22-Oct-2023

ବଲାଙ୍ଗୀର(ପ୍ରେରଣା ଖବର ): ପ୍ରାୟ ତିନି ବର୍ଷ ଅସୁସ୍ଥ ରହିବା ପରେ ଅବସରପ୍ରାପ୍ତ ଶିକ୍ଷକ ଗୋପାଳ ଚନ୍ଦ୍ର ପଟ୍ଟନାୟକ(୮୨)ଙ୍କର ମୃତ୍ୟୁ ହୋଇଛି। ମାସାଧିକ କାଳ ରାୟପୁର ଏମ୍ସରେ ଚିକିତ୍ସିତ ହୋଇ ଗତ ଗୁରୁବାର ରାତିରେ ସେ ବଲାଙ୍ଗୀର ଫେରିଥିଲେ। ତେବେ ରବିବାର ଭୋର ତାଙ୍କ ସ୍ବାସ୍ଥ୍ୟାବସ୍ଥାରେ ଅବନତି ହେବାରୁ ତାଙ୍କୁ ସ୍ଥାନୀୟ ଭୀମଭୋଇ ମେଡିକାଲ କଲେଜ ହସପିଟାଲକୁ ନିଆଯାଇଥିଲା। ତେବେ ଅଳ୍ପ ସମୟ ପରେ ସେଠାରେ ସେ ଆଖି ବୁଜିଥିଲେ। ପୂର୍ବାହ୍ନରେ ବିଭୂତିପଡା ଶ୍ମଶାନରେ ତାଙ୍କ ଶେଷକୃତ୍ଯ ସମ୍ପନ୍ନ ହୋଇଥିଲା। ବଡପୁଅ ଟ୍ୟାକ୍ସ ଏଡଭୋକେଟ ଶଶାଙ୍କର ମୁଖାଗ୍ନି ଦେଇଥିଲେ। ମୃତ୍ୟୁଶଯ୍ୟା ନିକଟରେ ପତ୍ନୀ ତଥା ଅବସରପ୍ରାପ୍ତ ଶିକ୍ଷୟିତ୍ରୀ ନିର୍ମଳାବାଳା ମହାନ୍ତି, ଦୁଇକନ୍ୟା ମଧୁଲିସା ଓ ମଧୁମିତା, ସାନ ପୁଅ ଭିମସାର ଆସିଷ୍ଟାଣ୍ଟ ପ୍ରଫେସର ଡା. ଦୀପଙ୍କର, ଜାମାତା 'ସମ୍ବାଦ'ର ବାର୍ତ୍ତା ସମ୍ପାଦକ ଅରବିନ୍ଦ ଦାସ, ଦୁଇବୋହୂ ଶୁଭଶ୍ରୀ ସାହୁ ଓ ମୋନିକା ମହାପାତ୍ର, ଚାରି ନାତିନାତୁଣି, ଆତ୍ମୀୟସ୍ଵଜନ, ବନ୍ଧୁପରିଜନ ଉପସ୍ଥିତ ଥିଲେ।

ତଦାନୀନ୍ତନ ପାଟଣା ଗଡଜାତ ରାଜ୍ୟର ହେଡକ୍ଲର୍କ ତଥା ସ୍ଥାନୀୟ କ୍ଲବରୋଡ-ରାଧାରାଣୀପଡା ନିବାସୀ ସ୍ବର୍ଗତ ନରସିଂହ ଚରଣ ପଟ୍ଟନାୟକଙ୍କ ଏକମାତ୍ର ସନ୍ତାନ ଗୋପାଳ ଅବିଭକ୍ତ ବଲାଙ୍ଗୀର କଳାହାଣ୍ଡି ଜିଲ୍ଲାର ସଇଁତଳା, କଣ୍ଟାବାଞ୍ଜି, ତରଭା, ତୁରେକଲା, ଜୁନାଗଡ, ଖରିଆରର ବିଭିନ୍ନ ମ.ଇ. ଓ ହାଇସ୍କୁଲରେ ଶିକ୍ଷକତା କରି ୨୦୦୧ ମସିହାରେ ବଲାଙ୍ଗୀର ପୃଥ୍ବୀରାଜ ହାଇସ୍କୁଲରୁ ଅବସର ଗ୍ରହଣ କରିଥିଲେ। ଭୂଗୋଳରେ ଜଣେ ଆଦର୍ଶ ଶିକ୍ଷକ ଭାବେ ଛାତ୍ରଛାତ୍ରୀଙ୍କର ପ୍ରିୟ ସ୍ବର୍ଗତ ପଟ୍ଟନାୟକ ମଧ୍ୟ ଜଣେ ଅତ୍ୟନ୍ତ ଭଦ୍ର ଓ ମିଷ୍ଟଭାଷୀ ବ୍ୟକ୍ତି ଭାବେ ପରିଚିତ। ସ୍ବର୍ଗତ ପଟ୍ଟନାୟକ ଜଣେ ମଞ୍ଚନାଟକ ସ୍ଥପତି ଓ ଚିତ୍ରଶିଳ୍ପୀ ମଧ୍ୟ ଥିଲେ। ତାଙ୍କ ମୃତ୍ୟୁରେ ବହୁ ବ୍ୟକ୍ତି ଶୋକ ପ୍ରକାଶ କରିଛନ୍ତି।