21-Aug-2025

(ସୁଦାମ ଦୀପ)
 ଗୁରୁବାର ଦିନ ବରପାଲି ମହାବିଦ୍ୟାଳୟର ଓଡ଼ିଆ ଭାଷା ଓ ସାହିତ୍ୟ ବିଭାଗ ତରଫରୁ ନବାଗତ ଛାତ୍ରଛାତ୍ରୀଙ୍କ ପାଇଁ ସ୍ଵାଗତ ସମ୍ବର୍ଦ୍ଧନା ଜ୍ଞାପନ କରାଯାଇଥିଲା । ଏଥିରେ ମୁଖ୍ୟ ଅତିଥି ଭାବରେ ସୁଶ୍ରୀ ଜୟନ୍ତୀ ଦାଶ ଯୋଗ ଦେଇଥିବାବେଳେ ସଭାପତିତ୍ଵ କରିଥିଲେ ବିଭାଗ ମୁଖ୍ୟ ଅଧ୍ୟାପକ ଉତ୍ତର କୁମାର ଗଡ଼ତିଆ । ଅତିଥିଙ୍କଦ୍ବାରା ଦୀପ ପ୍ରଜ୍ଜ୍ଵଳନ ପରେ ସ୍ୱାଗତ ସଙ୍ଗୀତ ଗାନ କରିଥିଲେ ପ୍ରତୀକ୍ଷା , ରୋଜି, ସସ୍ମିତା,ଲୁକେଶ୍ଵରୀ ଆଦି ଛାତ୍ରୀମାନେ । ପ୍ରଥମେ ନବାଗତ ଛାତ୍ରଛାତ୍ରୀମାନଙ୍କୁ ସ୍ୱାଗତ କରାଯାଇଥିଲା । ସେମାନେ ମଞ୍ଚକୁ ଆସି ନିଜନିଜ ପରିଚୟ ଦେବା ସହ ସେମାନଙ୍କ ରୁଚି ଓ ଲକ୍ଷ୍ୟ ସଂପର୍କରେ ସୂଚନା ପ୍ରଦାନ କରିଥିଲେ । ଏହାପରେ ଦ୍ଵିତୀୟ ଓ ତୃତୀୟ ବର୍ଷର ଛାତ୍ରଛାତ୍ରୀମାନେ ନବାଗତ ଭାଇଭଉଣୀମାନଙ୍କ ଉଦ୍ଦେଶ୍ୟରେ ନିଜନିଜ ବକ୍ତବ୍ୟ ରଖିଥିଲେ ଏବଂ ପ୍ରଥମ ବର୍ଷର ଛାତ୍ରଛାତ୍ରୀଗଣ ସମ୍ବର୍ଦ୍ଧନାର ଉତ୍ତର ରଖିଥିଲେ । ସଭାପତିତ୍ୱ ଅଭିଭାଷଣରେ ଉତ୍ତର କୁମାର ଗଡ଼ତିଆ ଓଡ଼ିଆ ବିଭାଗର ନୀତି ନିୟମ ଓ ଶୃଙ୍ଖଳା ସଂପର୍କରେ ଛାତ୍ରଛାତ୍ରୀଙ୍କୁ ଅବଗତ କରାଇଥିଲେ । ତାପରେ ବିଭାଗର ଅଧ୍ୟାପିକା ଡ. ସମ୍ବିତା ପ୍ରଧାନ, ଅଧ୍ୟାପକ ଅରୁଣ କୁମାର ବାରିକ ଏବଂ ଡ. ବିଶ୍ଵନାଥ ସାହୁ ନିଜର ଅଭିଭାଷଣ ରଖିଥିଲେ । ଏ ଅବସରରେ ବିଭାଗର ପାଠଚକ୍ର ସଂପାଦକ, ସହ-ସଂପାଦକ ଏବଂ କୋଷାଧ୍ୟକ୍ଷ ଚୟନ କରାଯାଇଥିଲା । ଛାତ୍ରୀ ତପସ୍ଵିନୀ ଷଡ଼ଙ୍ଗୀ ସଂଯୋଜନା କରିଥିବାବେଳେ ଛାତ୍ରୀ ଅନୁପମା ପଧାନ ଧନ୍ୟବାଦ ଅର୍ପଣ କରିଥିଲେ।