22-Feb-2026

କଣ୍ଟାମାଳ(ଜୟ କୁମାର ମହାରଣା): ସୁବର୍ଣ୍ଣପୁର ଜିଲ୍ଲା ତରଭା ଥାନା ଅଂଚଳରେ ଘଟିଛି ଅଭାବନୀୟ ଘଟଣା l ବୌଦ୍ଧ ଜିଲ୍ଲା କଣ୍ଟାମାଳରୁ ବଲାଙ୍ଗିର ଜିଲ୍ଲା ଖୁଜେନପାଲି ଗାଁ କୁ ବିବାହ ସାରି ଫେରୁଥିଲେ ନବ ବରବଧୂ l  ଫେରିବା ବାଟରେ ନବଵଧୁକୁ ବନ୍ଧୁକ ଦେଖାଇ ଦୁର୍ବୃତ୍ତମାନେ ଅପହରଣ କରିନେଇଥିବା ଭଳି ରୋମାଞ୍ଚକର ଘଟଣା ସମଗ୍ର ଅଞ୍ଚଳରେ ମୁଖ୍ୟ ଚର୍ଚ୍ଚାର ବିଷୟ ପାଲଟିଛି l  ଘଟଣାକୁନେଇ ତରଭା ପୋଲିସର ତନାଘନା ଜାରି ରହିଛି l ସୂଚନାନୁସାରେ ବଲାଙ୍ଗିର ଜିଲ୍ଲା କାମାକ୍ଷାନଗର ନିକଟ ଖୁଜେନପାଲି ଗାଁ ର ରିଙ୍କୁ ନାମକ ଯୁବକ ବୌଦ୍ଧ ଜିଲ୍ଲା କଣ୍ଟାମାଳ ର ରଶ୍ମି ନାମକ ଯୁବତୀକୁ ଗତ ଶନିବାର ରାତିରେ ବୈଦିକ ରୀତିନୀତିରେ ବିବାହ କରିଥିଲେ l ବିବାହ ସାରି ରବିବାର ପ୍ରତ୍ୟୁଷରୁ ବରକନ୍ୟା କଣ୍ଟାମାଳରୁ ବଲାଙ୍ଗିର ଜିଲ୍ଲା ଖୁଜେନପାଲି ଗାଁ କୁ ଫେରୁଥିଲେ l ଫେରିବା ବାଟରେ ସୁବର୍ଣ୍ଣପୁର ଜିଲ୍ଲା ତରଭା ଥାନା ବଡ଼ବନ୍ଧ ନିକଟ ପେଟ୍ରୋଲ ଟାଙ୍କି ଠାରେ ୪/୫ ଜଣ ଯୁବକ ବର ଗାଡିକୁ ଅଟକାଇ ଥିଲେ। ଗାଡି ଅଟକିବା ପରେ ଦୁର୍ବୃତ୍ତ ମାନେ ବନ୍ଧୁକ ଦେଖାଇ ଗାଡି ଭିତରୁ ନବଵଧୂକୁ ଅପହରଣ କରି ଅନ୍ୟଏକ ଗାଡ଼ିରେ ନେଇ ଯାଇଥିଲେ l ମାରଣାସ୍ତ୍ର ଦେଖି ବର ଭୟଭୀତ ଅବସ୍ଥାରେ କିଛି ପ୍ରତିବାଦ କରିବା ପୂର୍ବରୁ ଦୁର୍ବୃତ୍ତମାନେ ଆଖିପିଛୁଳାକେ ନବଵଧୂକୁ ଧରି ଛୁ ମାରିଥିଲେ l  ଏ ସମ୍ପର୍କରେ ବର ଓ ସମ୍ପର୍କୀୟ  ତରଭା ଥାନାରେ ଲିଖିତ ଅଭିଯୋଗ କରିଥିଲେ  l  ଖବରପାଇ ତରଭା ଥାନା ପକ୍ଷରୁ ଘଟଣାର ସରଜମିନ ତଦନ୍ତ

ଆରମ୍ଭ କରିଛି ପୁଲିସ l  ସେହିପରି ବରକନ୍ୟାଙ୍କୁ ସ୍ୱାଗତ ପାଇଁ ବରଘର ଲୋକେ ଅପେକ୍ଷା କରିବା ସହ ବରଘରେ ଚାନ୍ଦୁଆ ଟେଣ୍ଟ ଫୁଲ ସଜାସାଜି ସହ ଭୋଜିର ଆୟୋଜନରେ ବ୍ୟସ୍ତ ଥିବାବେଳେ ଏଭଳି ଅଭାବନୀୟ ଘଟଣା ଶୁଣି ଚକିତ ହୋଇଥିଲେ l  ତେବେ ଏହା ଏକ ପ୍ରେମଜନିତ ସୁପରିକଳ୍ପିତ ଯୋଜନାବଦ୍ଧ ଘଟଣା ନା ପାରିବାରିକ ପ୍ରତିଶୋଧ ଅବା ନବବଧୂ ଠାରୁ ସୁନାଗହଣା ଲୁଟ ପାଇଁ ଯୋଜନା ହୋଇଛି ତାହା ଅସ୍ପଷ୍ଟ ଥିବାବେଳେ ପୋଲିସ ପକ୍ଷରୁ ଘଟଣାର ତନାଘନା  ଜାରି ରହିଛି l