23-Jan-2023

ବଲାଙ୍ଗୀର(ପ୍ରେରଣା ଖବର): ସ୍ଥାନୀୟ A3 World ଜଳିଆ ଠାରେ ସରକାରୀ ବାଳିକା ବିଦ୍ୟାଳୟ ୧୯୮୭ ବେଚ୍ ର ଏକ ବନ୍ଧୁମିଳନ ବର୍ଣ୍ଣାଢ଼୍ୟ ପରିବେଶ ମଧ୍ୟରେ ଅନୁଷ୍ଠିତ ହୋଇଯାଇଛି । ପ୍ରାୟ ୬୦ ଜଣ ବନ୍ଧୁଙ୍କ ସମାବେଶରେ ସଭିଏ ନିଜ ପରିବାର ସହ ଆସି ଯୋଗଦାନ କରି ନିଜ ପୂର୍ବ ସମ୍ପର୍କକୁ ମନେ ପକାଇ ଭାବ ବିହ୍ବଳ ହୋଇଯାଇଥିଲେ । କିଛି ସମୟ ପାଇଁ ନିଜକୁ ପୂର୍ବର ଇତିହାସ ସହ ହଜାଇ ଦେଇଥିଲେ । ବଲାଙ୍ଗୀର ଜିଲ୍ଲା ବ୍ୟତୀତ କଟକ, ଗୋଆ, ଭିଲାଇ, ନୂଆପଡ଼ା, ଖରୀଆର, ଭବାନୀପାଟଣା, ଟିଟିଲାଗଡ଼,ବଡ଼ମାଳ,ଝାରସୁଗୁଡ଼ା, ଢେଙ୍କାନାଳ, ଭୁବନେଶ୍ୱର, ସୋନପୁର,ବରଗଡ଼ ତଥା

ବଲାଙ୍ଗୀର ଜିଲ୍ଲାର ଆଖପାଖ ଅଞ୍ଚଳରୁ ଅନେକ ବନ୍ଧୁ ବାନ୍ଧବୀ ସପରିବାର ଆସି ବନ୍ଧୁମିଳନ ର ଆତ୍ମୀୟତା କୁ ଅନୁଭବ କରିଥିଲେ । ବନ୍ଧୁମିଳନ ଅବସରରେ ଏକ ବଣଭୋଜି ର ମଧ୍ୟ ଆୟୋଜନ ହୋଇଥିଲା । ମହାମାରୀ କରୋନା ର କରାଳ ବିଭୀଷିକା ଯୋଗୁ ଦୁଇ ବର୍ଷ ପରେ ସମସ୍ତ ବାନ୍ଧବୀ ମାନେ  ନୂତନ ଜୀବନ ପାଇ ସମସ୍ତଙ୍କୁ ଭେଟି ବିଭୋର ହୋଇଯାଇଥିଲେ । କିଛି ସମୟ ପାଇଁ ସମସ୍ତଙ୍କ ନୟନ ଲୋତକ ଭରା ହୋଇଯାଇଥିଲା ଏହାପରେ ସେଠାରେ ମ୍ୟୁଜିକଲ ଚେୟାର ପ୍ରତିଯୋଗିତା ହୋଇଥିଲା । ଖେଳକୁଦ ରେ ସମୟ ଅତିବାହିତ ହୋଇଥିଲା ।ପରେ ସଭିଏ ଏକାଠି ବସି ବଣଭୋଜି ର ମଜା ନେଇଥିଲେ । ବ୍ୟସ୍ତମୟ କର୍ମମୟ ଜୀବନରେ ସାଙ୍ଗ ମାନେ ସାଙ୍ଗ ମାନଙ୍କୁ ମନେ ପକାଇ ସୁଦୂର ରାଜ୍ୟ ବାହାରୁ ତଥା ରାଜ୍ୟର ଅନେକ ଜିଲ୍ଲାରୁ ଆସି ତାଙ୍କ ବହୁମୂଲ୍ୟ ସମୟ ଦେଇଥିବାରୁ ଦମୟନ୍ତୀ ଶତପଥୀ,ଅଞ୍ଜଳି ସାହୁ ଏବଂ ତିଳୋତ୍ତମା ପାଣିଗ୍ରାହୀ ସମସ୍ତଙ୍କୁ ଧନ୍ୟବାଦ ଜଣାଇଛନ୍ତି ।