22-Feb-2024

ବଲାଙ୍ଗୀ-ବଲାଙ୍ଗୀର ଜିଲ୍ଲା ପୁଇଁତଳା ଥାନା ଅନ୍ତର୍ଗତ କେସେରକେଲା ଗାଁ ନିକଟସ୍ଥ ଖୋଲାପଡିଆରେ ଜଣେ ମହିଳାଙ୍କ ମୃତଦେହ ଉଦ୍ଧାର କରାଯାଇଛି । ମହିଳାଜଣକର ଶବ ମୁହଁମାଡି ପଡିଆରେ ପଡିଥିବା ବେଳେ ନିକଟସ୍ଥ ଗଛରେ ତାଙ୍କର ଶାଢୀ ଝୁଲୁଛି । ପୁଇଁତଳା ପୋଲିସ ପହଞ୍ଚି ଶବକୁ ଜବତ କରିଥିବା ବେଳେ ସାଇଣ୍ଟିଫିକ ଟିମ ସହ ଏସପି ଋଷିକେଶ ଖିଲାରୀ ଘଟଣାସ୍ଥଳୁକୁ ପହଞ୍ଚି ଛାନଭିନ ଆରମ୍ଭ କରିଛନ୍ତି । ନିକଟସ୍ଥ ଗ୍ରାମବାସୀଙ୍କ କହିବା ହେଲା ସେମାନେ ପ୍ରତିଦିନ ଏହି ପଡିଆକୁ ଗାଇ ଚରାଇବାକୁ ଆସିଥାନ୍ତି ।

କିନ୍ତୁ ଆଜି ସକାଳୁ ଆସି ଦେଖିଲା ବେଳେ ପଡିଆରେ ଜଣେ ମହିଳାଙ୍କ ଶବ ପଡିଥିଲା । ସେମାନେ ଗ୍ରାମବାସୀଙ୍କୁ କହି ପୋଲିସକୁ ଖବର ଦେଇଥିଲେ । ପୋଲିସ ଏବେ ଛାନଭିନ ଚଳାଇଛି । ତେବେ ମହିଳାଜଣକ କିଏ ଓ କେଉଁଠିକାର ତାହା ଜଣାପଡିନାହିଁ । ତାଙ୍କର ଶାଢୀରୁ ସେ ମିଶନଶକ୍ତିରେ କାମକରୁଥିବା ଜଣେ ମହିଳା ଭଳି ଜଣାପଡୁଥିବା କୁହାଯାଉଛି । ସେଠାରୁ ମହିଳାଙ୍କର ମୋବାଇଲ ମଧ୍ୟ ଜବତ ହୋଇଛି । ଘଟଣାସ୍ଥଳରେ ବଲାଙ୍ଗୀର ସଦର ଏସଡିପିଓ ପ୍ରଦୀପକୁମାର ସାହୁ,ଇନ୍ସପେକ୍ଟର ବନିତା ପଧାନ ପ୍ରମୁଖ ପହଞ୍ଚି ତଦନ୍ତ ଚଳାଇଛନ୍ତି ।