27-Apr-2024

ବଲାଙ୍ଗୀର(ପ୍ରେରଣା ଖବର): ବଲାଙ୍ଗୀର ସହରରେ ଶାସକ ବିଜେଡି ଦଳର ନିର୍ବାଚନୀ ପ୍ରଚାରକୁ ଯୋରଦାର କରାଯାଇଛି । ବିଜେଡିର ଭେଟେରାନ ଲିଡର ଅନଙ୍ଗଉଦୟ ସିଂଦେଓ ଓ ପୌରାଧ୍ୟକ୍ଷା ଲିକା ସାହୁ ଏହି ପ୍ରଚାରର ମଙ୍ଗଧରିଛନ୍ତି । ନବୀନ ପଟ୍ଟନାୟକ ସରକାରଙ୍କ ଅମଳରେ ହୋଇଥିବା ଶହଶହ କୋଟିର ବିକାଶମୂଳକ କାମ ଓ ଜନହିତକର ଯୋଜନା ବିଷୟରେ ଲୋକଙ୍କୁ କହି ବିଜେଡି ପ୍ରାର୍ଥି କଳିକେଶ ନାରାୟଣ ସିଂଦେଓଙ୍କ ପାଇଁ ଭୋଟ ଭିକ୍ଷା କରୁଛନ୍ତି । ଶୁକ୍ରବାର ଦିନ ବଲାଙ୍ଗୀର ସହରର ୧୫ନମ୍ବର ୱାର୍ଡରେ ଏକ ବିଶାଳ ସଭା ଅନୁଷ୍ଠିତ ହୋଇଯାଇଛି । ଏହି ୱାର୍ଡର କାଉନସିଲର ମହେନ୍ଦ୍ର ବାଘଙ୍କ ସଭାପତିତ୍ୱରେ ଅନୁଷ୍ଠିତ କାର୍ଯ୍ୟକ୍ରମରେ ବିଜେଡିର ବରିଷ୍ଠନେତା ଅନଙ୍ଗଉଦୟ ସିଂଦେଓ, ପୌରାଧ୍ୟକ୍ଷା ଲିକା ସାହୁ,ପୂର୍ବତନ ପୌରାଧ୍ୟକ୍ଷା ତଥା ବିଜେଡି ମହିଳା ଜିଲ୍ଲା ସଭାନେତ୍ରୀ ଦମୟନ୍ତି ବାଘ,ପୂର୍ବତନ ପୌରାଧ୍ୟକ୍ଷା ସନ୍ତୋଷିନୀ ବାଘ, ମହିଳା ସଂପାଦିକା ସାଗରିକା ଗୁରୁ, ବିଜେଡିର ରାଜ୍ୟ ସଂପାଦକ ପ୍ରଭାସ ପାଣିଗ୍ରାହୀ, ରାଜ୍ୟ ସଂପାଦକ ପ୍ରଦ୍ୟୁତ ମିଶ୍ର ପ୍ରମୁଖ ମଞ୍ଚାସୀନ ରହି ରାଜ୍ୟସରକାରଙ୍କ ଜନହିତକାରୀ ଯୋଜନା ବିଷୟରେ କହିଥିଲେ । ପ୍ରଭାସ ପାଣିଗ୍ରାହୀ ତାଙ୍କ ବକ୍ତବ୍ୟରେ ବଲାଙ୍ଗୀରରେ କଂଗ୍ରେସର ବିଧାୟକ ଓ ଭାଜପା ସାଂସଦଙ୍କ ଭିତିରି ବୁଝାମଣା ରହିଛି । କଟାହାତରେ ପଦ୍ମଫୁଲ ଶୋଭା ପାଏନି ବରଂ ମଉଳି ଯାଏ ବୋଲି କଟାକ୍ଷ କରିଥିଲେ । ସେହିପରି ଯୋଡିଶଙ୍ଖ ସବୁବେଳେ ଶୁଭ ବୋଲି କହିଥିଲେ । ପୌରାଧ୍ୟକ୍ଷା ଲିକା ସାହୁ ଓ ପୂର୍ବତନ ପୌରାଧ୍ୟକ୍ଷା ଦମୟନ୍ତି ବାଘ ତାଙ୍କ ବକ୍ତବ୍ୟରେ ୧୫ନମ୍ବର ୱାର୍ଡ ସମେତ ବଲାଙ୍ଗୀର ସହରରେ କରାଯାଇଥିବା ବିକାଶ ପ୍ରକଲ୍ପବିଷୟରେ କହିଥିଲେ । ଏହି କାର୍ଯ୍ୟକ୍ରମରେ ପ୍ରାୟ ୧୫ଶହରୁ ଉର୍ଦ୍ଧ୍ୱ ପୁରୁଷ/ମହିଳା ଯୋଗ ଦେଇଥିଲେ ।