04-Feb-2021

ଭୁବନେଶ୍ୱର(ଶୁଭାଶିଷ ନାୟକ) : ରମାଦେବୀ ବିଶ୍ୱବିଦ୍ୟାଳୟ ଛାତ୍ରୀ ଝରାଫୁଲ ନାୟକ ମୃତ୍ୟୁ ଘଟଣାରେ ପୋଲିସ୍‌ ହାତରେ ନୂଆ ସୁରାକ୍‌ ଲାଗିଛି। ଭୁବନେଶ୍ୱର ସୁନ୍ଦରପଦା ନିକଟରୁ ଯାଜପୁର ପୋଲିସ ଏକ ସ୍କୁଟର ଜବତ କରିଛି। ଏହି ସ୍କୁଟରରେ ଝରାଫୁଲଙ୍କ ମୃତଦେହକୁ ଭୁବନେଶ୍ୱରରୁ ନେଇ ଯାଜପୁର କୁଆଖିଆ ନିକଟରେ ଝରାଫୁଲଙ୍କ ବୟଫ୍ରେଣ୍ଡ୍‌ ରାକେଶ ସ୍ୱାଇଁ ଓ ତାଙ୍କ ସହଯୋଗୀ ଫିଙ୍ଗିଥିଲେ। ସିସିଟିଭି ଫୁଟେଜରେ ଏହି ଦୃଶ୍ୟ କଏଦ ହୋଇଥିଲେ।

ଏସବୁ ଭିତରେ ଘଟଣାକୁ ସପ୍ତାହେ ବିତି ଗଲାଣି। ହେଲେ କେମିତି ହେଲା ଝରାଫୁଲଙ୍କ ମୃତ୍ୟୁ  ସେନେଇ ପୋଲିସ୍‌ ଗୁମର ଖୋଲିପାରିନି। ୩ ଦିନିଆ ରିମାଣ୍ଡରେ ଥିବା ରାକେଶକୁ ଯାଜପୁର ପୋଲିସ ମୃତଦେହ ମିଳିଥିବା ସ୍ଥାନକୁ ନେଇ ଛାନଭିନ୍ କରିଛି।

୨୬ ତାରିଖ ଦିନ ଗେଷ୍ଟ୍‌ ହାଉସ୍‌ରେ କଣ ଘଟିଥିଲା ? ସେଠାରେ ଝରାଫୁଲ ଅସୁସ୍ଥ ହୋଇଥିଲେ କି ? ଏଭଳି ବିଭିନ୍ନ ଦିଗକୁ ନେଇ ରାକେଶଙ୍କୁ ପୋଲିସ୍ ପଚରାଉଚରା କରୁଛି। ସେହିପରି ଲିଙ୍ଗରାଜ ଥାନା ଅଞ୍ଚଳରେ ଥିବା ଏକ ରେଷ୍ଟୁରାଣ୍ଟରେ ଖାଇବା ସମୟର ସିସିଟିଭି ଫୁଟେଜକୁ ଆଧାର କରି ମଧ୍ୟ ପୋଲିସ୍‌ ତଦନ୍ତ କରୁଛି।