15-Dec-2025

"ତିନି ଦଶକ ପରେ ମଧ୍ୟ ସେଇ ମଜା,ସେଇ ବନ୍ଧୁତ୍ୱ"

ବଲାଙ୍ଗୀର(ପ୍ରେରଣା ଖବର): :ଦୀର୍ଘ ତିନି ଦଶକ ପରେ ପିପି ଏକାଡେମୀ ର ୧୯୯୩ ମ୍ୟାଟ୍ରିକ ବ୍ୟାଚ ର ଛାତ୍ରମାନଙ୍କୁ ନେଇ ଏକ ବନ୍ଧୁମିଳନ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା।ରାଜ୍ୟର ବିଭିନ୍ନ ଜିଲ୍ଲା ସହିତ ଦେଶର ଅନ୍ୟାନ୍ୟ ସ୍ଥାନରୁ ଆସିଥିବା ପୁରାତନ ଛାତ୍ରମାନେ ଏହି ବନ୍ଧୁମିଳନ କାର୍ଯ୍ୟକ୍ରମରେ ଯୋଗଦେଇ ତାଙ୍କର ପୁରୁଣା ଦିନର ସ୍ମୃତିକୁ ପୁନର୍ଜୀବନ ଦେଇଥିଲେ।ଦୀପ ପ୍ରଜ୍ଜଳନ ଓ ସରସ୍ବତୀ ବନ୍ଦନା ସହ କାର୍ଯ୍ୟକ୍ରମ ଆରମ୍ଭ ହୋଇଥିଲା।ଆୟୋଜନ କମିଟିର ସଦସ୍ୟମାନେ ଉପସ୍ଥିତ ସମସ୍ତ ବନ୍ଧୁ ମାନଙ୍କୁ ସ୍ୱାଗତ କରି ଏହି ବନ୍ଧୁମିଳନ ର ଉଦ୍ଦେଶ୍ୟ ଉପରେ ଆଲୋକପାତ କରିଥିଲେ।ଏହାପରେ ୧୯୯୩ ମ୍ୟାଟ୍ରିକ ବ୍ୟାଚ ର ସମସ୍ତ ଦିବଂଗତ ବନ୍ଧୁମାନଙ୍କୁ ଗଭୀର ଶ୍ରଦ୍ଧାଞ୍ଜଳି ଦେବାସହ ସେମାନଙ୍କ ସହ ବିତେଇଥିବା ମୁହୂର୍ତ୍ତ,ନିର୍ମଳ ବନ୍ଧୁତ୍ୱ ଓ ଅଭୁଲା ସ୍ମୃତି କୁ ମନେପକାଇ ତାଙ୍କର ଆତ୍ମା କୁ ଶାନ୍ତି ଓ ସଦଗତି ପ୍ରଦାନ କରିବା ସହ ଶୋକାକୁଳ ପରିବାର ବର୍ଗକୁ ଏହି ଅପାର ଦୁଃଖ ସହିବାର ଶକ୍ତି ପ୍ରଦାନ କରନ୍ତୁ ବୋଲି ସମସ୍ତେ ଭଗବାନ ଙ୍କ ନିକଟରେ ପ୍ରାର୍ଥନା କରିଥିଲେ।ଏହି ବନ୍ଧୁ ମିଳନର ମୁଖ୍ୟ ଆକର୍ଷଣ ଥିଲା ସ୍ମୃତିଚାରଣ ପର୍ବ।ଏହି ଅବସରରେ ଅନେକ ପୁରାତନ ଛାତ୍ର ମଞ୍ଚକୁ ଆସି ତାଙ୍କର ଶିକ୍ଷା ଜୀବନର ମଜାଦାର ଘଟଣା,ପୁରୁଣା କ୍ଲାସ ରୁମ,ପ୍ରାର୍ଥନା ସଭା,ଶିକ୍ଷକ ମାନଙ୍କ କଠୋରତା ଭିତରେ ଲୁଚିଥିବା ସ୍ନେହର କଥା,ବନ୍ଧୁତ୍ୱ ର ଗଭୀରତା ଓ ସେ ଦିନର ଅଭୁଲା ସ୍ମୃତି କୁ ସମସ୍ତଙ୍କ ସହ ଭାବ ବିନିମୟ କରିଥିଲେ।ଏହି ଅନୁଭବ ଗୁଡିକ ସମଗ୍ର ପରିବେଶକୁ ଭାବପ୍ଲୁତ କରିଦେଇଥିଲା।ଏହି ଅବସରରେ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା।ପୁରାତନ ଛାତ୍ରମାନଙ୍କ ଦ୍ୱାରା ପ୍ରସ୍ତୁତ ଓଡ଼ିଆ ଓ ହିନ୍ଦୀ ଭଜନ,ଗୀତ ଓ କବିତା ପାଠ ପରିବେଷଣ ହୋଇଥିଲା।ଏହି ବନ୍ଧୁମିଳନ କାର୍ଯ୍ୟକ୍ରମ କେବଳ ସ୍ମୃତିଚାରଣ ରେ ସୀମିତ ରହିନଥିଲା; ସମାଜ ପ୍ରତି ଦାୟିତ୍ୱ ବୋଧ ମଧ୍ୟ ଏହାର ଏକ ମୁଖ୍ୟ ଅଂଶ ଥିଲା।ଏହି ଅବସରରେ ପିପି ଏକାଡେମୀ ର ଉନ୍ନତି ପାଇଁ କିଛି ଶିକ୍ଷାମୂଳକ ସହଯୋଗ ଦେବା ସହ ଆଗାମୀ ଦିନରେ ଗରିବ ଓ ମେଧାବୀ ଛାତ୍ର ମାନଙ୍କୁ ସହାୟତା ପ୍ରଦାନ କରିବା ନିମିତ୍ତ ଏକ ସାମୂହିକ ସଂକଳ୍ପ ଗ୍ରହଣ କରାଯାଇଥିଲା।ଦୀର୍ଘ ସମୟର ବ୍ୟବଧାନ ପରେ ମିଳିଥିବା ଏହି ବନ୍ଧୁମିଳନ ରେ ପ୍ରତ୍ୟେକ ମୁହଁରେ ଅପାର ଆନନ୍ଦ ଓ ଆତ୍ମୀୟତା ଭାବ ଦେଖାଯାଉଥିଲା।କେତେଜଣ ବନ୍ଧୁ ଡାକ୍ତର,ଇଞ୍ଜିନିୟର,ଶିକ୍ଷକ ତ କେତେଜଣ ବନ୍ଧୁ ସଫଳ ବ୍ୟବସାୟୀ ହୋଇଥିଲେ ମଧ୍ୟ ଏହି ବନ୍ଧୁମିଳନ କାର୍ଯ୍ୟକ୍ରମରେ ସମସ୍ତେ ପୁନର୍ବାର ୧୯୯୩ ମସିହାର ସେଇ ନିର୍ମଳ ଛାତ୍ର ଜୀବନକୁ ଫେରିଯାଇଥିଲେ।ପିପି ଏକାଡେମୀ କେବଳ ପାଠ ନୁହେଁ, ଜୀବନର ମୂଲ୍ୟବୋଧ,ଶୃଙ୍ଖଳା, ଦେଶପ୍ରେମ ଓ ମାନବିକତାର ଶିକ୍ଷା ଦେବା ସହ ଆଜି ଜୀବନର ବିଭିନ୍ନ କ୍ଷେତ୍ରରେ ସଫଳ କରିଥିବା ଯୋଗୁଁ  ସମସ୍ତ ପୁରାତନ ଛାତ୍ର ପିପି ଏକାଡେମୀ ପ୍ରତି କୃତଜ୍ଞତା ଜ୍ଞାପନ କରିଥିଲେ।