12-Feb-2024

ବଲାଙ୍ଗୀର(ପ୍ରେରଣା ଖବର ): ବଲାଙ୍ଗୀରରେ ନିର୍ବାଚନୀ ସରଗରମର ଆଭାସ ଜଳ ଜଳ ବାରି ହେଲାଣି। ନିର୍ବାଚନ ଯେତିକି ପାଖେଇ ଆସୁଛି ରାଜନେତା ମାନେ ବିଭିନ୍ନ ଆଳରେ ଲୋକଙ୍କ ନିକଟବର୍ତ୍ତୀ ହେଉଛନ୍ତି। ବିଗତ ନିର୍ବାଚନ ରେ ଯେଉ ନେତା ମାନେ ତାଙ୍କର ସ୍ଥିତି ଜାହିର କରି ପାରିଲେନି ସେମାନେ ବଲାଙ୍ଗୀରରୁ ଛତ୍ରଭଙ୍ଗ ଦେଇ ବନବାସରେ ରହିଗଲେ।ଚାରି ବର୍ଷ କାଳ ଅଜ୍ଞାତ ବନବାସରେ ଥିବା ରାଜନେତା ଏବେ କିଛି ମାସ ହେବ ସ୍ବଦେଶ ପ୍ରତ୍ୟାବର୍ତ୍ତନ ପୂର୍ବକ ଆଗାମୀ ନିର୍ବାଚନ ପାଇଁ ପ୍ରସ୍ତୁତି ହେବାରେ ଲାଗିଥିବା ଦେଖିବାକୁ ମିଳୁଛି।ବିଭିନ୍ନ ସଭା ସମିତି ସହ ବିଭିନ୍ନ ସଂସ୍ଥାରେ ପ୍ରତିପତ୍ତି ବିସ୍ତାର କରିଥିବା ଲୋକ ତଥା ଅନୁଷ୍ଠାନ ସହ ଜଡ଼ିତ ହୋଇ ସେମାନଙ୍କୁ ଆପ୍ୟାୟିତ କରିବାକୁ ଲାଗି ପଡିଲେଣି।ନେତା ଜାଣିଛନ୍ତି ବଲାଙ୍ଗୀର ସହରରେ ଭାତୁଆଙ୍କ କମି ନାହିଁ। ଭାତ,ମାଂସ ଦେଇ ବିଭିନ୍ନ ସଂସ୍ଥା ତଥା କିଛି ଲୋକଙ୍କ ମୁଁହ ବନ୍ଦ କରିବାର ଚେଷ୍ଟା ଚାଲିଥିବା ବେଶ ଚର୍ଚ୍ଚା ଜୋର ଧରିଛି। ଜିଲ୍ଲାର ଉନ୍ନତି ତଥା ଲୋକଙ୍କ ଉନ୍ନତି ସକାଶେ ସ୍ୱରଉତ୍ତୋଳନ କରିବା ପରିବର୍ତ୍ତେ ନେତାଙ୍କ ଖାଦ୍ୟ ଏବଂ ଭୋଗରେ ଆପ୍ୟାୟିତ ହୋଇ ନେତା ମାନେ ପୂର୍ବରୁ କରିଥିବା ଭୁଲକୁ ଭୁଲି ତାଙ୍କ ହାତ ବାରିଶି ହେଉଥିବା ଚର୍ଚ୍ଚା ହେଉଛି। ନେତା ଜିତିଲେ ଲୋକଙ୍କର, ହାରିଲେ କିଏ କାହାର। ନିର୍ବାଚନ ପାଖେଇ ଆସୁଥିବା ବେଳେ ନେତା ଲୋକଙ୍କୁ ମନ ମତାଣୀଆ କଥା କହି ଭୋଟ ହାତେଇବା ପାଇଁ ନିକଟବର୍ତ୍ତୀ ହେଉଛନ୍ତି।ବିଗତ ଚାରି ବର୍ଷ ଅନ୍ତଧ୍ୟାନ ହୋଇଥିବା ବେଳେ ଲୋକଙ୍କୁ ଜବାବ ଦେବାପାଇଁ ତାଙ୍କ ପାଖରେ କୌଣସି ମୁଦ୍ଦା ନ ଥିବା ପରିଲକ୍ଷିତ ହେଉଛି ।ଲୋକଙ୍କ ନିକଟବର୍ତ୍ତୀ ହେବା ପାଇଁ ବିଭିନ୍ନ ମନ୍ଦିରର ଭୋଗ ଦେଇ ନିଜର ସ୍ଥିତି ଜାହିର କରିବାରେ ଲାଗି ପଡିଛନ୍ତି।କରୋନା ବେଳେ ନିଜ ଅଞ୍ଚଳର ଲୋକଙ୍କ ସ୍ବାସ୍ଥ୍ୟ  ନିରାପଦ ପାଇଁ କେଉଁ ଭଗବାନଙ୍କ ଭୋଗ ଦେଇଥିଲେ ବୋଲି ସାଧାରଣରେ ଚର୍ଚ୍ଚା ହେଉଛି।ଭୋଟ ସାଉଁଟିବାର ନୂଆ ଅଭିନବ ପ୍ରୟାସ ନେତାଙ୍କ ସପକ୍ଷରେ ଯିବ ନା ବିପକ୍ଷରେ ଯିବ ସମୟ କହିବ।ଏବେ ଆଉ ଅନେକ ତଥ୍ୟ ଲୋକଲୋଚନକୁ ଆସି ସାରିଲାଣି।ନେତାଙ୍କ ମାଙ୍କଡ ଡିଆଁ ଆରମ୍ଭ ହୋଇ ଗଲାଣି।ଅସନ୍ତୁଷ୍ଟ ନେତା ଭାଳେଣି କରି ଏ ଦଳ ସେ ଦଳକୁ ଡିଆଁ ଡିଇଁ କରୁଥିବା ଦେଖିବାକୁ ମିଳୁଛି।ଆଗକୁ ନିର୍ବାଚନ ବିଗୁଲ ବଜାଇ ପାଖକୁ ଆସୁଛି।ନେତାଙ୍କ ହାର୍ଟବିଟ୍ ବଢ଼ିବାରେ ଲାଗିଛି।ଜିତିଲେ ତୁମର।ନ ଜିତିଲେ କିଏ କାହାର। ତେବେ ଦେଖାଯାଉ ନିର୍ବାଚନ କାହାପାଇଁ ପୁଷ ମାସ ତ ଆଉ କାହା ପାଇଁ ସର୍ବନାଶ।