22-Apr-2024

ବୀରମହାରାଜପୁର,( ବିନୋଦ ପାଣ୍ଡେ ): ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ବ୍ଲକ ଅନ୍ତର୍ଗତ ବିଭିନ୍ନ ଗ୍ରାମରେ ବେଆଇନ ଭାବେ ବେଧଡକ ମାଟି ଇଟାଭାଟି ଚାଲୁଥିବା ଦେଖିବାକୁ ମିଳୁଛି । ଏବେ ଅଞ୍ଚଳରେ କିଛି ଦିନ ହେଲା ତାପମାତ୍ରା ଅହେତୁକ ଭାବେ ବୃଦ୍ଧି ପାଇଛି। ଟାଣ ଖରା ସହ ଉତ୍ତାପ ବୃଦ୍ଧି ଯୋଗୁଁ ମଧ୍ୟାହ୍ନ ରେ ଜୀବନ ଯାତ୍ରା ଠପ ହୋଇ ପଡ଼ୁଛି। ପ୍ରତିବର୍ଷ ତାପମାତ୍ରା ବୃଦ୍ଧି ପାଉଥିବାରୁ ଜଙ୍ଗଲ ଧ୍ବଂସ, ନଦୀ ନାଳରେ ଜଳ ସଙ୍କଟ, ଭୂତଳ ଜଳସ୍ତର ହ୍ରାସ ଆଦି କାରଣ ବୋଲି ପରିବେଶବିତ ମତ ପ୍ରକାଶ କରିବା ସହ ଚିନ୍ତା ପ୍ରକଟ କରୁଛନ୍ତି। ଅଞ୍ଚଳରେ ବ୍ୟାପକ ମାତ୍ରାରେ ଗଢ଼ି ଉଠିଥିବା ମାଟି ଇଟାଭାଟି ତାପମାତ୍ରା ବୃଦ୍ଧି ପ୍ରମୁଖ କାରଣ ବୋଲି ଜଣାପଡିଛି। ମାଟି ଇଟାଭାଟି ବେଆଇନ ଘୋଷଣା କରିବା ସହ ଏ ସମ୍ପର୍କରେ ସଚେତନତା ସୃଷ୍ଟି ଓ ଖିଲାପକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ସରକାରଙ୍କ ନିର୍ଦ୍ଦେଶ ରହିଛି। ବୀରମହାରାଜପୁର ତହସିଲ ଅନ୍ତର୍ଗତ ବିଭିନ୍ନ ଗ୍ରାମରେ କୁଟିର ଶିଳ୍ପ ପରି ବହୁଳ ପରିମାଣରେ ବେଧଡକ ଭାବେ ମାଟି ଇଟାଭାଟି ଗଢି ଉଠିଛି। ଏ ସମ୍ପର୍କରେ ରାଜସ୍ୱ ନିରୀକ୍ଷକ ଓ ତହସିଲ କର୍ତୃପକ୍ଷ ଦୃଷ୍ଟି ଆକର୍ଷଣ ପରେ ଫାଇନ ଆଦୟ ନା'ରେ ଟଙ୍କା ଆଦାୟ କରି ସରକାରୀ ତହବିଲରେ ଜମା କରାଯାଉନଥିବା ଅଭିଯୋଗ ହେଉଛି। ଏପରିକି ଇଟାଭାଟି ମାଲିକମାନଙ୍କ ଠାରୁ ଟଙ୍କା ଆଦାୟ ପରେ ସେମାନେ ଖୋଲାଖୋଲି ଇଟାଭାଟି ପୋଡୁଥିବା ଦେଖିବାକୁ ମିଳିଛି। ସୁବଳୟା, ବାଗବର,ପିତାମହୁଲ, ଖଣ୍ଡହତା, ମୁର୍ଷୁଣ୍ଢୀ, ବହଳପଦର, ପଞ୍ଚାୟତ ରେ ବ୍ୟାପକ ଭାବେ ମାଟି ଇଟାଭାଟି ପୋଡା ଚାଲିଥିବା ଅଭିଯୋଗ ହେଉଛି। ତାପମାତ୍ରା ବୃଦ୍ଧି ଭଲି ଗୁରୁତର ସମସ୍ୟା କୁ ନେଇ ତୁରନ୍ତ ମାଟି ଇଟାଭାଟି ଗୁଡିକ ଉପରେ ଚଢ଼ାଉ କରି ବନ୍ଦ କରିବାକୁ ବୁଦ୍ଧିଜୀବୀ ମହଲରେ ମତପ୍ରକାଶ ପାଉଛି।