23-Sep-2023

ବଲାଙ୍ଗୀର(ପ୍ରେରଣା ଖବର)-ବଲାଙ୍ଗୀର “ଗ” ମୌଜାରେ ୧୯୪୪ ମସିହାରୁ ଥିବା ରାଜେନ୍ଦ୍ର ମହାବିଦ୍ୟାଳୟର ଜମିକୁ ରାଜସ୍ୱ ବିଭାଗ ସୁରକ୍ଷିତ ରଖିପାରିଲାନି । ସେତେବେଳେ ପାଟଣା ମହାରାଜା ରାଜେନ୍ଦ୍ର ନାରାୟଣ ସିଂଦେଓ ରାଜେନ୍ଦ୍ର କଲେଜ ଉଦ୍ଦେଶ୍ୟରେ ଦେଇଥିବା ୨୪୮ ଏକର ଜମିରୁ ଏବେ ରହିଛି ମାତ୍ର ୬୦ଏକର । ସେହିପରି ରାଜେନ୍ଦ୍ର ମହାବିଦ୍ୟାଳୟ ସମ୍ମୁଖରେ ରହିଥିବା ଗାନ୍ଧୀ ଷ୍ଟାଡିୟମକୁ ଦିଆଯାଇଥିବା ୧୦ଏକର ଜମିରୁ ରହିଛି ମାତ୍ର ୮ ଏକର ଜମି । ଗାନ୍ଧୀ ଷ୍ଟାଡିୟମରେ ଦିଆଯାଇଥିବା ବାଡର ଚାରିକଡେ କୁଆଡେ ପ୍ରାୟ ୨୦ଫୁଟର ଜମି ଛଡାଯାଇଥିଲା ପାର୍କିଂ ପାଇଁ । କିନ୍ତୁ କାଳକ୍ରମେ ଉକ୍ତ ଜମି ସବୁ ଜବରଦଖଲକାରୀଙ୍କ କବଜାକୁ ଚାଲିଯାଇଛି । ରାଜେନ୍ଦ୍ର କଲେଜ ପାଇଁ ଉଦ୍ଦିଷ୍ଟ ପ୍ରାୟ ୧୮୦ ଏକର ଜମିକୁ ରାଜସ୍ୱବିଭାଗ କର୍ମଚାରୀ, ରାଜନେତା ଓ ଜମିବ୍ୟବସାୟୀ ଚଞ୍ଚକତା କରି କରାଇ ନେଇଛନ୍ତି । ଏପରିକି କାଗଜପତ୍ର ଜାଲିଆତି କରି ରାଜସ୍ୱ ବିଭାଗର ଜ୍ଞାତସାରରେ କିଣାବିକା ମଧ୍ୟ ହୋଇଛି । ଏବେ ଜିଲ୍ଲାପାଳଙ୍କ ନିର୍ଦ୍ଦେଶରେ ରାଜେନ୍ଦ୍ର ବିଶ୍ୱବିଦ୍ୟାଳୟ ସମ୍ମୁଖରେ ତଥା ଗାନ୍ଧୀ ଷ୍ଟାଡିୟମର ପୂର୍ବଦିଗରେ ରହିଥିବା ଅଧ ଏକର ଜମିକୁ ବଲାଙ୍ଗୀର ରାଜସ୍ୱ ବିଭାଗର ଏକ ଟିମ ମାପଚୁପ କରିଛନ୍ତି ।

ଏହି ଜମିରେ ପ୍ରତ୍ୟୁଷ ଦାସ ଓ ଅନ୍ୟ ଦୁଇଜଣ ମିଶି ଷ୍ଟଲ ନିର୍ମାଣ କରି ଭଡା ଲଗାଇଛନ୍ତି ବୋଲି ଅଭିଯୋଗ ହୋଇଛି । ପ୍ରାୟ ୧୩ଟି ଷ୍ଟଲ ନିର୍ମାଣ ହୋଇ ଭଡାରେ ଲାଗିଛି । ବଲାଙ୍ଗୀର ତହସିଲଦାର ଡ.ପୁଷ୍ପାଞ୍ଜଳି ପଣ୍ଡା କହିଛନ୍ତି ଯେ,ବଲାଙ୍ଗୀର “ଗ” ମୌଜାର ୯୦୮ନମ୍ବର ପ୍ଲଟର ଅଧ ଏକର ଜମିକୁ ଜବରଦଖଲ କରାଯାଇ ଅବୈଧ ନିର୍ମାଣ କରାଯାଇଛି । ଏହାକୁ ଚିହ୍ନଟ କରିବାକୁ ଜିଲ୍ଲାପାଳ ନିର୍ଦ୍ଦେଶ କଲାପରେ ଏକ ଟିମ୍ ଆସି ମାପଚୁପ କରିଛନ୍ତି । ଷ୍ଟଲ ସହିତ ପଛପଟେ ମଧ୍ୟ ୧୧୨ଫୁଟ ଭିତରକୁ ସରକାରୀ ଜମି ରହିଛି । ତାହାକୁ ଚିହ୍ନଟ କରି ଛକି ମରାଯାଇଛି । ଆଗାମୀ ଦିନରେ ଏହାକୁ ଜବରଦଖଲ ମୁକ୍ତ କରିବାକୁ ପଦକ୍ଷେପ ନିଆଯିବ । କିନ୍ତୁ ସେପଟେ ପ୍ରତ୍ୟୁଷ ଦାସ କହିଛନ୍ତି ଯେ,ଯେଉଁ ଜମି ଉପରେ ଏହା ନିର୍ମାଣ ହୋଇଛି ତାହା ସେମାନେ କିଣିଛନ୍ତି ଓ ତାହାର ରୟତି ପଟ୍ଟା ମଧ୍ୟ ରହିଛି । ତେବେ ଶୁଣାଯାଇଛି ଯେ, ଗତ ୫ବର୍ଷ ପୂର୍ବରୁ ଜିଲ୍ଲା କ୍ରୀଡାସଂସଦ ପକ୍ଷରୁ ଗାନ୍ଧୀ ଷ୍ଟାଡିୟମର ଜମିର କାଗଜପତ୍ର କଲାବେଳେ ଗାନ୍ଧୀ ଷ୍ଟାଡିୟମର ବାଡ ଚାରିକଡେ ୨୦ଫୁଟ ସରକାରୀ ଜମି ରହିଛି । କିନ୍ତୁ ତାହା ଜବରଦଖଲରେ ରହିଛି । ସେତେବେଳେ ନା କ୍ରୀଡାସଂସଦ ନା ଜିଲ୍ଲା ପ୍ରଶାସନ ସେନେଇ ପଦକ୍ଷେପ ନେଇଥିଲେ । ଏବେ ରାଜ୍ୟରେ ଚାଲିଥିବା ରାଜନୈତିକ ଗତିବିଧି ବଢିବା ବେଳେ ପ୍ରଶାସନ ଚାପରେ ଷ୍ଟଣ୍ଟ ସୋ କରୁଛି । ଜବରଦଖଲ ମୁକ୍ତ ନାମରେ ନିଜର ପାରିବା ପଣିଆଁ ଦେଖାଉଛି । ଗାନ୍ଧୀ ଷ୍ଟାଡିୟମର ଚାରିକଡ ବଦଳରେ କେବଳ ଏକ ନିଦ୍ଦିଷ୍ଟ ପରିବାରକୁ ଟାର୍ଗେଟ କରି ତହସିଲଦାର ମାପଚୁପ କରାଉଥିବା ଅଭିଯୋଗ ହେଉଛି । ରାଜେନ୍ଦ୍ର ବିଶ୍ୱବିଦ୍ୟାଳୟର ପ୍ରାୟ ୧୮୦ ଏକର ଜମି ଜବରଦଖଲରେ ରହିଛି । ସେଥିରେ ଖୋଦ ରାଜସ୍ୱ ବିଭାଗର ଅଧିକାରୀ, କର୍ମଚାରୀ ଓ ରାଜନେତା ସମ୍ପୃକ୍ତି ଥିବା କାରଣରୁ ପ୍ରଶାସନ ତା ଉପରେ ହାତ ମାରୁନାହାଁନ୍ତି ବୋଲି ଅଭିଯୋଗ ହେଉଛି । ଏବେ ରାଜସ୍ୱ ବିଭାଗର ଷ୍ଟଣ୍ଟ ସୋକୁ ନେଇ ବଲାଙ୍ଗୀର ସହରରେ ଚର୍ଚ୍ଚାର ବିଷୟ ହୋଇଛି । ଏହି ଜମକୁ ଯଦି ଜବରଦଖଲ ମୁକ୍ତ କରିବେ ତାହେଲେ ରାଜେନ୍ଦ୍ର ବିଶ୍ୱବିଦ୍ୟାଳୟ ପାଇଁ ସଂରକ୍ଷିତ ଜମିକୁ ଜିଲ୍ଲାପାଳ ଜବରଦଖଲ ମୁକ୍ତ କରାଇ ପାରିବେ ତ ବୋଲି ଜନସାଧାରଣରେ ପ୍ରଶ୍ନ ହେଉଛି ।