14-Jul-2024

ସିନ୍ଧେକେଲା(ଅନୀଲ କୁମାର ତ୍ରିପାଠୀ): ବଲାଙ୍ଗୀର ଜିଲ୍ଲା ବଙ୍ଗୋମୁଣ୍ଡା ବ୍ଲକର ସମସ୍ତ ଜନ ସାଧାରଣଙ୍କୁ ବିଶୁଦ୍ଧ ପାନୀୟ ଜଳ ଯୋଗାଣ ପାଇଁ ଚାଳିଛି ପ୍ରତି ଗାଁ ରେ ଓଭରହେଡ ଟ୍ୟାଙ୍କ ନିର୍ମାଣ କାମ। ବ୍ଲକର ପ୍ରାୟ ଗାଁ ରେ ଓଭରହେଡ ଟ୍ୟାଙ୍କ ନିର୍ମାଣ ତଥା ସମ ନିର୍ମାଣ ସରି ଯାଇଥିଲେ ହେଁ କୋଉଠି ପାଇପଲାଇନ ବିଛା ଯାଇନି ତ କୋଉଠି ବିଦ୍ୟୁତ ସଂଯୋଗ ହୋଇପାରିନାହିଁ। ଏମିତି ଭାବରେ ଧକେଇ ଧକେଇ ଚାଳିଛି ପାନୀୟ ଜଳ ଯୋଗାଣ ପ୍ରକଳ୍ପ। ଏହାକୁ ନେଇ ବଙ୍ଗୋମୁଣ୍ଡା ବ୍ଲକ ଆରଡବ୍ଲୁଏସଏସ କନିଷ୍ଠ ଯନ୍ତ୍ରୀ ସତ୍ୟ ସାରଦା ମହାନ୍ତି ଙ୍କୁ ପଚାରିବାରୁ ଠେମରା ରେ ଓଭରହେଡ ଟ୍ୟାଙ୍କ କାମ ସରିଯାଇଛି। କିନ୍ତୁ ଠିକା ସଂସ୍ଥା ତିନୋଟି ସ୍ଥାନରେ କାମ କରୁଥିବାରୁ ଏବେ ଅନ୍ୟ ଗାଁରେ କାମ ଚାଳିଛି କିଛି ଦିନ ମଧ୍ୟରେ ଠେମରା ରେ ବାକି ଥିବା କାମ ଶେଷ କରାଯିବ ବୋଲିି କନିଷ୍ଠ ଯନ୍ତ୍ରୀ ଶ୍ରୀ ମହାନ୍ତି କହିଥିଲେ। ତେବେ କେତେ ଦିନରୁ କାମ ଆରମ୍ଭ ହେଲାଣି, କେତେ ଟଙ୍କାର ଏଷ୍ଟିମେଟ ରହିଛି ଏବଂ ବଙ୍ଗୋମୁଣ୍ଡା ବ୍ଲକରେ କେତୋଟି ଗ୍ରାମରେ କେତୋଟି ପାନୀୟ ଜଳ ଯୋଗାଣ ପ୍ରକଳ୍ପ କାମ ଚାଳିଛି, କେତୋଟି କାମ ସରିଲାଣି, କେତୋଟି କାମ ଏବେ ବି ଚାଳିଛି ବୋଲି ପଚାରିବାରୁ ସେ ଏବେ କିଛି କହି ହେବନାହିଁ ଦେଖି ପରେ କହିବି ବୋଲି କହିଥିଲେ। ଠେମରା ରେ କାମ ଶେଷ ହୋଇନଥିବା ବେଳେ ଓଭରହେଡ ଟ୍ୟାଙ୍କ ତିଆରି ହୋଇଥିବା ସ୍ଥାନ ରେ ତିଆରି ହୋଇଥିବା ବାଡ଼ ରେ ଫାଟ ହୋଇଥିବା କହିବାରୁ ସେ କହିଥିଲେ ଯେ ବଙ୍ଗୋମୁଣ୍ଡା ବ୍ଲକର ବିଭିନ୍ନ

ସ୍ଥାନରେ କଳା ମାଟି ଥିବାରୁ ନୁଆ ବାଡ ଦବି ଯାଇ ଥାଇପାରେ। ଯଦି ଫାଟ ହୋଇଛି ତେବେ ଠିକା ସଂସ୍ଥା କୁ କହି ତାହା ପୁଣି ଠିକ କରାଯିବ ବୋଲିି କହିଥିଲେ। ଠେମରା ଓ ଜାମତରା ଗ୍ରାମର ଲୋକଙ୍କୁ ବିଶୁଦ୍ଧ ପାନୀୟ ଜଳର ଆବଶ୍ୟକତାକୁ ଦୃଷ୍ଟିରେ ରଖି ତୁରନ୍ତ କାମ ସାରିବାକୁ ଯୁବନେତା ନିତ୍ୟାନନ୍ଦ ପୃଷେଠ, ସଞ୍ଜିବ କୁମାର ଛୁରା, ମୋହନ ମାଝି, ପ୍ରଦିପ ଭୋଇ, ନିର୍ମଲ ଭୋଇ, ମିନିକେତନ ବାଗ ପ୍ରମୁଖ ଦାବି କରିଛନ୍ତି।