09-Dec-2024

କୁଚିଣ୍ଡା: ରାଜ୍ୟ ସରକାରଙ୍କ ଗ୍ରାମ୍ୟ ଉନ୍ନୟନ,ପଞ୍ଚାୟତିରାଜ ଓ ପାନୀୟ ଜଳ ବିଭାଗ ମନ୍ତ୍ରୀ ରବି ନାରାୟଣ ନାଏକ ସୋମବାର ସମ୍ବଲପୁର ଜିଲ୍ଲା କୁଚିଣ୍ଡା ଉପଖଣ୍ଡର ବିଭିନ୍ନ ଧାନମଣ୍ଡି ପରିଦର୍ଶନ କରିଛନ୍ତି। ଚାଷୀ ତାର କଷ୍ଟୋପାର୍ଜିତ ଧାନର ମୂଲ୍ୟ କିପରି ୩୧ଟଙ୍କା ପାଇବାସହ ଧାନକ୍ରୟ କିଭଳି ବ୍ୟବସ୍ଥିତ ଢଙ୍ଗରେ ହୋଇପାରିବ ସରକାର ପ୍ରାଥମିକତା ଦେଉଛନ୍ତି। ଏଥିସହ ମଣ୍ଡି ଅବ୍ୟବସ୍ଥାର ସୁଧାର ଆଣିବାକୁ ଜିଲ୍ଲା ପ୍ରଶାସନକୁ ନିର୍ଦ୍ଦେଶ ଦେଇଛନ୍ତି। ମନ୍ତ୍ରୀ ନାଏକ ବାମରା ବ୍ଲକର ଗଡ଼ପୋଷ, ଉଚ୍ଚକାପାଟ, କୁଟାରିମାଲ,ମହୁଲପାଲି କୁଚିଣ୍ଡା ବ୍ଲକର ପାରୁଆଭାଡି, କୁନ୍ତରା,କୁସୁମୀ ଏବଂ ଜମନକିରା ବ୍ଲକର ଡିମିରିମୁଣ୍ଡା ଓ ଭୋଜପୁର ମଣ୍ଡି ପରିଦର୍ଶନ କରିଛନ୍ତି। ମନ୍ତ୍ରୀ ନାଏକ ମଣ୍ଡି ପରିଦର୍ଶନ ସମୟରେ ଚାଷୀ ଓ କ୍ରୟକାରୀ ସଂସ୍ଥାଙ୍କ ସହ ଆଲୋଚନା କରିଥିଲେ।ଏହାଛଡା ବାମରା ବ୍ଲକର ଉଚ୍ଚକାପାଟ,କୁଚିଣ୍ଡା ବ୍ଲକର କୁସୁମୀ ଏବଂ ଜମନକିରା ବ୍ଲକର ଡିମିରିମୁଣ୍ଡା ଓ ଭୋଜପୁର ଧାନକ୍ରୟ ପାଳି ନଥିଲେ ମଧ୍ୟ ସେ ନିଜେ ମଣ୍ଡି ଭିତ୍ତିଭୂମି ପରଖିଥିଲେ। କୁଚିଣ୍ଡା ଉପଖଣ୍ଡରେ ନଭେମ୍ବର ୨୭ରୁ ଧାନକ୍ରୟ ଆରମ୍ଭ ହୋଇଛି। ମଣ୍ଡି ଅବ୍ୟବସ୍ଥା ନେଇ ଚାଷୀମାନେ ଅଭିଯୋଗ କରିଥିଲେ।ମଣ୍ଡି ଅବ୍ୟବସ୍ଥା ସମ୍ପର୍କରେ ଖବରଦାତାଙ୍କ ପ୍ରଶ୍ନର ଉତ୍ତର ଦେଇ ମନ୍ତ୍ରୀ କହିଥିଲେ ଯେ,ମଣ୍ଡି ମାନଙ୍କରେ ଆବଶ୍ୟକୀୟ ଭିତ୍ତିଭୂମି ନଥିବା,କଟନିଛଟନି ଭଳି ସେ ଚାଷୀଙ୍କ ଠାରୁ ଅଭିଯୋଗ ପାଇଛି।ଏଥିରେ ସୁଧାର ଆଣିବା ସହ ସମସ୍ତ ଚାଷୀ କିଭଳି କେଜିପ୍ରତି ୩୧ଟଙ୍କା ପାଇବେ ପଦକ୍ଷେପ ନେବାକୁ ଜିଲ୍ଲା ପ୍ରଶାସନକୁ ନିର୍ଦ୍ଦେଶ ଦେଇଥିବା କହିଥିଲେ।ମନ୍ତ୍ରୀଙ୍କ ଧାନମଣ୍ଡି ପରିଦର୍ଶନ ସମୟରେ ସମ୍ବଲପୁର  ଜିଲ୍ଲାପାଳ ସିଦ୍ଧେଶ୍ବର ବଳିରାମ ବୋନ୍ଦର,ଜିଲ୍ଲା ଯୋଗାଣ ଅଧିକାରୀ ରାମଚନ୍ଦ୍ର ଟୁଡୁ,କୁଚିଣ୍ଡା ଉପଜିଲ୍ଲାପାଳ ଗୌରବମୟ ପ୍ରଧାନ,ଉପଖଣ୍ଡ ଯୋଗାଣ ଅଧିକାରୀ ରାଜକିଶୋର ସ୍ୱାଇଁ,ଆରଏମସି ସମ୍ପାଦକ କିଶୋର କୁମାର ନାଏକ,ବାମରା ବିଡିଓ ପୁଷ୍ପକ ପ୍ରଧାନ,ତହସିଲଦାର ଦିଲିପ ପ୍ରଧାନ,କୁଚିଣ୍ଡା ବିଡିଓ ଜୟନ୍ତ ସାହୁ,ତହସିଲଦାର ମିତାଲି ମଧୁମିତା ଦଳେଇ,ଅତିରିକ୍ତ ତହସିଲଦାର ଅନିମା ସୋରେଙ୍ଗ,ଆସିଷ୍ଟାଣ୍ଚ କଲେକ୍ଟର ଭାସ୍କର ଚନ୍ଦ୍ର ବେହେରା, କୁଚିଣ୍ଡା ବ୍ଲକ ଯୋଗାଣ ଅଧିକାରୀ ପ୍ରସନ୍ନ ଦେହୁରୀ, ନୋଡାଲ ଅଫିସର ତଥା ପାରୁଆଭାଡି ପଞ୍ଚାୟତ ପିଇଓ ଆଶା ପ୍ରଧାନଙ୍କ ସମେତ ଜିଲ୍ଲା ଓ ଉପଖଣ୍ଡର ବିଭିନ୍ନ ଅଧିକାରୀ ମାନେ ଉପସ୍ଥିତ ଥିଲେ।
ସମ୍ବଲପୁର କୁଚିଣ୍ଡାରୁ ସିଲୁ ସୁନାନୀ ଙ୍କ ରିପୋର୍ଟ