18-Aug-2026

କଣ୍ଟାବାଞ୍ଜି(ମୋହନ ସୁନା): ବଲାଙ୍ଗୀର ଜିଲ୍ଲା କଣ୍ଟାବାଞ୍ଜି ବିଜ୍ଞାପିତ ଅଞ୍ଚଳ ପରିଷଦ ପକ୍ଷରୁ ୮୦ତମ ସ୍ବାଧୀନତା ଦିବସ ଅବସରେ ସହରର ବିଭିନ୍ନ ଛକରେ ଲଗାଯାଇଥିବା ଶୁଭେଚ୍ଛା ହୋଡିଙ୍ଗକୁ ନେଇ ଏବେ ବିବାଦ ସୃଷ୍ଟି ହୋଇଛି। ହୋଡିଙ୍ଗରେ ବିଭିନ୍ନ ସ୍ବାଧୀନତା ସଂଗ୍ରାମୀଙ୍କ ଫଟୋ ରହିଥିବା ବେଳେ ଭାରତର ସମ୍ବିଧାନ ପ୍ରଣେତା ଡକ୍ଟର ବି.ଆର୍. ଆମ୍ବେଦକର ଙ୍କ ଫଟୋ ନଥିବାରୁ ସ୍ଥାନୀୟ ସଚେତନ ନାଗରିକ ତୀବ୍ର ଅସନ୍ତୋଷ ପ୍ରକାଶ କରିଛନ୍ତି। ସହରର ବାଳିକା ଉଚ୍ଚ ବିଦ୍ୟାଳୟ, ଥାନା ଛକ ଠାରେ ଏନ.ଏସି ପକ୍ଷରୁ ବଡ଼ ବଡ଼ ହୋଡିଙ୍ଗ ଲଗାଯାଇଛି। ସେଥିରେ ମହାତ୍ମା ଗାନ୍ଧୀ, ନେତାଜୀ ସୁଭାଷ ଚନ୍ଦ୍ର ବୋଷ, ଭଗତ ସିଂହ ଭଲି ଅନ୍ୟ ସ୍ବାଧୀନତା ସଂଗ୍ରାମୀଙ୍କ ଫଟୋ ରହିଛି। କିନ୍ତୁ ଭାରତର ସମ୍ବିଧାନ ରଚନାରେ ମୁଖ୍ୟ ଭୂମିକା ଗ୍ରହଣ କରିଥିବା ଡକ୍ଟର ବି.ଆର୍. ଆମ୍ବେଦକରଙ୍କୁ ସ୍ଥାନ ମିଳିନାହିଁ। ଏହାକୁ ନେଇ କଣ୍ଟାବାଞ୍ଜି ସହର ସଚେତନ ଯୁବକ ଚୈତନ୍ୟ ହଂସ ଓ ପିଣ୍ଟୁ ସୁନା ପ୍ରତିକ୍ରିୟା ଦେଇ କହିଛନ୍ତି ଯେ ଡକ୍ଟର ଆମ୍ବେଦକର କେବଳ ସ୍ବାଧୀନତା ସଂଗ୍ରାମୀ ନୁହନ୍ତି, ସେ ହେଉଛନ୍ତି ଆଧୁନିକ ଭାରତର ସ୍ଥପତି। ସମ୍ବିଧାନ ମାଧ୍ୟମରେ ସେ ଦେଶର କୋଟି କୋଟି ଦଳିତ, ଶୋଷିତଙ୍କୁ ସମ୍ମାନ ଓ ଅଧିକାର ଦେଇଛନ୍ତି। ସ୍ବାଧୀନତା ଦିବସର ହୋଡିଙ୍ଗରୁ ତାଙ୍କୁ ବାଦ୍ ଦେବା ସିଧାସଳଖ ଅସମ୍ମାନ।"ସେମାନେ ଆହୁରି କହିଲେ ଯେ କଣ୍ଟାବାଞ୍ଜି ବିଜ୍ଞାପିତ ଅଞ୍ଚଳ ପରିଷଦ ଇଚ୍ଛାକୃତ ଭାବେ ଡକ୍ଟର ଆମ୍ବେଦକରଙ୍କୁ ଅଣଦେଖା କରିଛି। ଏହା ସମ୍ବିଧାନ ଓ ସାମାଜିକ ନ୍ୟାୟର ଅପମାନ ବୋଲି ଅଭିଯୋଗ ଆଣିଛନ୍ତି। ସେପଟେ ଆମେ ଯେଉଁ ସମ୍ବିଧାନ ଅଧୀନରେ ବଞ୍ଚୁଛୁ ତାର ମୁଖ୍ୟ ରଚୟିତାଙ୍କୁ ଭୁଲିଗଲେ ସ୍ବାଧୀନତା ଦିବସ ପାଳନର ଅର୍ଥ କଣ? ବୋଲି ଜଣେ କଲେଜ ଛାତ୍ର ପ୍ରଶ୍ନ ଉଠାଇଛନ୍ତି। ସ୍ବାଧୀନତା ଦିବସ ହେଉଛି ସମସ୍ତ ସହିଦ ଓ ଦେଶ ନିର୍ମାତାଙ୍କୁ ସ୍ମରଣ କରିବାର ଦିନ। ଡକ୍ଟର ଆମ୍ବେଦକର ଭଳି ଜଣେ ଜାତୀୟ ନାୟକଙ୍କୁ ସରକାରୀ ହୋଡିଙ୍ଗରୁ ବାଦ୍ ଦେବା ଦୁର୍ଭାଗ୍ୟଜନକ। ବଲାଙ୍ଗୀର ଜିଲ୍ଲା ପ୍ରଶାସନ ଘଟଣା କୁ ଗୁରୁତର ସେବା ନେବାକୁ ଦାବି ହେଉଛି।