08-Dec-2023

ବଲାଙ୍ଗୀର/ଟିଟିଲାଗଡ(ଚିତ୍ରସେନ ବେହେରା)-ଆୟକର ଫାଙ୍କି ଅଭିଯୋଗରେ ବୁଧବାର ଦିନଠାରୁ ବଳଦେବ ସାହୁ ଓ କମ୍ପାନୀଙ୍କ ମଦବ୍ୟବସାୟିକ ପ୍ରତିଷ୍ଠାନ ଥିବା ବଲାଙ୍ଗୀର, ବୌଦ୍ଧ, ସମ୍ବଲପୁର, ରାଉରକେଲା ଓ ଭୁବନେଶ୍ୱରଠାରେ ଚଢାଉ ଚାଲିଛି । ଏପର୍ଯ୍ୟନ୍ତ ୨୫୦ କୋଟି ଟଙ୍କାରୁ ଅଧିକ ଟଙ୍କାର ନଗତ କେସ ଜବତ ହୋଇସାରିଛି । ବଲାଙ୍ଗୀର ମଦଭାଟି ଭିତରେ ଥିବା ରାଜେଶ ସାହୁ ଘରେ ୯ଟି ଟ୍ରଙ୍କରୁ ପ୍ରାୟ ୨୦୦କୋଟି ଟଙ୍କାରୁ ଅଧିକ ନୋଟ ଜବତ ହୋଇଛି । ସେହି ଟଙ୍କାକୁ ବୁଧବାର ରାତିରେ ବଲାଙ୍ଗୀର ଷ୍ଟେଟବ୍ୟାଙ୍କକୁ ନିଆଯାଇ ଗଣତି ଚାଲିଛି । ପ୍ରଥମେ ଦୁଇଦିନ ପର୍ଯ୍ୟନ୍ତ ୬ଟି ଟଙ୍କାଗଣତି ମେସିନରେ ନୋଟଗୁଡିକ ଗଣତି ଚାଲିଥିଲା । ୬ଟି ବସ୍ତାର ନୋଟ ଗଣତି ହୋଇଛି । ଆଜି ଆଉ ଏକ ବଡ ନୋଟଗଣତି ମେସିନ ଅଣାଯାଇ ଟଙ୍କା ଗଣତି ଚାଲିଛି । ନୋଟର ପରିମାଣ ଯାହା ଅଛି ଏହା ପ୍ରାୟ ୮ଦିନ ପର୍ଯ୍ୟନ୍ତ ଗଣତି ଚାଲିବ ଓ ଏହା ଆନୁମାନିକ ୨୫୦ କୋଟି ଟଙ୍କାରୁ ଅଧିକ ହେବ ବୋଲି ଆକଳନ କରାଯାଉଛି । ଆଜି ମଧ୍ୟ ବଲାଙ୍ଗୀର ସୁଦପଡା ଭାଟି, ଟିଟିଲାଗଡର ଦୀପକ ସାହୁ ଓ ସଂଜୟ ସାହୁକ ଘରେ ଖାନ ତଲାସୀ ଚାଲିଛି । ତେବେ ଆୟକର ବିଭାଗ ପକ୍ଷରୁ ଗଣମାଧ୍ୟମକୁ କିଛି ମଧ୍ୟ ସୂଚନା ଦିଆଯାଉନାହିଁ । ତେଣୁ ସବିଶେଷ ତଥ୍ୟ ହାସଲ ହେଉନାହିଁ । ସେପଟେ ବଲାଙ୍ଗୀର ଭଳି ଏକ ଗରିବ ଜିଲ୍ଲାରେ ମଦଭାଟିରୁ ୨୦୦କୋଟି ଜବତ ହେବାପରେ ଏଠାରେ ଅନେକ ଆଲୋଚନା ହେଉଛି । କିଛି ଲୋକ ଏହାକୁ ଟକସଫାଙ୍କି ନୋଟ କହୁଥିବା ବେଳେ ଆଉକିଛି ଲୋକ ଏହାକୁ ଏକ ନିଦ୍ଦିଷ୍ଟ ରାଜନୈତିକ ଦଳର କଳାଟଙ୍କା ବୋଲି କହୁଛନ୍ତି । ଆସନ୍ତା ୨୦୨୪ ନିର୍ବାଚନରେ ଖର୍ଚ୍ଚକରିବାକୁ କୁଆଡେ ରାଜନୈତିକ ଦଳର କଳାଟଙ୍କା ଏଠାରେ ସୁରକ୍ଷିତ ଭାବରେ ରଖାଯାଇଥିଲା । କେନ୍ଦ୍ରର ବିଜେପି ସରକାରଙ୍କ କାନରେ ଏହା ପଡିବାରୁ ଶେଷରେ ଆୟକର ବିଭାଗକୁ ପଠାଇ ଚଢାଉ କରି ଧରିଛନ୍ତି । ନୋଟଗୁଡିକର ସ୍ଥିତି ଦେଖିଲେ ଏହା ନିହାତି ଭାବରେ ବାହାରୁ ଆସିଥିବା ନୋଟଭଳି ଜଣାପଡୁଛି । ବ୍ୟାଙ୍କର ଟ୍ୟାଗଥାଇ ଆଲମିରାରେ ଭର୍ତ୍ତି କରି ରଖାଯାଇଥିଲା । ସୁଦପଡାରେ ପ୍ରଅୟ ୯ଟି ଟ୍ରଙ୍କରେ ନୋଟ ଭର୍ତ୍ତି ହୋଇ ରହିଥିଲା । ବଳଦେବ ସାହୁ ଏଣ୍ଡ କମ୍ପାନୀର ମାଲି ଝାରଖଣ୍ଡର ଜଣେ ପ୍ରଭାବଶାଳୀ ସାଂସଦ ରହିଛନ୍ତି । ସେ କୁଆଡେ ଆସନ୍ତା ୨୦୨୪ ନିର୍ବଚନରେ ପ୍ରଭାବିତ କରିବାକୁ କୁଆଡେ ବିଭିନ୍ନ ସ୍ଥାନରେ କଳାଟଙ୍କା ଜମାକରି ରଖିଥିଲେ ଓ ତାହା ଆଇଟି ସ୍କାନରକୁ ଆସିଥିଲା । କେବଳ ସେତିକି ନୁହେଁ ପ୍ରତ୍ୟେକ ନିର୍ବାଚନ ସମୟରେ ମଦ ସହ ଅର୍ଥ ବଣ୍ଟନ ଭାଟିର କର୍ମଚାରୀମାନେ ମଧ୍ୟ କରିଥାନ୍ତି । ତାଙ୍କ ଜରିଆରେ ହିଁ ଗ୍ରାମାଞ୍ଚଳରେ ଲୋକଙ୍କୁ ଟଙ୍କା ବଣ୍ଟନ କରାଯାଇଥାଏ । ଦେଶୀ ମଦଭାଟି ଚଳାଉଥିବା ଏହି କମ୍ପାନୀ ପାଖରେ ଶହଶହ ସଂଖ୍ୟାରେ ଶ୍ରମିକ ନିୟୋଜିତ ରହିଛନ୍ତି । ସେହିପରି ଓଡିଶାର ପଶ୍ଚିମାଞ୍ଚଳରେ ଲୋକଙ୍କଠାରୁ କମଦରରେ ମହୁଲ କିଣି ସେଥିରୁ ମଦ ପ୍ରସ୍ତୁତ କରି ବର୍ଷକୁ ଅନ୍ୟୁନ ୧୦୦କୋଟି ଟଙ୍କାର ଟିକସ ଫାଙ୍କୁଥିବା ଅଭିଯୋଗ ମଧ୍ୟ ହୁଏ ।