19-Feb-2024

ତୁଷୁରା: ବନଜ୍ୟୋତ୍ସ୍ନା ସାହିତ୍ୟ ସଂସଦ ଫୁଲବାଣୀ ର ଦ୍ବାତ୍ରିଂଶ ସ୍ଵନକ୍ଷତ୍ର ଉତ୍ସବ ଓ ସାରସ୍ଵତ ସମ୍ବର୍ଦ୍ଧନା ସଭା ରବିବାର ସଂଧ୍ୟା ୬ ଘଟିକା ସମୟରେ ବିଟିଂ ପଡିଆରେ ଆୟୋଜିତ ବର୍ଣ୍ଣାଢ଼୍ୟ ମଞ୍ଚରେ ଅନୁଷ୍ଠାନ ର ସଭାପତି ପ୍ରଶାନ୍ତ କୁମାର ବେହେରାଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଯାଇଛି। ସଂପାଦକ ଡଃ କାହ୍ନୁ ଚରଣ ସତପଥୀଙ୍କ ସଞ୍ଚାଳନ ରେ ଅନୁଷ୍ଠିତ ସଭାରେ    ମୁଖ୍ୟ ଅତିଥି ଭାବେ ଖୋର୍ଦ୍ଧା କଲେଜର ପ୍ରତିଷ୍ଠାତା ଡଃ କାଳି ଚରଣ ଜୟସିଂହ ଯୋଗଦେଇ ମାତୃଭାଷା ର ମହତ୍ତ୍ଵ ପ୍ରତିପାଦନ କରିଥିଲେ। ଉକ୍ତ ସଭାରେ ମୁଖ୍ୟବକ୍ତା ଭାବେ ବୌଦ୍ଧ କଲେଜର ଇଂରାଜୀ ପ୍ରଫେସର ଡ଼ଃ ପ୍ରମୋଦ କୁମାର ମହାପାତ୍ର ଓ ସମ୍ମାନିତ ଅତିଥି ଭାବେ ପରମ୍ପରା ସାହିତ୍ୟ ସଂସଦ ନୟାଗଡ଼ ର ସଂପାଦକ ଡଃ ନିର୍ମଳ ଚନ୍ଦ୍ର ସୁରଦେଓ ଯୋଗ ଦେଇ ମାତୃଭାଷାକୁ କାଳଜୟୀ କରିବାକୁ ଉପସ୍ଥିତ କବିକୁଳଙ୍କୁ ଆହ୍ଵାନ ଦେଇଥିଲେ। ପ୍ରଥମ ପର୍ଯ୍ୟାୟରେ ସଂଯୋଜକ ଯଜ୍ଞଦତ୍ତ ରଥ,ସଂଯୋଜିକା ଡଃ ସୌଦାମିନୀ ମିଶ୍ର ଓ ସୁନୀତି ଆଚାରୀଙ୍କ ସୁନ୍ଦର ସଂଯୋଜନା ରେ କବିତାପାଠ ଅନୁଷ୍ଠିତ ହୋଇଥିଲା। ଏଥିରେ ଶତାଧିକ କବି, କବୟିତ୍ରୀ ସ୍ଵରଚିତ କବିତା ପାଠ କରିଥିଲେ। ଦ୍ଵିତୀୟ ପର୍ଯ୍ୟାୟରେ ଓଡିଆ ଭଷାର୍ ଅସ୍ମିତା ଶୀର୍ଷକ ଆଲୋଚନାଚକ୍ର ଓ ତୃତୀୟ ପର୍ଯ୍ୟାୟରେ ପୂଜ୍ଯପୂଜାର ପରମ୍ପରାକୁ ପାଥେୟ କରି ଓଡିଶାର ୧୩ ଜଣ ସାରସ୍ଵତ ସାଧକ, ସାଧିକାଙ୍କୁ ଉଚ୍ଛ୍ଵସିତ ସମ୍ବର୍ଦ୍ଧନା ଜ୍ଞାପନ କରିଥିଲେ। ଏହିକ୍ରମରେ ବଲାଙ୍ଗିର ଜିଲ୍ଲା ଅନ୍ତର୍ଗତ ତୁଷୁରା ର ବିଶିଷ୍ଟ ସାହିତ୍ୟିକ, ଶିକ୍ଷକ, ଗାଳ୍ପିକ, ସଂପାଦକ, ସଂଗଠକ ଆଶୁକବି ହେମନ୍ତ ଦାଶଙ୍କୁ ଅନୁଷ୍ଠାନ ପକ୍ଷରୁ ସମ୍ମାନଜନକ ସାରସ୍ଵତ ରତ୍ନ ଓ ଶିକ୍ଷକ ରତ୍ନ ସମ୍ମାନ ରେ ସମ୍ମାନିତ କରିଥିଲେ। ଅତିଥି ବୃନ୍ଦ ଶ୍ରୀ ଦାଶଙ୍କୁ ଅଙ୍ଗବସ୍ତ୍ର, ପୁଷ୍ପଗୁଚ୍ଛ, ମୋମେଣ୍ଟୋ ଓ ମାନପତ୍ର ପ୍ରଦାନ କରି ଉଚ୍ଛ୍ଵସିତ ସମ୍ବର୍ଦ୍ଧନା ଜ୍ଞାପନ କରିଥିଲେ। ଏହି ସମ୍ମାନ ଗ୍ରହଣ କରିବା ପରେ ଶ୍ରୀ ଦାଶ ନିଜ ପ୍ରତିକ୍ରିୟାରେ କହିଛନ୍ତି- "ଏହା ମୋତେ ଆହୁରି ଅଧିକ ସାରସ୍ଵତ ସାଧନା କରିବାକୁ ପ୍ରେରଣା ଯୋଗାଇବ ବୋଲି କହିଛନ୍ତି । ଏହି ସୁସମ୍ବାଦ ପ୍ରସାରିତ ହେବାପରେ ତୁଷୁରା ବିଶିଷ୍ଟ ସାହିତ୍ୟିକ ତୁଳସୀ ଜୈନ, ଡଃ ସୁଧାଂଶୁ ଭୂଷଣ ମେହେର, ବରୁଣ କୁମାର ସାହୁ ତଥା ଅନେକ ସାହିତ୍ୟିକ, ପ୍ରଶଂସକ, ବନ୍ଧୁ ପରିଜନ ଶ୍ରୀ ଦାଶଙ୍କୁ ଶୁଭେଚ୍ଛା ଜଣାଇଛନ୍ତି।