21-May-2024

ସିନ୍ଧେକେଲା(ଦୀନେଶ ଜୈନ): ଚଳିତ ସାଧାରଣ ନିର୍ବାଚନରେ ବଲାଙ୍ଗିର ଜିଲ୍ଲା କଣ୍ଟାବାଞ୍ଜି ନିର୍ବାଚନ ମଣ୍ଡଳୀ ଅନ୍ତର୍ଗତ ସିନ୍ଧେକେଲା ପଞ୍ଚାୟତ ତଥା ଆଖପାଖ ଅଞ୍ଚଳର ବିଭିନ୍ନ ବୁଥରେ ଶାନ୍ତିଶୃଙ୍ଖଳାର ସହ ମତଦାନ ଶେଷ ହୋଇଛି । ସିନ୍ଧେକେଲା ପଞ୍ଚାୟତର ମୋଟ ମତଦାତା ୬୧୪୪ ଜଣ ଥିବାବେଳେ ସେମାନଙ୍କ ମଧ୍ୟରୁ ୪୩୯୩ ଜଣ ମତଦାନ କରିଥିବା ସୂଚନା ମିଳିଛି । ସିନ୍ଧେକେଲା ପଞ୍ଚାୟତରେ ମୋଟ ୮ ଗୋଟି ବୁଥ ରହିଥିବା ବେଳେ ୩୦୦ ନମ୍ବର ବୁଥରେ ୭୫୯ ଭୋଟଦାତା ରହିଥିବାବେଳେ ସେଥିରୁ ୫୫୬ ମତଦାତା ଭୋଟ ଦେଇଛନ୍ତି, ସେହିଭଳି ଭାବରେ ୩୦୯ ନମ୍ବର ବୁଥରେ ୯୦୦ ରୁ ୭୧୧ , ୩୧୦ ନମ୍ବର ବୁଥରେ ୮୬୮ ରୁ ୫୮୦, ୩୧୧ ନମ୍ବର ବୁଥରେ ୭୩୦ ରୁ ୫୨୩, ୩୧୨ ନମ୍ବର ବୁଥରେ ୮୭୧ ରୁ ୫୪୩, ୩୧୩ ନମ୍ବର ବୁଥରେ ୮୭୫ ରୁ ୬୩୩, ୩୧୪ ନମ୍ବର ବୁଥରେ ୭୩୩ ରୁ ୫୪୩, ୩୧୬ ନମ୍ବର ବୁଥରେ ୪୦୮ ରୁ ୩୦୪ ଜଣ

ମତଦାନ କରିଥିଲେ । ମତଦାନ ହାର ହାରାହାରି ୭୧ ପ୍ରତିଶତରୁ ଉର୍ଦ୍ଧ୍ବ ହେଉଥିବା ଜଣାପଡିଛି । କିନ୍ତୁ ବିଶେଷ ଭାବରେ ଭୋଟର ତାଲିକାକୁ ନେଇ ଏହି ପଞ୍ଚାୟତରେ ମତଦାତାଙ୍କ ମଧ୍ୟର ତୀବ୍ର ଅସନ୍ତୋଷ ଦେଖାଦେଇଛି । ମତଦାତା ସୂଚୀରେ ବ୍ୟାପକ ତ୍ରୁଟି ସାଙ୍ଗକୁ ଶତାଧିକ ମତଦାତାଙ୍କ ନାମ ନଥିବା ଅଥବା କଟି ଯାଇଥିବା ଫଳରେ ସେମାନେ ମତଦାନରୁ ବଞ୍ଚିତ ରହିଥିଲେ । ଏପରିକି ସିନ୍ଧେକେଲା ରାଜା ଅରୁଣ ସିଂଦେଓଙ୍କ ନାମ ତାଲିକା ସୂଚୀରେ ନଥିବାରୁ ସେ ମଧ୍ୟ ମତଦାନରୁ ବଞ୍ଚିତ ରହିବା ହାସ୍ୟାସ୍ପଦ ହୋଇଛି ।ଏ ନେଇ ଅଭିଯୋଗ ହୋଇଥିଲେ ମଧ୍ୟ ମତଦାତା ଙ୍କ ପାଇଁ କୌଣସି ବିକଳ୍ପ ବ୍ୟବସ୍ଥା ବା ସମାଧାନ ନହେବାରୁ ତୀବ୍ର ଅସନ୍ତୋଷ ଦେଖାଦେଇଥିଲା । ଅନ୍ୟ ପକ୍ଷରେ ବୁଥ ଗୁଡିକରେ ପ୍ରଶାସନ ପକ୍ଷରୁ ପାନୀୟ ଜଳ ସମେତ ସମସ୍ତ ପ୍ରକାର ସୁବିଧା ମତଦାତାଙ୍କୁ ସୁହାଇଥିବା ଜଣାପଡିଥିଲା ।