10-Aug-2025

ମାଲକାନଗିରି(କେଶବ ଚନ୍ଦ୍ର ନାୟକ): ମାଲକାନଗିରି ଜିଲ୍ଲା ମାଥିଲି ବ୍ଳକ ଅନ୍ତର୍ଗତ ଟେମୃପାଲ୍ଲୀ ପଞ୍ଚାୟତର ତୁଳସୀ ଗାଁ। ଗାଁର ଚତୁଃପାର୍ଶ୍ଵରେ ଘେରି ରହିଛି ପାହାଡ଼। ତୁଳସୀ ପାହାଡ଼ ଛତିଶଗଡ଼ ରାଜ୍ୟ ସୀମାକୁ ଲାଗିରହିଥିବା ଏହି ଅଞ୍ଚଳ ମାଓବାଦୀଙ୍କ ଗଡ଼ ଭାବେ ବେଶ୍ ପରିଚିତ। ତୁଳସୀ ଗାଁ ନିକଟରେ ଏକ ବିଏସଏଫ କ୍ୟାମ୍ପ ପ୍ରତିଷ୍ଠା ପର ଠାରୁ ଏହି ଅଞ୍ଚଳରେ ମାଓବାଦୀ ହିଂସାକାଣ୍ଡ ଯଥେଷ୍ଟ ହ୍ରାସ ପାଇଛି। ଆଖପାଖରେ ଗୁଡାଏ ଗାଁ ରହିଛି ଯେପରି ଦଲଦଲି,ଗୋଗାପଦର,କଟୁଆପଦର,ତୁଳସୀ, ମାଟିଗୁଡ଼ା,ଦଣ୍ଡିଆପଦର,କିରମିଟି ଆଦି ଗାଁ। ମାଓବାଦୀଙ୍କ ଆତଙ୍କ ଯୋଗୁଁ ବିକାଶ କଣ ଜାଣି ନାହାଁନ୍ତି, ଏଠାକାର ଆଦିମ ଜନଜାତି। ତେବେ ବର୍ତ୍ତମାନ ରାଜ୍ୟ ସରକାରଙ୍କ ଫୋକସ୍ ରେ ରହିଛି ଏହି ଅଞ୍ଚଳ। ଏଠାକାର ଲୋକଙ୍କୁ ମୌଳିକ ସୁବିଧା ଯୋଗାଇ ଦେବା ପାଇଁ ସରକାର ଆରମ୍ଭ କରିଛନ୍ତି ଯୋଜନା। ଦୁର୍ଗମ ଅଞ୍ଚଳ ସହ ଗମନାଗମନ ପାଇଁ ରାସ୍ତା ନଥିବାରୁ ଲୋକେ ବାହ୍ୟ ଜଗତରୁ ସମ୍ପୂର୍ଣ୍ଣ ବିଚ୍ଛିନ୍ନ ହୋଇ ରହିଛନ୍ତି। କୈାଣସି ଅଞ୍ଚଳରେ ବିକାଶ ପାଇଁ, ପ୍ରଥମେ ସେଠାରେ ରାସ୍ତାର ଆବଶ୍ୟକ ପଡ଼ିଥାଏ । ତୁଳସୀ ଅଞ୍ଚଳର ରେ ବିକାଶ ହେବ ବୋଲି ଏବେ ସରକାର ଉପଲବ୍ଧି କରିବା ପରେ ଆରମ୍ଭ ହୋଇଛି ତୁଳସୀ ପାହାଡ଼ ରାସ୍ତା ନିର୍ମାଣ କାର୍ଯ୍ଯ।ଆନ୍ଧ୍ରପ୍ରଦେଶର ହାଇଗ୍ରୀବା ଇନଫ୍ରଟେକ୍ ପ୍ରାଇଭେଟ୍ ଲିମିଟେଡ୍ ନାମକ ଠିକା ସଂସ୍ଥା ନିର୍ମାଣ କାର୍ଯ୍ୟ ହାତକୁ ନେଇଛି। ଜିଲ୍ଲା ଗ୍ରାମ୍ୟ ଉନ୍ନୟନ ସଂସ୍ଥା ପକ୍ଷରୁ ପ୍ରଥମେ ୨୦ କି.ମି ରାସ୍ତା ନିର୍ମାଣ ପାଇଁ ୧୬ କୋଟି ଟଙ୍କା ବ୍ୟୟ ଅଟକଳ କରାଯାଇଥିବା ବେଳେ ବର୍ତ୍ତମାନ ୩୩ କି.ମି ରାସ୍ତା ନିର୍ମାଣ ପାଇଁ ୩୯ କୋଟି ଟଙ୍କା ବ୍ୟୟ ଅଟକଳ ରହିଛି। ୩୩ କି.ମି ଦୈର୍ଘ୍ୟ ବିଶିଷ୍ଟ ରାସ୍ତା ମାଟିଗୁଡ଼ା ଠାରୁ ନିର୍ମାଣ ଆରମ୍ଭ ହୋଇ ଦଣ୍ଡିଆପଦର ଠାରେ ଶେଷ ହେବ। ଗତ ୨୦୨୩ ମସିହାରୁ ଠିକା ସଂସ୍ଥା ନିର୍ମାଣ କାର୍ଯ୍ୟ ହାତକୁ ନେଇଛି ।
ମାଓ ଅଧ୍ୟୁଷିତ ମାଲକାନଗିରିର ତୁଳସୀ ଘାଟିରେ ବେଆଇନ ପଥର ଖନନ ଚାଲିଥିବା ଅଭିଯୋଗ ହୋଇଛି । ମାଓଗଡକୁ ସୁଗମ କରିବାକୁ ରାସ୍ତା ନିର୍ମାଣ ନାଁରେ ଆନ୍ଧ୍ର ର ହାଇଗ୍ରିଭା ଷ୍ଟୋନ ଇନଫ୍ରାଟେକ ପ୍ରୋଜେକ୍ଟ ଲିମିଟେଡ କମ୍ପାନୀ ଷ୍ଟୋନ ମାଇନିଙ୍ଗ ଚଳାଇଛି । ଗତ ୨୭/୧୧/୨୦୨୪ ରେ ଜିଲ୍ଲାପାଳଙ୍କୁ ଏମ୍ ଏମ୍ ଏସ୍ ୱ।ଇ ଅଧୀନରେ ତୁଲସୀ-ମାଟିଗୁଡା-ଗୁଗାପାଦର-ଦଲ୍ ଦଲି  ପର୍ଯ୍ୟନ୍ତ ସଡକ ନିର୍ମାଣ ଲାଗି ଅସ୍ଥାୟୀ କ୍ରସର ସ୍ଥାପନ ନେଇ ଅନୁରୋଧ କରିଥିଲେ । ରେଫରେନ୍ସ-କାର୍ଯ୍ୟ କ୍ରମ ଚୁକ୍ତିନାମା ସଂଖ୍ୟା: ୦୫/ପି୧ ର ୨୦୨୨-୨୩ /ଏସ୍ ଇ ଅନୁଯାୟୀ ତୁଳସୀରେ ପ୍ରସ୍ତାବିତ କ୍ରଶର ୟୁନିଟ୍ ପାଇଁ କଞ୍ଚା ପଥର ସମ୍ବନ୍ଧୀୟ ସୂଚନା ଦାଖଲ କରିବାକୁ ମାଥିଲି ତହସିଲ ଚିଠି ସଂଖ୍ୟା-୭୫/XXVII-୭୧/୨୦୨୫ ତା -୦୬/୦୧/୨୦୨୫ ରେ ଉକ୍ତ ସଂସ୍ଥା କୁ ଚିଠି କରିଥିଲେ । ରାଜସ୍ୱ ବିଭାଗ ଅଧିନରେ ଥିବା ସରକାରୀ ଜମିରେ ଅସ୍ଥାୟୀ ୟୁନିଟ ବସାଇବାକୁ ନିର୍ଦ୍ଦେଶ ରହିଥିବା ବେଳେ ନିକଟସ୍ଥ ରିଜବ ଫରେଷ୍ଟ ଲ୍ୟାଣ୍ଡରେ ୟୁନିଟ ବସାଇ କାର୍ଯ୍ୟ ଆରମ୍ଭ କରାଯାଇଛି। ତୁଳସୀ ଘାଟିରେ କ୍ରସର ମାଇନିଂ ବେଆଇନ ଭାବେ ଚାଲିଥିବା ଅଭିଯୋଗ ପରେ ମାଥିଲି ତହସିଲଦାର, ଗୋବିନ୍ଦପାଲ୍ଲୀ ବନପାଳ  ପହଞ୍ଚି ତଦନ୍ତ କରି ଫେରିବା ପରେ ଆଜି ପୁଣି କୋରାପୁଟ ସ୍ଥିତ ରାଜ୍ୟ ପରିବେଶ ନିୟନ୍ତ୍ରଣର ରିଜିଓନାଲ ଅଫିସର ଓ ମାଲକାନଗିରି ମାଇନିଂ ଅଧିକାରୀ ଘଟଣା ସ୍ଥଳକୁ ଯାଇ ସ୍ଥିତି ପରଖି ଥିଲେ। ବେଆଇନ ଭାବେ କ୍ରସର ମାଇନିଂ କରିଥିବା ରାସ୍ତା ନିର୍ମାଣକାରୀ ଠିକା ସଂସ୍ଥା ବିରୋଧରେ କାର୍ୟ୍ୟାନୁଷ୍ଠନ ନିଆଯିବ ବୋଲି ଉଭୟ ଅଧିକାରୀ କହିଛନ୍ତି ।
(ରିପୋର୍ଟ: ବରିଷ୍ଠ ସାମ୍ବାଦିକ କେଶବ ଚନ୍ଦ୍ର ନାୟକ, ମାଲକାନଗିରି )