21-Aug-2025

ବିନିକା(ହିମାଂଶୁ ଶେଖର ପୁଟେଲ)ବିନିକା ସ୍ଥିତ ସିଦ୍ଧାର୍ଥ ଡିଗ୍ରୀ କଲେଜର ସ୍ଥାୟୀ ସହବନ୍ଧନ ସକାଶେ ଶିକ୍ଷା ବିଭାଗ ଉଚ୍ଚ କର୍ତୃପକ୍ଷଙ୍କ ତରଫରୁ ମିଳିତ  ପରିଦର୍ଶନ କରାଯାଇଛି।ଏହି ପରିପ୍ରେକ୍ଷୀରେ ବଲାଙ୍ଗିର ରାଜେନ୍ଦ୍ର ବିଶ୍ଵ ବିଦ୍ୟାଳୟର ମହାବିଦ୍ୟାଳୟ ବିକାଶ ପରିଷଦ ଅଧ୍ୟକ୍ଷ ପ୍ରଫେସର ବିଘ୍ନେଶ ପ୍ରସାଦ ମିଶ୍ର ଏବଂ ସମ୍ବଲପୁର ଆଞ୍ଚଳିକ ଉଚ୍ଚଶିକ୍ଷା ନିର୍ଦ୍ଦେଶାଳୟ ଆଞ୍ଚଳିକ ନିର୍ଦ୍ଦେଶକ ଡ଼ ଉମା ଶଙ୍କର ଦାଶ ମିଳିତ ଭାବେ ବିନିକା ସିଦ୍ଧାର୍ଥ ଡିଗ୍ରୀ କଲେଜ ପରିଦର୍ଶନରେ ଆସି ଏହାର ଭିତ୍ତିଭୂମି,ଆବଶ୍ୟକୀୟ କାଗଜପତ୍ର ତଦାରକ କରି ସନ୍ତୋଷ ପ୍ରକଟ କରିଥିଲେ । ଯାହା ଫଳରେ ସ୍ଥାୟୀ ସହବନ୍ଧନ କ୍ଷେତ୍ରରେ ଅଟକି ରହୁଥିବା ଡିଗ୍ରୀ କଲେଜର ଦୀର୍ଘ ବର୍ଷର ସ୍ବପ୍ନ ଆଗାମୀ ଦିନରେ ନିଶ୍ଚିତ ସାକାର ହେବ ବୋଲି ବିଶ୍ୱାସ ରହିଥିବାରୁ ଅଞ୍ଚଳର ଶିକ୍ଷାପ୍ରେମୀ ତଥା ଛାତ୍ରଛାତ୍ରୀ ମହଲରେ ଖୁସିର ଲହରୀ ଖେଳିଯାଇଛି।ଏହି ପରିଦର୍ଶନରେ ଅନୁଷ୍ଠାନର ସମସ୍ତ ନିୟମ ଓ ନିୟମାବଳୀକୁ ପାଳନ କରୁଥିବା ଦେଖି କଲେଜ ଅଧ୍ୟକ୍ଷ ଡ଼ ଧୀରେନ୍ଦ୍ର କୁମାର ନାୟକଙ୍କ ସହ କାର୍ଯ୍ୟରତ ସମସ୍ତ ଅଧ୍ୟାପକ, ଅଧ୍ୟାପିକା ତଥା କର୍ମଚାରୀ ମାନଙ୍କୁ ଶିକ୍ଷା ବିଭାଗ ଉଚ୍ଚ କର୍ତୃପକ୍ଷ ପ୍ରଶଂସା କରିଥିଲେ।