30-Oct-2023

ସୁବର୍ଣ୍ଣପୁର (ମନୋରଞ୍ଜନ ତ୍ରିପାଠୀ )::ସିନେ ଅଭିନେତା ପ୍ରଦ୍ୟୁମ୍ନ କୁମାର ସାହୁଙ୍କ ପିତା ଶମ୍ଭୁକୃଷ୍ଣ ସାହୁ ଆଜି ସକାଳ ୯ ଘଣ୍ଟା ୨୫ ମି. ରେ ସୁବର୍ଣ୍ଣପୁର ଜିଲ୍ଲା ମୁଖ୍ୟ ଡାକ୍ତରଖାନାରେ ଦେହ ତ୍ୟଗ କରିଛନ୍ତି। ସେ ସୁବର୍ଣ୍ଣପୁର ଜିଲ୍ଲା ମୁଖ୍ୟ ଚିକିତ୍ସା ଓ ଜନସ୍ଵାସ୍ଥ୍ୟ ଅଧିକାରୀଙ୍କ କାର୍ଯ୍ୟାଳୟରେ ୨୦୦୬ ମସିହା ମାର୍ଚ୍ଚ ମାସ ଯାଏଁ ମୁଖ୍ୟ କିରାଣୀ ଭାବେ କର୍ତ୍ତବ୍ୟ ପରାୟଣ ହୋଇ କାର୍ଯ୍ୟ ତୁଲାଇ ଅବସର ନେବା ପରେ ସ୍ଥାନୀୟ ରାମଜୀନଗର ସ୍ଥିତ ନିଜ ବାସଭବନ ପୁରନ୍ଦର ନିବାସରେ ରହି ଆସୁଥିଲେ। ନିଜର ସମୟାନୁବର୍ତ୍ତିତା ଏବଂ  କର୍ତ୍ତବ୍ୟପରାୟଣତା ପାଇଁ ସେ ଖୁବ ଶ୍ରଦ୍ଧାଭାଜନ ଥିଲେ। କିଛିଦିନ ହେବ ସେ ମସ୍ତିକାଘାତରେ ପୀଡିତ ହୋଇ ଚିକିତ୍ସିତ ହେଉଥିଲେ। ଆଜି ସ୍ଵାସ୍ଥ୍ୟବସ୍ଥା ଗୁରୁତର ହେବାରୁ ତାଙ୍କୁ ସଦର ଡାକ୍ତରଖାନାରେ ଭର୍ତ୍ତି କରାଯାଇଥିଲା। ସେଠି ଚିକିତ୍ସାଧୀନ ଅବସ୍ଥାରେ ତାଙ୍କ ପରଲୋକ ଘଟିଥିଲା। ପୁରୀ ସ୍ଵର୍ଗଦ୍ଵାରରେ ଅନ୍ତିମ ସଂସ୍କାର ପାଇଁ ପରିବାରଜନ ତାଙ୍କ ମରଶରୀରକୁ ନେଇ ଅପରାହ୍ନରେ ପୁରୀ ଗମନ କରିଛନ୍ତି। ତାଙ୍କ ଜ୍ଵୋଷ୍ଠ ପୁତ୍ର ସୋନପୁର ଓକିଲ ସଂଘ ସଂପାଦକ ଏଡଭୋକେଟ ପ୍ରଫୁଲ୍ଲ କୁମାର ସାହୁ ସେଠି ପିତାଙ୍କୁ ମୁଖାଗ୍ନି ଦେବେ। ମୃତ୍ୟୁ ଶଯ୍ୟା ନିକଟରେ ପତ୍ନୀ ଲୀଳାବତୀ ସାହୁ, ତିନି ପୁତ୍ର ପ୍ରଫୁଲ୍ଲ ସାହୁ, ପ୍ରଦ୍ୟୁମ୍ନ ସାହୁ, ପ୍ରବୀଣ ସାହୁ, ପୁତ୍ରବଧୁ ପଙ୍କଜିନୀ ସାହୁ, ସବିତା ସାହୁ, ଦେବଜାନୀ ସାହୁ, ଝିଅ ପ୍ରମିଳା ସାହୁ, ପ୍ରତିମା ସାହୁ, ଜ୍ଵାଇଁ ବିରଞ୍ଚି ସାହୁ, ସୌମ୍ୟ ରଂଜନ ସାମନ୍ତରାୟ, ନାତି ଅଂଶୁମାନ ସାହୁ, ଜଗଦୀଶ ସାମନ୍ତରାୟ, ଆଦିତ୍ୟ ଅଦ୍ଵିକ ସାହୁ, ନାତୁଣି ଶୈଳେନ୍ଦ୍ରୀ ସାମନ୍ତରାୟଙ୍କ ସମେତ ସମ୍ପର୍କୀୟ ଏବଂ ବନ୍ଧୁବର୍ଗ ଉପସ୍ଥିତ ଥିଲେ।