26-Dec-2024

କଣ୍ଟାମାଳ(ଜୟ କୁମାର ମହାରଣା): କାପେଲବେଡା ଅଙ୍ଗନବାଡି କେନ୍ଦ୍ର ନିର୍ମାଣକୁ ନେଇ ତେଜିଲା ଅସନ୍ତୋଷ  l   ଅଙ୍ଗନବାଡି କେନ୍ଦ୍ର ନିର୍ମାଣକୁ ନେଇ ଜିଲାପାଳଙ୍କୁ ଫେରାଦ ହେଲେ କାପେଲବେଡା ଗ୍ରାମବାସୀ l ସୂଚନା ପ୍ରକାରେ କଣ୍ଟାମାଳ ବ୍ଲକ ଖମନମୁଣ୍ଡା ପଞ୍ଚାୟତ ଅନ୍ତର୍ଗତ କାପେଲବେଡା ଗ୍ରାମରେ ଏକ ଅଙ୍ଗନବାଡି କେନ୍ଦ୍ର ନିର୍ମାଣ ପାଇଁ ଅନୁଦାନ ମଞ୍ଜୁର ହୋଇଛି l ଉକ୍ତ କେନ୍ଦ୍ରଟି ବିଦ୍ୟାଳୟ ପରିସରରେ ନିର୍ମାଣ ନିମନ୍ତେ ଗ୍ରାମବାସୀ ମନସ୍ତ କରିଥିଲେ l କିନ୍ତୁ କିଛି କୁଚକ୍ରୀ ବ୍ୟକ୍ତି ପୋଖରୀ ନିକଟରେ ଅଙ୍ଗନବାଡି କେନ୍ଦ୍ର ନିର୍ମାଣ ପାଇଁ ଯନ୍ତ୍ରୀ କିରଣ ମାଝୀଙ୍କୁ ଡାକି ଲେ-ଆଉଟ ଦେଇଛନ୍ତି l ପୋଖରୀ ନିକଟରେ କେନ୍ଦ୍ର ନିର୍ମାଣ ହେଲେ ଛୋଟ ଛୋଟ କୋମଳମତି ଶିଶୁଙ୍କ ପାଇଁ ବିପଦର ସମ୍ଭାବନା ରହିଥିବା ଆଶଙ୍କା କରି ଗ୍ରାମବାସୀ ପ୍ରତିବାଦ କରିବା ସହିତ ବିଦ୍ୟାଳୟ ପରିସରରେ ଉକ୍ତ କେନ୍ଦ୍ର ନିର୍ମାଣ କରିବାକୁ ଦାବି କରିଥିଲେ ହେଁ ଅଭିଯୋଗକାରୀଙ୍କ କଥାକୁ ଯନ୍ତ୍ରୀ ଗୁରୁତ୍ୱ ଦେଇ ନଥିବା ଅଭିଯୋଗ ହୋଇଛି l ଏନେଇ ନାରାୟଣ କାଲସେ, ଧୁବୁନି ରଣା, ତେଜରାଜ କୁଦେଇ, ଅହଲ୍ୟା ଦୀପ, ପ୍ରେମଶୀଳା ଧରୁଆ, ସରମିଲା ପୁଟା ସମେତ ୪୨ଜଣ ଗ୍ରାମବାସୀ ଜିଲାପାଳଙ୍କ ନିକଟରେ ଅଭିଯୋଗ କରିଛନ୍ତି l ଗ୍ରାମବାସୀଙ୍କ ଦାବି ପ୍ରତି ଜିଲା ପ୍ରଶାସନ ଦୃଷ୍ଟି ଦେବାକୁ ଦାବି ହେଉଛି l