16-Apr-2023

ସୁବର୍ଣ୍ଣପୁର(ମନୋରଞ୍ଜନ ତ୍ରିପାଠୀ ): -ଜିଲ୍ଲା ସଦର ମହକୁମାରେ ଥିବା ନ୍ୟୁ ଅପ୍ରଚ୍ୟୁନିଟି କଂସଲଟେନ୍ସି ପ୍ରାଇଭେଟ ଲିମିଟେଡ଼ ଫାଇନାନ୍ସ କମ୍ପାନୀରେ ପ୍ରାୟ ୩୪ଜଣ ଗ୍ରାହକ ଠକେଇର ଶିକାର ହୋଇଛନ୍ତି।ଏହି ଫାଇନାନ୍ସ କମ୍ପାନୀର ପୂର୍ବତନ ବ୍ରାଞ୍ଚ ମେନେଜର ବିଭୁ ରଞ୍ଜନ ଦେହୁରୀ ପ୍ରାୟ ସାଢ଼େ ୧୨ ଲକ୍ଷ ଟଙ୍କା ଗ୍ରାହକଙ୍କ ଋଣ ଟଙ୍କା ଆତ୍ମସାତ କରିଥିବା ଅଭିଯୋଗରେ ସଦର ଟାଉନ ଥାନା ପୋଲିସ ଗିରଫ କରିଛି।ଏହି କମ୍ପାନୀର ଏରିଆ ମେନେଜର ବିପିନ କୁମାର ସାହୁ ଏହି ଠକେଇ ସମ୍ପର୍କରେ ଗତ ମାର୍ଚ୍ଚ ୩ ତାରିଖରେ ସଦର ଥାନାରେ ଲିଖିତ ଅଭିଯୋଗ କରିଥିଲେ ।ବିପିନଙ୍କ ଅଭିଯୋଗକୁ ଆଧାର କରି ପୋଲିସ ତଦନ୍ତରୁ ପୂର୍ବତନ ବ୍ରାଞ୍ଚ ମେନେଜର ବିଭୂ ରଞ୍ଜନ ଋଣୀ ଗ୍ରାହକଙ୍କ ଟଙ୍କା ବାଟମାରଣା କରିଥିବା ପ୍ରମାଣ ପାଇଥିଲା।ତେବେ ପୋଲିସ ବିଭିନ୍ନ ଯାଗାରେ ଚଢ଼ାଉ କରି ଜିଲ୍ଲାର ଅଇଁଲାଛାଟ ଅଂଚଳରୁ ବିଭୁ ରଞ୍ଜନକୁ ଗିରଫ କରିବାରେ ସଫଳ ହୋଇଛି।ଆଜି ସଦର ପୋଲିସ ଅଭିଯୁକ୍ତ ବିଭୁ ରଂଜନଙ୍କୁ କୋର୍ଟ ଚାଲାଣ କରାଯିବ ବୋଲି ଜିଲ୍ଲା ଆରକ୍ଷୀ ଅଧିକ୍ଷକ ଅମରେଶ ପଣ୍ଡା ଆୟୋଜିତ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି।ତେବେ ଅନେକ ଫାଇନାନ୍ସ କମ୍ପାନୀର ଶାଖା ଜିଲ୍ଲାର ସଦର ମହକୁମା ସମେତ ବିଭିନ୍ନ ଅଂଚଳରେ ଖୋଲିଛି।ନିରୀହ ଲୋକଙ୍କ ପାଖରୁ ଆଧାର ପରିଚୟ ପତ୍ର, ଭୋଟର ପରିଚୟ ପତ୍ର , ଜମିବାଡ଼ି ସମ୍ପର୍କିତ କାଗଜପତ୍ର ତଥା ଫଟୋ ସହିତ ଆବଶ୍ୟକ ପ୍ରମାଣ ପତ୍ର ସଂଗ୍ରହ କରି ଋଣ ପ୍ରଦାନ କରୁଛନ୍ତି।ତେବେ ଅନେକ ଗ୍ରାହକ ଋଣ କାଗଜାତ ପଢି ପାରୁ ନ ଥିବାର ସୁଯୋଗ ନେଇ ଫାଇନାନ୍ସ କମ୍ପାନୀ ଗୁଡିକର କର୍ମଚାରୀ ମାନେ ଗ୍ରାହକ ମାନଙ୍କୁ ଠକିବାରେ ସକ୍ଷମ ହେଉଛନ୍ତି।ବିଭିନ୍ନ ସମୟରେ ଋଣୀ ଗ୍ରାହକ ମାନଙ୍କୁ ଅଳ୍ପ କିଛି ଋଣ ଟଙ୍କା ପ୍ରଦାନ କରି ବାକି ଋଣ ଟଙ୍କା ଠକି ନେଉଛନ୍ତି ତ କେବେ କେବେ ଆଦୌ ଟଙ୍କା ଦେଉ ନାହାନ୍ତି । ଅଥଚ ଗ୍ରାହକଙ୍କ ନାଁରେ ଋଣ ଟଙ୍କା ଗଡୁଥିବା ଦେଖିବାକୁ ମିଳୁଛି।ପୂର୍ବରୁ ଅନେକ ଫାଇନାନ୍ସ କମ୍ପାନୀ ଲୋକଙ୍କ କୋଟି କୋଟି ଟଙ୍କା ଜମାରାଶି ଠକି ନେଇଥିବା ଦୃଷ୍ଟାନ୍ତ ରହିଛି।ତେବେ ଜନସାଧାରଣ ଫାଇନାନ୍ସ କମ୍ପାନୀର କାର୍ଯ୍ୟକଳାପ ଉପରେ ସଚେତନ ହେବା ପାଇଁ ଜିଲ୍ଲା ପୋଲିସ ଅନୁରୋଧ କରିଛି।