02-Nov-2024

ବରଗଡ଼:(ନିରଞ୍ଜନ ତ୍ରିପାଠୀ)- ବରଗଡ଼ ଜିଲ୍ଲା ବିଜେପୁର ବ୍ଲକ୍ ଅନ୍ତର୍ଗତ ତାଳପଦର ଗ୍ରାମର ସୁନା ପୁଅ ଜିତେନ୍ଦ୍ର ସେଠ ତିନୋଟି ଭାଷାରେ ସର୍ବାଧିକ ଗୀତ ରଚନା କରି ଇଣ୍ଡିଆ ବୁକ୍ ଅଫ୍ ରେକର୍ଡ଼ ରେ ସ୍ଥାନ ପାଇଛନ୍ତି । ତୁଳସୀ ଦୁଇ ପତ୍ରରୁ ବସିଲା ପରି ପିଲାଟି ଦିନରୁ କଳା ପ୍ରତି ତାଙ୍କର ଦୁର୍ବଳତା ଆଜି ତାଙ୍କୁ ଶୀର୍ଷ ସ୍ଥାନରେ ପହଞ୍ଚାଇ ପାରିଛି । ଦଶମ ଶ୍ରେଣୀ ପାଠପଢ଼ା ପରେ ପରେ ସେ ସର୍ବ ପ୍ରଥମେ କବିତା ଓ କ୍ଷୁଦ୍ର ନାଟକ ସବୁ ଲେଖିବା ଆରମ୍ଭ କରି ପରବର୍ତ୍ତୀ ସମୟରେ ଆକାଶବାଣୀ, ସମ୍ବଲପୁରର ଯୁବବାଣୀ କାର୍ଯ୍ୟକ୍ରମ, ସମ୍ବଲପୁରୀ କମେଡ଼ି, ଆଲବମ ଗୀତ ଓ ପରେ ପରେ ଓଡ଼ିଆ ସିନେମା ଜଗତରେ କାମ କରିବା ପାଇଁ ସୁଯୋଗ ପାଇଥିଲେ । ଏ ପର୍ଯ୍ୟନ୍ତ ସେ ଅନେକ ଗୁଡ଼ିଏ ନାଟକ, ୫୦୦୦ ରୁ ଅଧିକ କବିତା, ଦୁଇ ହଜାର ରୁ ଅଧିକ ଗୀତ, ଛଅ ଟି ଓଡ଼ିଆ ସିନେମାରେ କାମ କରି ନିଜର ଲେଖନୀ ମୁନରେ ଉତ୍କୃଷ୍ଟ କଳାର ନିଦର୍ଶନ ଦେଖାଇ ଲୋକଙ୍କ ମନୋରଞ୍ଜନ କରି ଆସୁଛନ୍ତି । ଶ୍ରୀମାନ୍ ଜିତେନ୍ଦ୍ର ବର୍ତ୍ତମାନ କେନ୍ଦ୍ରପଡ଼ା ଜିଲ୍ଲା ଦଧିବାମନଜୀଉ ବିଦ୍ୟାପୀଠ, ଦେସାହି ଠାରେ ସଂସ୍କୃତ ଶିକ୍ଷକ ଭାବରେ କାର୍ଯ୍ୟରତ । ତାଙ୍କର ସମସ୍ତ ସଫଳତା ପଛରେ ତାଙ୍କ ପିତାମାତା, ଗୁରୁଜନ ଓ ମହାପ୍ରଭୁ ଶ୍ରୀ ଜଗନ୍ନାଥଙ୍କ ବିଶେଷ ଆଶୀର୍ବାଦ ଅଛି ବୋଲି ସେ କୁହନ୍ତି । ତାଙ୍କର ଏହି ସଫଳତାକୁ ନେଇ ପରିବାର ସମେତ ସାରା ଓଡ଼ିଶାର ସମସ୍ତ କଳାପ୍ରେମୀ ବନ୍ଧୁ ଓ ଗୁରୁ ଗୁରୁଜନ ସମସ୍ତେ ତାଙ୍କୁ କୃତଜ୍ଞତା ଜଣାଇଛନ୍ତି ।