବିସ୍ତୃତ ଜ୍ଞାନ ଅର୍ଜନ କରିଥିଲେ। ତେଣୁ, ସେମାନେ ପାଠ୍ୟକ୍ରମରେ ଯାହା ପଢ଼ୁଛନ୍ତି, ତାହାକୁ ପ୍ରାୟୋଗିକ ଭାବରେ ଦେଖିବା ଓ ବୁଝିବାର ଏକ ଭଲ ସୁଯୋଗ ପାଇଥିଲେ।
ଏହି ପ୍ରଶିକ୍ଷଣ କାର୍ୟକ୍ରମର ଶେଷରେ ସମସ୍ତ ଅଂଶଗ୍ରହଣ କରିଥିବା ଛାତ୍ରଛାତ୍ରୀ ଓ ଶିକ୍ଷକମାନଙ୍କୁ ପ୍ରଶିକ୍ଷଣ ସମ୍ପୂର୍ଣ୍ଣ

ମାନପତ୍ର ପ୍ରଦାନ କରାଯାଇଥିଲା।
ଏହି ସନ୍ଦର୍ଭରେ ମହାବିଦ୍ୟାଳୟର ନିର୍ଦ୍ଦେଶକ ଶ୍ରୀ ଅମ୍ବରୀଶ ଦାଶ କହିଥିଲେ ଯେ, ଏପରି ଶିକ୍ଷାତ୍ମକ ଭ୍ରମଣ ଓ ପ୍ରଶିକ୍ଷଣ କାର୍ୟକ୍ରମ ଛାତ୍ରଛାତ୍ରୀମାନଙ୍କର ଜ୍ଞାନକୁ ଅଧିକ ଗଭୀର କରିବା ସହିତ ସେମାନଙ୍କର ପ୍ରାୟୋଗିକ ଦକ୍ଷତାକୁ ମଧ୍ୟ ବୃଦ୍ଧି କରିଥାଏ। ଏହା ତାଙ୍କ ଭବିଷ୍ୟତ ଶିକ୍ଷା ଓ କ୍ୟାରିୟର ପାଇଁ ମଧ୍ୟ ଅତ୍ୟନ୍ତ ଉପକାରୀ ହେବ ବୋଲି ସେ ମତ ପ୍ରକାଶ କରିଥିଲେ।