03-Nov-2022

ସମ୍ବଲପୁର,( ସଂଜୀବ ପାଣିଗ୍ରାହୀ)
 ସମ୍ବଲପୁରରେ ହାଇକୋର୍ଟର ସ୍ଥାୟୀ ବେଞ୍ଚ ସ୍ଥାପନ ଦାବିରେ ସମ୍ବଲପୁର ଜିଲ୍ଲା ଓକିଲ ସଂଘ ପୁଣି ଆନ୍ଦୋଳନ ତୀବ୍ର କରିଛି I ବୁଧବାର ସମ୍ବଲପୁରରେ ଅଫିସ୍-ଅଦାଲତ ଅଚଳ ହୋଇଯାଇଥିଲା I ସମ୍ବଲପୁରରେ ହାଇକୋର୍ଟର ସ୍ଥାୟୀ ବେଞ୍ଚ ପ୍ରତିଷ୍ଠା ଦାବିକୁ ନେଇ ପଶ୍ଚିମ ଓଡ଼ିଶା ଓକିଲ ସଂଘ ସମୂହର କେନ୍ଦ୍ରୀୟ କ୍ରିୟାନୁଷ୍ଠାନ କମିଟି ପକ୍ଷରୁ ରାଜ୍ୟ ସରକାରଙ୍କ ଅନେକ ଥର ଦାବିପତ୍ର ଦେଇଛି I ଏହି ପ୍ରସଂଗରେ ମୁଖ୍ୟମନ୍ତ୍ରୀଙ୍କ ସହିତ ସାକ୍ଷାତ ପାଇଁ ସମୟ ବି ମଗାଯାଇଥିଲା I ମାତ୍ର, ମୁଖ୍ୟମନ୍ତ୍ରୀ ସମୟ ନଦେବାରୁ କେନ୍ଦ୍ରୀୟ କ୍ରିୟାନୁଷ୍ଠାନ କମିଟି ଗତ ୨୮ ସେପ୍ତେମ୍ବେର୍ ଦିନ ରାଜଧାନୀ ଭୁ‌ବନେଶ୍ବରକୁ ଯାଇ ଆନ୍ଦୋଳନ କରିଥିଲା I ତେବେ, ଓକିଲଙ୍କ ଆନ୍ଦୋଳନ ସମୟରେ କେନ୍ଦ୍ରୀୟ କ୍ରିୟାନୁଷ୍ଠାନ କମିଟିର ଏକ ପ୍ରତିନିଧି ଦଳକୁ ଡାକି ରାଜ୍ୟ ସରକାରଙ୍କ ୩ ଜଣ ମନ୍ତ୍ରୀ ଓ ଉଚ୍ଚସ୍ତରୀୟ ଅଧିକାରୀମାନେ ଲମ୍ବା ସମୟ ପର୍ଯ୍ୟନ୍ତ ଆଲୋଚନା କରିଥିଲେ I ମଧୁର ପ୍ରତିଶ୍ରୁତି ବି ଦେଇଥିଲେ I ଏହା ସ‌ତ୍ତ୍ବେ ସରକାର ସମ୍ବଲପୁରରେ ହାଇକୋର୍ଟ ସ୍ଥାୟୀ ବେଞ୍ଚ ପ୍ରତିଷ୍ଠା ପାଇଁ ଓଡ଼ିଶା ହାଇକୋର୍ଟଙ୍କ ମତାମତ ନେଇ କେନ୍ଦ୍ର ସରକାରଙ୍କ ପାଖକୁ ଏକ ପୂର୍ଣ୍ଣାଂଗ ପ୍ରସ୍ତାବ ପଠାଇ ନାହାନ୍ତି I ତେଣୁ, ଦାବି ହାସଲ ନହେବା ପର୍ଯ୍ୟନ୍ତ  ସମ୍ବଲପୁର ଜିଲ୍ଲା ଓକିଲ ସଂଘ ପ୍ରତ୍ୟେକ ମାସ ବୁଧବାର ଦିନ ବିଚାର ବିଭାଗୀୟ ଅଦାଲତ ଓ ରାଜ୍ୟ ସରକାରଙ୍କ କାର୍ଯ୍ୟାଳୟ ଅଚଳ କରିବାକୁ ନିଷ୍ପତ୍ତି ନେଇଛି I ଏହି କ୍ରମରେ ଆଜି ଓକିଲ ସଂଘର ସଭ୍ୟମାନେ ସବୁ ସରକାରୀ କାର୍ଯ୍ୟାଳୟ ସମ୍ମୁଖରେ ପିକେଟିଂ କରି ବନ୍ଦ କରିଦେଇଥିଲେ I ଆର୍‌ଡିସି, ଜିଲ୍ଲାପାଳ, ଉପଜିଲ୍ଲାପାଳ, ତହସିଲ ଠାରୁ ଆରମ୍ଭ କରି ସବୁ ସରକାରୀ କାର୍ଯ୍ୟାଳୟ ସମ୍ମୁଖରେ ତାଲା ଝୁଲୁଥିବା ଦେଖିବାକୁ ମିଳିଥିଲା I ତେବେ, ଏଥିରୁ ବ୍ୟାଙ୍କ, ଏଲ୍‌ଆଇସି, ମହାନଗର ନିଗମ, ସ୍କୁଲ ଓ କଲେଜ, ଫ୍ୟୁଜ୍ କଲ୍‌ ସେଣ୍ଟର ଆଦି ବାଦ୍ ଦିଆଯାଇଥିଲା I ଜିଲ୍ଲା ଓକିଲ ସଂଘର ସଭାପତି ସୁରେଶ୍ବର ମିଶ୍ର, ସଂପାଦକ ସରୋଜ ସାହୁ ପ୍ରମୁଖଙ୍କ ନେତୃତ୍ବରେ ଆଇନଜୀବୀମାନେ ପିକେଟିଂ କରି ବନ୍ଦ କରିଥିଲେ I ଉଲ୍ଲେଖଯୋଗ୍ୟ ଯେ, ପାଇଲଟ୍ ପ୍ରୋଜେକ୍ଟ ଭାବେ ସମ୍ବଲପୁରରେ ଆରମ୍ଭ ‌ହୋଇଥିବା ବିଦ୍ୟୁତ୍ ପ୍ରିପେଡ୍‌ ମିଟର ଓ ପାଣି ମିଟର ସଂଯୋଗକୁ ବି ଜିଲ୍ଲା ଓକିଲ ସଂଘ ବିରୋଧ କରୁଛି I ପାଇଲଟ୍‌ ପ୍ରୋଜେକ୍ଟ ନାମରେ ସମ୍ବଲପୁରର ନିରୀହ ଜନସାଧାରଣଙ୍କୁ ଦିଆଯାଉଥିବା ନିର୍ଯାତନା ଓ ମନମୁଖି ପ୍ରଶାସନିକ କାର୍ଯ୍ୟର ବି ପ୍ରତିବାଦ କରାଯିବା ସହିତ ଜନସ‌ଚେତନତା ସୃଷ୍ଟି କରାଯାଉଛି I ସମ୍ବଲପୁର ତଥା ବିଶେଷକରି ପଶ୍ଚିମ ଓଡ଼ିଶା ପ୍ରତି ରାଜ୍ୟ ସରକାର ପାତର ଅନ୍ତର କରୁଥିବାରୁ ସ୍ବତନ୍ତ୍ର ରାଜ୍ୟ ଦାବି ଆନ୍ଦୋଳନକୁ ପୂର୍ଣ୍ଣ ସମର୍ଥନ କରାଯିବାକୁ କେତେକ ଜାଗାରେ ବ୍ୟାନର ବି ଲଗାଯାଇଥିବା ଦେଖିବାକୁ ମିଳିଥିଲା I ଆନ୍ଦୋଳନକୁ ପୂର୍ବ ଭଳି ଜନ ସମର୍ଥନ ବି ମିଳିଥିଲା I ତ‌େବେ, ଆନ୍ଦୋଳନ ସମୟରେ ଏସ୍‌ଡିଏ କାର୍ଯ୍ୟାଳୟ ଖୋଲା ରହିଥିବା ବେଳେ କେତେକ ବ୍ୟକ୍ତି ସେଠାରେ ପହଂଚି ଚୌକି, ଟେବୁଲ ଆଦି ଫିଙ୍ଗା ଫୋଫଡ଼ା କରିଥିବା ଜଣାପଡ଼ିଛି I