16-Oct-2024

ବରଗଡ଼:(ନିରଞ୍ଜନ ତ୍ରିପାଠୀ)-ବରଗଡ ବନଖଣ୍ଡ ଭଟଲି ବନାଞ୍ଚଳ ଅନ୍ତର୍ଗତ ଲଖନପୁର ରାସ୍ତାରେ ଥିବା  ମୁଣ୍ଡ କଟି ଗ୍ରାମ ନିକଟରେ  ଗୋଟିଏ ଅଜଣା ଗାଡି ଧକ୍କାରେ କଲରାପତରିଆ ବାଘର ମୃତ୍ୟୁ ହୋଇଯାଇଛି । ପ୍ରାପ୍ତ ସୂଚନା ଅନୁଯାୟୀ ଗତକାଲି ମଙ୍ଗଳବାର ଦିନ ପ୍ରାୟ ସଂଧ୍ୟା ୬ଟା ସମୟରେ  ଗାଡି ଧକ୍କାରେ ଗୋଟିଏ ମାଈ କଲରାପତରିଆ ବାଘର ମୃତ୍ୟୁ ହୋଇଯାଇଥିଲା । ଖବର ପାଇ  ବରଗଡ ଆର୍ ଆର୍ ଟି ଦଳ ଘଟଣାସ୍ଥଳକୁ ସଙ୍ଗେ ସଙ୍ଗେ ଯାଇ ମୃତ ବାଘଟିକୁ ଜବତ କରି  ଭଟଲି ବନବିଭାଗ କାର୍ଯ୍ୟାଳୟକୁ ଅଣାଯାଇଥିଲା । ପରଦିନ ସକାଳେ ବରଗଡ ବନଖଣ୍ଡ ଅଧିକାରୀ ବିକ୍ରମଦେବ ପଟ୍ଟନାୟକଙ୍କ ନିର୍ଦ୍ଧେଶକ୍ରମେ ବରଗଡ  ସହକାରୀ ବନ ସଂରକ୍ଷକ ରାଜେନ୍ଦ୍ର କୁମାର ଭୋଇ, ବରଗଡ  ସହକାରୀ ବନ ସଂରକ୍ଷକ ହରମୋହନ ରଥଙ୍କ ଉପସ୍ଥିତିରେ ଭଟଲି ବନାଞ୍ଚଳ ଅଧିକାରୀ ତଥା  ସହକାରୀ ବନ ସଂରକ୍ଷକ ସୁବୋଧ କୁମାର ସାହୁଙ୍କ ତତ୍ୱାବଧାନରେ ଭଟଲି ବ୍ଳକ୍ ପଶୁଚିକିତ୍ସା ଅଧିକାରୀ ଜିତେନ୍ଦ୍ର ମୋହନ ପଣ୍ଡା ତଥା ତାଙ୍କ ଚିକିତ୍ସକ ଦଳ ମୃତ ବାଘଟିର ଶରୀର ପରିମାପ ଓ ଯାଞ୍ଚ କରିବା ପରେ ଶବ ବ୍ୟବଚ୍ଛେଦ କରିଥିଲେ ଓ ଶରୀରର କିଛି ଅଂଶ ପରୀକ୍ଷାଗାରକୁ ପଠାଇବା ପାଇଁ ସଂଗ୍ରହ କରିଥିଲେ ପରେ ବାଘଟିକୁ ଭଟଲି ବନବିଭାଗ କାର୍ଯ୍ୟାଳୟ ପରିସରରେ ସମସ୍ତଙ୍କ ଉପସ୍ଥିତରେ ନିଆଁରେ ପୋଡି ଦିଆଯାଇଥିଲା । ଏହି ଅବସରରେ ବରଗଡ ଉପ ଜିଲ୍ଲପାଳ ପ୍ରସନ୍ନ କୁମାର ପାଣ୍ଡେ, ବରପାଲି ତହସିଲଦାର ରୁକ୍ମଣ ମେହେର, କର୍ଲା ଗ୍ରାମପଞ୍ଚାୟତ ସରପଞ୍ଚ ତନୟା ଭୋଇ, ବିଜୁପଟ୍ଟନାୟକ ପୁରସ୍କାର ପ୍ରାପ୍ତ ବିଶ୍ୱନାଥ ସାହୁ , ଅବସରପ୍ରାପ୍ତ ବନ୍ୟଜନ୍ତୁ ରକ୍ଷକ ମୀନକେତନ ସାହୁ, ପରିବେଶ ବିଶେଷଜ୍ଞ ସଞ୍ଜୟ ଖମାରୀ, ପରିବେଶବିତ୍ ତଥା ପ୍ରକୃତିମିତ୍ର ସୁଶିଲ କୁମାର ସାହୁ, ବନପାଲ ରାଜେନ୍ଦ୍ର କୁମାର ସିଂ, କର୍ଲା ବନପାଲ ପର୍ଶୁରାମ ବେହେରା ଓ ଅନ୍ୟ ସମସ୍ତ ବନ କର୍ମଚାରୀ ପ୍ରମୁଖ ଉପସ୍ଥିତ ଥିଲେ ।