25-Oct-2024

ବଲାଙ୍ଗୀର(ପ୍ରେରଣା ଖବର):  ୟୁନିସେଫ୍ ଏବଂ ଜିଲ୍ଲା ସାମାଜିକ କଲ୍ୟାଣ ବିଭାଗ(ଡିଏସଡବ୍ଲୁ) ମିଳିତ ଭାବରେ ଅପପୁଷ୍ଟିର ମୁକାବିଲା ପାଇଁ ବଲାଙ୍ଗୀରରେ ଏକ ମିଡିଆ ରାଉଣ୍ଡ ଟେବୁଲ୍ ର ଆୟୋଜନ କରାଯାଇଥିଲା । ଏହି ରାଉଣ୍ଡ ଟେବୁଲ୍ରେ ବଲାଙ୍ଗୀର ଅଞ୍ଚଳରେ ଅତିଶୟ ଅପପୃଷ୍ଟି (ସାମ୍-ଏସ୍ଏଏମ୍)ର ସମାଧାନ ଉପରେ  ଗୁରୁତ୍ୱାରୋପ କରାଯାଇଥିଲା ଏବଂ  ଅସୁରକ୍ଷିତ ଜନସାଧାରଣଙ୍କ ପାଇଁ ସଚେତନତା ସୃଷ୍ଟି ପ୍ରୋଜେକ୍ଟ୍ ର ଫଳାଫଳକୁ ଉନ୍ନତ କରିବା ପାଇଁ ବିଭିନ୍ନ କ୍ଷେତ୍ରର ସହଯୋଗ ଏବଂ ଗଣମାଧ୍ୟମର ଗୁରୁତ୍ୱପୂର୍ଣ୍ଣ ଭୂମିକା ବିଷୟରେ ଆଲୋକପାତ କରାଯାଇଥିଲା ।

  ବଲାଙ୍ଗୀର ଜିଲ୍ଲା ସାମାଜିକ କଲ୍ୟାଣ ଅଧିକାରୀ (ଡିଏସଡବ୍ଲୁ) ଶ୍ରୀମତି ସୁଷମା ମହାପାତ୍ର, ଅପପୃଷ୍ଟି ମୁକାବିଲା ପାଇଁ ଜିଲ୍ଲାରେ ଦେଖାଦେଇଥିବା ସମସ୍ୟା ଏବଂ ପ୍ରଭାବଶାଳୀ ସାମ୍-ଏସ୍ଏଏମ୍ ପରିଚାଳନା ପାଇଁ ଏହି ଅଞ୍ଚଳର ଆବଶ୍ୟକତା ଉପରେ ଗୁରୁତ୍ୱାରୋପ କରିଥିଲେ । ଶିଶୁ ଓ ମା’ମାନଙ୍କୁ ଜରୁରୀ ପୋଷଣ ସେବା ଯୋଗାଇବାରେ ଅଙ୍ଗନବାଡି କର୍ମୀ ଏବଂ ସ୍ଥାନୀୟ ସ୍ୱାସ୍ଥ୍ୟ କେନ୍ଦ୍ରର ଗୁରୁତ୍ୱପୂର୍ଣ୍ଣ ଭୂମିକା ବିଷୟରେ କହିିଥିଲେ, “ଅପପୃଷ୍ଟି ଏକ ଚିନ୍ତାର  ବିଷୟ ହୋଇ ରହିଛି । କିନ୍ତୁ ଆମ ଦକ୍ଷତା ଉପରେ ଆମର ବିଶ୍ୱାସ ଅଛି ଯେ ସ୍ଥାନୀୟ ସଂଗଠନ, ସ୍ୱାସ୍ଥ୍ୟ କର୍ମୀ ଏବଂ ଅନ୍ୟାନ୍ୟ ହିତାଧିକାରୀଙ୍କ ସହଯୋଗରେ ଗୁରୁତ୍ୱପୂର୍ଣ୍ଣ ଅଗ୍ରଗତି କରିପାରିବା । ଏହି ସମସ୍ୟାଗୁଡିକର ସମାଧାନ ପାଇଁ ସମ୍ପ୍ରଦାୟର ଯୋଗଦାନ ପ୍ରମୁଖ ଭୂମିକା ଗ୍ରହଣ କରେ, ଏବଂ ତୃଣମୂଳ ସ୍ତରର ପ୍ରୟାସକୁ ମଜବୁତ କରିବାକୁ ଆମେ ସଂକଳ୍ପବଦ୍ଧ ବୋଲି ସେ କହିଥିଲେ”

ୟୁନିସେଫ୍ ପୋଷଣ ବିଶେଷଜ୍ଞ ସୌରଭ ଭଟ୍ଟାଚାର୍ଯ୍ୟ, ଅପପୁଷ୍ଟି ଏବଂ ସାମ୍-ଏସ୍ଏଏମ୍ ପରିଚାଳନାର ସମୀକ୍ଷା କରି କହିଥିଲେ, “ବଲାଙ୍ଗୀରରେ ପାୟ ୪୦% ପିଲାଙ୍କର ବୟସ ଅନୁଯାୟୀ ଉଚ୍ଚତା କମ୍ ଏବଂ ୧୫% ପିଲାଙ୍କର ବୟସ ଅନୁଯାୟୀ ଓଜନ କମ୍ । ସ୍ୱାସ୍ଥ୍ୟ ସେବା, ପରିମଳ ଏବଂ ଶିକ୍ଷାକୁ ଅର୍ନ୍ତଭୁର୍କ୍ତ କରି ସାମ୍-ଏସ୍ଏଏମ୍ ପରିଚାଳନା ପାଇଁ ଏକ ସାମଗ୍ରିକ ଆଭିମୁଖ୍ୟ ଆବଶ୍ୟକ । ପ୍ରଭାବଶାଳୀ ସାମ୍-ଏସ୍ଏଏମ୍ ପରିଚାଳନା କେବଳ ଜୀବନ ରକ୍ଷା କରେ ନାହିଁ ବରଂ ପିଲାମାନଙ୍କ ଦୀର୍ଘସ୍ଥାୟୀ ସୁସ୍ଥତା ଏବଂ ଜ୍ଞାନର ବିକାଶରେ ମଧ୍ୟ ସହାୟକ ବୋଲି ସେ ମତ ପ୍ରଦାନ କରିଥିଲେ” । ସେ ଏହା ମଧ୍ୟ କହିଥିଲେ ଯେ, ସଚେତନତା ସୃଷ୍ଟି କରିବାରେ ଗଣମାଧ୍ୟମର ଭୂମିକା ଗୁରୁତ୍ୱପୂର୍ଣ୍ଣି, ଅପପୃଷ୍ଟିର ବ୍ୟାପକ ମୁକାବିଲା ପାଇଁ ଦାୟିତ୍ୱପୂର୍ଣ୍ଣ ଗଣମାଧ୍ୟମର କଭରେଜ୍ର ପ୍ରୟାସକୁ ପ୍ରୋତ୍ସାହିତ କରିବ । “ପିଲାମାନଙ୍କୁ ପ୍ରଭାବିତ କରୁଥିବା କାରଣଗୁଡିକୁ ଲୋକଲୋଚନକୁ ଆଣିବାରେ ଗଣମାଧ୍ୟମର ଶକ୍ତି ରହିଛି ବୋଲି ସେ କହିଥିଲେ” ।ବଲାଙ୍ଗୀରରେ ଅପପୃଷ୍ଟି ଓ ଶିଶୁ ସ୍ୱାସ୍ଥ୍ୟ ସମ୍ବନ୍ଧୀୟ ଆହ୍ୱାନର ସମାଧାନ କରିବା ପାଇଁ ବିସ୍ତୃତ ଆଲୋଚନା ଏବଂ ପ୍ରଶ୍ନ-ଉତ୍ତର ଅଧିବେଶନରେ ଅଂଶଗ୍ରହଣକାରୀମାନଙ୍କୁ ଅନ୍ତର୍ନିହିତ ମତ ଆଦାନ ପ୍ରଦାନ କରିବାର ସୁଯୋଗ ମଧ୍ୟ ପ୍ରଦାନ କରାଯାଇଥିଲା । ଗଣମାଧ୍ୟମ ପ୍ରତିନିଧିମାନେ ସଚେତନତା ବୃଦ୍ଧି ପାଇଁ ସହଯୋଗର ହାତ ବଢେଇବା ଗୁରୁତ୍ୱାରୋପ ସହିତ ସର୍ବସାଧାରଣଙ୍କ ଆଲୋଚନାରେ ସାମ୍-ଏସ୍ଏଏମ୍ କୁ ପ୍ରାଥମିକତା ଦେବା ପାଇଁ ଧ୍ୟାନ ବଜାୟ ରଖିବାକୁ ସଂକଳ୍ପ ନେଇଥିଲେ । ଗଣମାଧ୍ୟମ ରାଉଣ୍ଡ ଟେବୁଲ୍ ଭବିଷ୍ୟତର ପଦକ୍ଷେପ ପାଇଁ ଭିତ୍ତିପ୍ରସ୍ଥର ପ୍ରଦାନ କରଥିଲା, ଯାହାକି ବଲାଙ୍ଗୀରରେ ଶିଶୁ ଏବଂ ମା’ମାନଙ୍କ ନିକଟରେ ନିରନ୍ତର ଭାବରେ ସ୍ୱାସ୍ଥ୍ୟ କ୍ଷେତ୍ରରେ ଉତ୍ତମ ଫଳାଫଳ ଆଣିବାରେ ବହୁ କ୍ଷେତ୍ରର ଗୁରୁତ୍ୱର୍ଣ୍ଣ ଭାଗିଦାରିତା ଉପରେ ଗୁରୁତ୍ୱାରୋପ କରାଯାଇଥିଲା ।