14-Aug-2024

ବରଗଡ଼(ନିରଞ୍ଜନ ତ୍ରିପାଠୀ)-ପ୍ରାଣୀଧନ ଓ ପଶୁଚିକିତ୍ସା  ବିଭାଗର ପୂର୍ବତନ ନିର୍ଦ୍ଦେଶକ ତଥା ସୁସାହିତ୍ଯିକ ଡା ଲକ୍ଷ୍ମଣ ବେହେରାଙ୍କ ପ୍ରଥମ ଶ୍ରାଦ୍ଧ ବାର୍ଷିକ ମହାନଦୀ ବିହାରସ୍ଥିତ ଜଗନ୍ନାଥ ମନ୍ଦିର ପରିସରରେ ଅନୁଷ୍ଠିତ ହୋଇଯାଇଛି। ଏଥିରେ ଶିଶୁ ପତ୍ରିକା 'ନାନାବାୟା'ର ପ୍ରକାଶିକା ହରିପ୍ରିୟା ବେହେରା ସଭା ମୁଖ୍ଯ ଭାବେ ଯୋଗ ଦେଇଥିଲେ। ମୁଖ୍ଯ ଅତିଥି ଭାବେ ଡା ପ୍ରଦୀପ କୁମାର ଦାଶ, ମୁଖ୍ଯ ବକ୍ତା ଭାବେ ଲକ୍ଷ୍ମୀକାନ୍ତ ପଟ୍ଟନାୟକ, ସମ୍ମାନିତ ଅତିଥି ଭାବେ ଡା ବୀର କିଶୋର ପରିଡ଼ା, ନାନାବାୟାର ସଂପାଦକ ସରୋଜ ବେହେରା ଉପସ୍ଥିତ ରହି ଡା ବେହେରାଙ୍କ ସ୍ମ୍ରତି ତାରଣ କରିଥିଲେ। ବୌଦ୍ଧ ଜିଲ୍ଲାର ତହସିଲଦାର ତଥା  ସ୍ୱର୍ଗତଃ ଡା.ଲକ୍ଷ୍ମଣ ବେହେରାଙ୍କ ସୁପୁତ୍ର ଲଗ୍ନଜିତ୍ ବେହେରା ସ୍ବାଗତ ଭାଷଣ ଓ ଅତିଥି ପରିଚୟ ପ୍ରଦାନ କରିଥିଲେ। ଡା. ବେହେରା ଏକାଧାରରେ ଜଣେ   ଚିକିତ୍ସକ,ସୁବକ୍ତା,ସଂଗଠକ ଓ ସାହିତ୍ଯିକ ଭାବେ ଵେଶ୍ ପରିଚିତ  ଥିଲେ। ତାଙ୍କ ଅବର୍ତ୍ତମାନରେ ଶିଶୁସାହିତ୍ୟର ଘୋର କ୍ଷତି ହେଲା। 
ଏହି ଅବସରରେ ଲଗ୍ନଜିତ୍ ବେହେରାଙ୍କ "ସତ୍ଯବାଦୀ ରାଜା ହରିଶ୍ଚନ୍ଦ୍ର " ଓ ଆନନ୍ଦ କୁମାର ମେହେରଙ୍କ "ଅଙ୍ଗୁଳିମାଳ" ଶିଶୁ ଉପନ୍ୟାସ  ଉନ୍ମୋଚିତ ହୋଇଥିଲା। ଉପନ୍ୟାସର ଆଙ୍ଗିକ ଓ ଆତ୍ମିକ ଦୃଷ୍ଟିକୋଣରୁ ବିଶିଷ୍ଟ ଶିଶୁ ସାହିତ୍ଯିକ  ପ୍ରଶାନ୍ତ କୁମାର ମଙ୍ଗରାଜ ଓ କୁଞ୍ଜ ବିହାରୀ ସାହୁ ସମୀକ୍ଷା କରିଥିଲେ। ଶିଶୁ ଉପନ୍ୟାସର ଉନ୍ମୋଚନ ଓ ବିକାଶ ଉପରେ ସାରଗର୍ଭକ ଆଲୋଚନା ହୋଇଥିଲା। ଶିଶୁ ଉପନ୍ୟାସ ପ୍ରକାଶନରେ ନାନାବାୟାର ଭୂମିକାକୁ ଆଲୋଚକମାନେ ଭୂୟସୀ ପ୍ରଶଂସା କରିଥିଲେ।  ଡ ଶରତ ଚନ୍ଦ୍ର ପରିଡା ମଞ୍ଚ ପରିଚାଳନା କରିଥିବା ବେଳେ  ନିତ୍ଯ ପ୍ରିୟା ଶୁଭଲଗ୍ନା ବେହେରା ଧନ୍ଯବାଦ ଅର୍ପଣ କରିଥିଲେ।