08-Jan-2021

ଭୁବନେଶ୍ୱର,, (ଶୁଭାଶିିଷ ନାୟକ) : କରୋନା କଟକଣା ଯୋଗୁଁ ଦୀର୍ଘ ନଅ  ମାସ ଧରି ବନ୍ଦ ପଡିଥିବା ସ୍କୁଲ ରେ ଆଜି ପିଲାଙ୍କ ପାଦ  ପଡିବ l ଏଠାରେ ଏସଓପି ମାନିବା ବାଧ୍ୟତାମୂଳକ କରାଯାଇ ଥିବା ଘୋଷଣା କରାଯାଇଛି ।ସେହି ପରି ପ୍ରତି ଶ୍ରେଣୀ ଗୃହରେ ୨୦ରୁ ୨୫ ଛାତ୍ରଛାତ୍ରୀ ପାଠ ପଢ଼ିବା ନେଇ ନିୟମ ଥିବାବେଳେ, ଏତେ କମ ସଂଖ୍ୟକ ଶିକ୍ଷକରେ କେମିତି ପଢିବେ ଛାତ୍ର ଛାତ୍ରୀ ତାକୁ ନେଇ ପ୍ରଶ୍ନ ଉଠିଛି।

କରୋନା ମହାମାରୀ ପାଇଁ ପ୍ରାୟ ୯ ମାସ ଧରି ସମସ୍ତ ସ୍କୁଲ ବନ୍ଦ ରହିବା ପରେ  ଆଜିଠୁ ସାରା ରାଜ୍ୟରେ ଖୋଲିବାକୁ ଯାଉଛି ସ୍କୁଲ । କେବଳ ଦଶମ ଏବଂ ଦ୍ୱାଦଶ ଶ୍ରେଣୀ ପାଇଁ କୋଭିଡ ଗାଇଡଲାଇନ୍ ଅନୁସାରେ ସ୍କୁଲ ଖୋଲିବାକୁ ରାଜ୍ୟସରକାର ନିଷ୍ପତି ନେଇଛନ୍ତି । ନିୟମ ମୁତାବକ ସ୍କୁଲ କର୍ତ୍ତୃପକ୍ଷ, ଛାତ୍ରାଛାତ୍ରୀ, ଅଭିଭାବକ ସମସ୍ତେ ଧାର୍ଯ୍ୟ ଏସଓପି(SOP) ମାନିବା ବାଧ୍ୟତାମୂଳକ ।

ସ୍କୁଲ ଖୋଲିବା ପୂର୍ବରୁ ସରକାରଙ୍କ ଗାଇଡଲାଇନ ମୁତାବକ ପ୍ରସ୍ତୁତି ଆରମ୍ଭ ହୋଇଯାଇଛି । ରାଜ୍ୟରେ କଣ୍ଟେନମେଣ୍ଟ ଯୋନରେ ନଥିବା ସ୍କୁଲ ଗୁଡିକ ଖୋଲିବାକୁ ଅନୁମତି  ମିଳିଛି । ଏପରିକି କଣ୍ଟେନମେଣ୍ଟ ଜୋନରୁ କୌଣସି ଶିକ୍ଷକ ଓ ପିଲା ସ୍କୁଲ ଆସିପାରିବେ ମଧ୍ୟ ନାହିଁ । ସ୍କୁଲ ଖୋଲିବା ପୂର୍ବରୁ ଆସବାବପତ୍ର, ଲାଇବ୍ରେରୀ ଇତ୍ୟାଦି ସାନିଟାଇଜ କରାଯିବ । ପାଇଖାନା ଓ ପାନୀୟ ଜଳ ବ୍ୟବସ୍ଥା ନଥିବା ସ୍କୁଲ ଖୋଲାଯାଇ ପାରିବନି । ସ୍କୁଲ ବସ୍ ବଦଳରେ ଅଭିଭାବକ ପିଲାଙ୍କୁ ନିଜେ ଛାଡ଼ିବାକୁ ପରାମର୍ଶ ଦିଆଯାଇଛି । କୌଣସି ପିଲାଙ୍କୁ ସ୍କୁଲକୁ ଆସିବା ବାଧ୍ୟତା ମୂଳକ ମଧ୍ୟ ନୁହଁ । ଏହାସହ କ୍ଲାସରୁମ୍, ଲାଇବ୍ରେରୀ, ଶୌଚାଳୟକୁ ସାନିଟାଇଜ କରାଯାଇ ଛାତ୍ରୀ-ଛାତ୍ରଙ୍କ ପାଇଁ ପ୍ରସ୍ତୁତ କରାଯାଇଥିବା ସୂଚନା ମିଳିଛି ।

କିନ୍ତୁ ସବୁଠୁ ବଡ଼ ପ୍ରଶ୍ନ ଉଠାଇଛି ଓଷ୍ଟା(OSTA) । ଗାଇଡଲାଇନ ଅନୁସାରେ ପ୍ରତି ଶ୍ରେଣୀ ଗୃହରେ ୨୦ରୁ ୨୫ ଛାତ୍ରଛାତ୍ରୀ ପାଠ ପଢ଼ିବା ନେଇ ନିୟମ ରହିଛି । ୧୦୦ରୁ ଊର୍ଦ୍ଧ୍ୱ ପିଲା ଥିଲେ ୪ କିମ୍ବା ୫ଟି ଶ୍ରେଣୀ ଗୃହରେ ପଢ଼ାଇବାକୁ ପଡ଼ିବ। ରାଜ୍ୟରେ ଶିକ୍ଷକ ଅଭାବ ଥିବା ବେଳେ ଏହା କେମିତି ସମ୍ଭବ ହେବ ବୋଲି ଓଷ୍ଟା ପ୍ରଶ୍ନ କରିଛି । ବର୍ତ୍ତମାନ ରାଜ୍ୟରେ ଜଣେ ଜଣେ ଶିକ୍ଷକରେ ଅନେକ ସ୍କୁଲ ଚାଲିଛି । ଅନେକ ସ୍କୁଲରେ ଗଣିତ, ବିଜ୍ଞାନ ଓ ଇଂରାଜୀ ଶିକ୍ଷକ ମଧ୍ୟ ନାହାନ୍ତି । ତେଣୁ ତୁରନ୍ତ ଶିକ୍ଷକ ପଦବୀ ପୂରଣ କରିବା, ନଚେତ ଅଭାବ ପୂରଣ ପାଇଁ ଅବସରପ୍ରାପ୍ତ ଶିକ୍ଷକଙ୍କୁ ନିଯୁକ୍ତି ଦେବା ପାଇଁ ଓଷ୍ଟା ପରାମର୍ଶ ଦେଇଛି । ଏହାସହ ରବିବାରକୁ ଶିକ୍ଷାଦାନରୁ ମୁକ୍ତ ରଖିବାକୁ ନିବେଦନ ମଧ୍ୟ କରାଯାଇଛି ସଙ୍ଗଠନ ପକ୍ଷରୁ ।

ମାଧ୍ୟମିକ ଶିକ୍ଷା ବୋର୍ଡ ପରୀକ୍ଷା ଦେବା ପାଇଁ ଦଶମ ଶ୍ରେଣୀ ଛାତ୍ରଛାତ୍ରୀମାନଙ୍କ ନିମନ୍ତେ ଜାନୁଆରୀ ୮ ତାରିଖରୁ ଅପ୍ରେଲ ୨୬ ତାରିଖ ଓ ଉଚ୍ଚ ମାଧ୍ୟମିକ ଶିକ୍ଷା ପରିଷଦର ପରୀକ୍ଷା ଦେବା ପାଇଁ ଦ୍ୱାଦଶ ଶ୍ରେଣୀର ଛାତ୍ରଛାତ୍ରୀମାନଙ୍କ ପାଇଁ ଜାନୁଆରୀ ୮ରୁ ଏପ୍ରିଲ ୨୮ ପର୍ଯ୍ୟନ୍ତ କ୍ଲାସ ଚାଲିବା ନେଇ ଘୋଷଣା କରାଯାଇଛି । ସେହିପାରିଭାବେ ସ୍କୁଲ ଖୋଲିବାର ୨ ଦିନ ପରେ ଅର୍ଥାତ ଆସନ୍ତା ୧୦ ରୁ ୨୮ ତାରିଖରୁ ମାଟ୍ରିକ ପରୀକ୍ଷା ଲାଗି ଫର୍ମ ପୂରଣ ଆରମ୍ଭ ହୋବ ବୋଲି ମାଧ୍ୟମିକ ଶିକ୍ଷା ପରିଷଦ ପକ୍ଷରୁ ପ୍ରକାଶିତ ବିଜ୍ଞପ୍ତିରେ କୁହାଯାଇଛି । ଏହାସହ ଫର୍ମ ପାଇଁ ଫିସ୍ ଦାଖଲର ଶେଷ ଦିନ ଭାବେ ଜାନୁଆରି ୨୭କୁ ରଖାଯାଇଛି ।

ଦଶମ ଶ୍ରେଣୀର ବୋର୍ଡ ପରୀକ୍ଷା ମେ ୩ ତାରିଖରୁ ମେ ୧୫ ତାରିଖ ପର୍ଯ୍ୟନ୍ତ ଓ ଦ୍ୱାଦଶ ଶ୍ରେଣୀ ପରୀକ୍ଷା ମେ ୧୫ରୁ ଜୁନ‍୍‌ ୧୧ ତାରିଖ ପର୍ଯ୍ୟନ୍ତ ଅନୁଷ୍ଠିତ ହେବ । ସେହିପରିଭାବେ, ଦଶମ ଶ୍ରେଣୀ ପିଲାମାନଙ୍କର ପ୍ରାକ୍ଟିକାଲ‍୍‌ ପରୀକ୍ଷା ଏପ୍ରିଲ ୨୭ରୁ ମେ ୨ ତାରିଖ ଓ ଦ୍ୱାଦଶ ଶ୍ରେଣୀ ଛାତ୍ରଛାତ୍ରୀଙ୍କ ପାଇଁ ଏପ୍ରିଲ ୨୯ରୁ ମେ ୧୪ ତାରିଖ ପର୍ଯ୍ୟନ୍ତ ହେବା ନେଇ ନିର୍ଦେଶନାମା ଜାରୀ କରାଯାଇଛି ।