18-Sep-2024

ଭବାନୀପାଟଣା(ପ୍ରେରଣା ଖବର ବ୍ୟୁରୋ) କଳାହାଣ୍ଡି ଜିଲ୍ଲାରେ  ସରକାରୀ ଚାକିରୀ କରୁଥିବା ଶିକ୍ଷକ / ଶିକ୍ଷୟିତ୍ରୀ ଓ ବନ ବିଭାଗର ରେଞ୍ଜ ଅଧିକାରୀ ପ୍ରମୁଖଙ୍କ ବିରୋଧରେ ନକଲି ଆଦିବାସୀ/ ହରିଜନ ଜାତିଗତ ପ୍ରମାଣପତ୍ରର ତଦନ୍ତ ଅଭିଯୋଗ କରି କେତେକ ତଥାକଥିତ ଆଦିବାସୀ ନେତା ସମ୍ପୃକ୍ତ କର୍ମଚାରୀଙ୍କୁ ବ୍ଲାକ୍ ମେଲିଂ କରୁଥିବା ଅଭିଯୋଗ ପ୍ରକାଶ ପାଇଛି । ଏ ସମ୍ପର୍କରେ  ଏବେ ଏକ ଖବରକାଗଜରେ ଏକ ଖବର ପ୍ରକାଶ ପାଇଥିଲା । ଏସମ୍ପର୍କରେ ଆମ ଟିମ୍ ତଦନ୍ତ କରିବାରୁ ଉପରୋକ୍ତ ଚାଞ୍ଚଲ୍ୟକର ବ୍ଲାକ୍ ମେଲିଂ ଅଭିଯୋଗ ହସ୍ତଗତ ହୋଇଛି । 

ଉଲ୍ଲେଖନୀୟ ଯେ , ଦକ୍ଷିଣାଞ୍ଚଳ ରାଜସ୍ୱ କମିଶନରଙ୍କ ନିକଟରେ ଜିଲ୍ଲାର ଏଭଳି ନକଲି ଜାତିଗତ ପ୍ରମାଣ ପତ୍ର ବଳରେ ସରକାରୀ ଚାକିରୀ କରୁଥିବା ଅଭିଯୋଗ ହୋଇଥିଲା । ସେଇ ଅଭିଯୋଗ କ୍ରମେ ଜିଲ୍ଲାର ୯ ଜଣ ଶିକ୍ଷକ/ଶିକ୍ଷୟିତ୍ରୀ, ଅଙ୍ଗନବାଡି କର୍ମୀ, ଅବସରପ୍ରାପ୍ତ ବ୍ଲକ୍ ଶିକ୍ଷା ଅଧିକାରୀ ଓ ଜଣେ ବନ ବିଭାଗର ରେଞ୍ଜ ଅଧିକାରୀଙ୍କ ନାମରେ ଉକ୍ତ ଚିଠି ନମ୍ବର ଆଦି ଉଲ୍ଲେଖ କରାଯାଇ କଳାହାଣ୍ଡି ଏସ୍ ପି ଙ୍କ ପକ୍ଷରୁ ମଧ୍ୟ ତଦନ୍ତ କରାଯାଉଥିବା ପ୍ରକାଶ ପାଇଛି ।  ଏହାପରେ ଆମ ଟିମ୍ ପକ୍ଷରୁ ଏମାନଙ୍କ ମଧ୍ୟରୁ କେତେକଙ୍କୁ ଭେଟି ଏ ସମ୍ପର୍କରେ ପଚରାଯିବାରୁ ସେମାନେ ଏହା ପଛରେ କେତେକ ସ୍ବାର୍ଥନିଷ୍ଠ ବ୍ୟକ୍ତିବିଶେଷଙ୍କର ଟଙ୍କା ଦାବି କରି ବ୍ଲାକ୍ ମେଲିଂ କରୁଥିବା ଅଭିଯୋଗ ଆମର ହସ୍ତଗତ ହୋଇଛି । 

ଏଥିମଧ୍ୟରେ କଳାହାଣ୍ଡି ବନ ବିଭାଗ ଦକ୍ଷିଣାଞ୍ଚଳ ଡିଭିଜନର ବଗାଡ ରେଞ୍ଜ ଅଧିକାରୀ ଭବାନୀ ଶଙ୍କର କାଉରଙ୍କ କହିବା କଥା ଯେ, ସେ ଜଣେ ପ୍ରକୃତରେ ଆଦିବାସୀ ଓ ତାଙ୍କ ପଛରେ ତିନୋଟି ଦଳ ପକ୍ଷରୁ ବାରମ୍ବାର ଟଙ୍କା ପାଇଁ ଏଭଳି ଉଦ୍ଦେଶ୍ୟମୂଳକ ମିଥ୍ୟା ଅଭିଯୋଗ କରାଯାଇ ଆସୁଛି । ମୁଁ ଚାହେଁ ଯେ , ଏହାର ପ୍ରକୃତ ତଦନ୍ତ ହେଉ ଓ ଏଭଳି ଅଭିଯୋଗ ସବୁଦିନ ପାଇଁ ବନ୍ଦ ହେଇଯାଉ ।' ତେବେ ସେ କେତେଦୂର ସତ , ତଦନ୍ତ ସାପେକ୍ଷ । ଅନ୍ୟପକ୍ଷରେ ସେ ପ୍ରକୃତରେ ଆଦିବାସୀ ଜାତିର ନୁହଁନ୍ତି ଓ ତାଙ୍କ ଘର ଭବାନୀପାଟଣାର ପରଦେଶୀପଡାର ହରିଜନପଡାରେ ଓ ସେ ଜଣେ ହରିଜନଜାତିର ହୋଇଥିଲେ ହେଁ , ଆଦିବାସୀ ଜାତିକୋଟାରେ ସରକାରୀ ଚାକିରୀ ହାତେଇଥିବା ଓ ଏପରିକି ତାଙ୍କର ମାଟ୍ରିକ୍ ଶିକ୍ଷାଗତ ପ୍ରମାଣ ପତ୍ରରେ ମଧ୍ୟ ଜାଲିଆତି କରାଯାଇଥିବା ସ୍ଥାନୀୟଲୋକେ କହନ୍ତି । ଏ ସମ୍ପର୍କରେ ତାଙ୍କୁ ପଚରାଯାଇଥିଲେ ହେଁ, ସେ ଏହାକୁ ଅସ୍ବୀକାର କରନ୍ତି । 

ଦ୍ବିତୀୟତଃ ଜୟନ୍ତପୁର ଆଶ୍ରମସ୍କୁଲ୍ ର ପ୍ରଧାନଶିକ୍ଷୟିତ୍ରୀ ଅସୀମା ଦୋରାଙ୍କୁ ତାଙ୍କ ଜାତିଗତ ପ୍ରମାଣ ପତ୍ର ନକଲି କି ବୋଲି ପଚରାଯିବାରୁ ସେ ମଧ୍ୟ ତାଙ୍କ ବିରୋଧରେ କଳାହାଣ୍ଡି ର ଆଦିବାସୀ ସଂଘ ସଭାପତି ପ୍ରକାଶ ମାଝି ଆର ଡି ସି ଙ୍କ ନିକଟରେ ଦ୍ବିତୀୟବାର ଏଭଳି ଅଭିଯୋଗ କରିଥିବା ଓ ଏହାପଛରେ ତାଙ୍କର ଉପରୋକ୍ତ ଟଙ୍କା ଉଦ୍ଦେଶ୍ୟ ରହିଥିବା କହିଛନ୍ତି । ସେ ଏହା ମଧ୍ୟ କରିଥିଲେ ଯେ , ଅଭିଯୋଗ ହେଉ । କିନ୍ତୁ ଏହାର ସତ୍ୟାସତ୍ୟ ତଦନ୍ତ ପରେ ଯାଇ ଗଣମାଧ୍ୟମରେ ବାହାରିବା କଥା । ଏହା ଏକ ମାନସିକ ନିର୍ଯାତନା ଛଡା ଆଉ କ'ଣ  ? ଆମ ଜାତି କଣ୍ଡାଦୋରା ଓ ଆମେ ଏସ୍ ଟି ଅଟୁଁ । ଅନେକ ସ୍ଥାନରେ ଆମର ଏଇ ଜାତି ଓ ସାଙ୍ଗିଆର ଲୋକେ ଏଇ ସରକାରୀ କୋଟାର ସୁବିଧା ନେଇଛନ୍ତି । ' ସେ ଜିଲ୍ଲାର ଜୟନ୍ତପୁର ଭଳି ଏକ ନିପଟ ପଲ୍ଲୀ ଗ୍ରାମାଞ୍ଚଳରେ ଆଦିବାସୀ କଲ୍ୟାଣ ବିଭାଗର ଏକ ଆଶ୍ରମସ୍କୁଲ୍ ବା କନ୍ୟାଶ୍ରମର ପ୍ରଧାନଶିକ୍ଷୟିତ୍ରୀ ଭାବରେ ଅବସ୍ଥାପିତା ଓ ଏହି ସ୍କୁଲରେ ମୋଟ ୩୮୧ ଜଣ ଅନ୍ତେବାସିନୀଙ୍କ ସମେତ ୪୪୭ ଜଣ ଛାତ୍ରୀ ଶିକ୍ଷାଗ୍ରହଣ କରୁଛନ୍ତି । ଏଠାରେ ତାଙ୍କ ସହ ୧୩ ଜଣ ଶିକ୍ଷୟିତ୍ରୀ ଓ ୬ ଜଣ ଅନ୍ୟାନ୍ୟ ମହିଳା କର୍ମଚାରୀ ଥିଲେ ହେଁ , ରାତ୍ର ଜଗୁଆଳୀ ନଥିଲେ ହେଁ , ସେ ଏହାକୁ ସୂଚାରୁରୂପେ ପରିଚାଳନା କରୁଥିବା ଦେଖାଯାଇଛି । 

ସବୁଠାରୁ ଗୁରୁତର ବିଷୟ ଯେ, ଗତ ଜୁଲାଇ ମାସରେ ଜୁନାଗଡ କାନ୍ଦୁଗୁଡା ଗ୍ରାମ ନିବାସୀ ମନ ରଞ୍ଜନ ଭୋଇ ନାମକ ଜଣେ ପୁଲିସ୍ କର୍ମଚାରୀଙ୍କ ପକ୍ଷରୁ କଳାହାଣ୍ଡି ଆଦିବାସୀ ଚେତନା ମଞ୍ଚର ସଭାପତି ପରମାନନ୍ଦ ମାଝୀଙ୍କ ନିକଟକୁ ଲେଖିଥିବା ଏକ ଅଭିଯୋଗପତ୍ରର ନକଲ ଆମର ହସ୍ତଗତ ହୋଇଛି । ସେଥିରେ ସେ ତମ୍ବାଛଡା ଗ୍ରାମର କିଶୋର ଭୋଇ ଓ କଳାହାଣ୍ଡି ଆଦିବାସୀ ସଂଘର ସଭାପତି ହୃଦାନନ୍ଦ ମାଝି ନାମକ ୨ ଜଣ ତାଙ୍କଠାରୁ ଯଥାକ୍ରମେ ୪୦ ହଜାର ଓ ୮୦ ହଜାର ଟଙ୍କା ନେଇଥିବାର ଅଭିଯୋଗ କରାଯାଇଛି ।  ଏହା ବ୍ୟତୀତ ଆହୁରି ୧ଲକ୍ଷ ଟଙ୍କା ଦାବି କରି ଭବିଷ୍ୟତରେ ତାଙ୍କ ନାମରେ କେଶପତ୍ର କରିବୁ ନାହିଁ ଓ ଯଦି କିଛି ହୁଏ , ଆମେ ଦାୟୀ ରହିବୁ ବୋଲି ଆଶ୍ବାସନା ଦେଇଥିଲେ । ଏ ସମ୍ପର୍କରେ ଜୁନାଗଡ ତହସିଲଦାର ଓ ଥାନା ଆଇଆଇସି ତଦନ୍ତ ସାରିଥିବା ସେ ଉଲ୍ଲେଖ କରିଛନ୍ତି । କିନ୍ତୁ କେଉଁଥି ପାଇଁ ସେ ସେମାନଙ୍କୁ ଏତେ ଟଙ୍କା ଦେଇଥିଲେ , ଏହା ମଧ୍ୟ ଅନୁସନ୍ଧାନ ସାପେକ୍ଷ । ଏ ସମ୍ପର୍କରେ ଜିଲ୍ଲାରେ ଜନସାଧାରଣଙ୍କ ମଧ୍ୟରେ ଚର୍ଚ୍ଚା ହେଉଛି । ସରକାର ଦୃଷ୍ଟିଦେବାକୁ ଲୋକେ ଦାବି କରୁଛନ୍ତି । 

ତେବେ ଏ ସମ୍ପର୍କରେ ଉଦ୍ୟମ କରାଯାଇ ଥିଲେ ହେଁ , ଆଦିବାସୀନେତା ଓ ଅପର ପକ୍ଷର କିମ୍ବା ତଦନ୍ତକାରୀ ଅଧିକାରୀଙ୍କର ମତାମତ ନିଆଯାଇ ପାରିନାହିଁ । ତେବେ ଯଦି ଏହା ସତ୍ୟ ହୋଇଥାଏ, ସାଙ୍ଘାତିକ୍  !