20-Oct-2022

ବଲାଙ୍ଗୀର(ପ୍ରେରଣା ଖବର)ରାଜ୍ୟସରକାରଙ୍କ ଗଣଶିକ୍ଷା ବିଭାଗ ଅଧିନରେ ଥିବା ସେକେଣ୍ଡାରୀ ସ୍କୁଲ(ପୂର୍ବରୁ କଲେଜ)ଗୁଡିକରେ ଯୁକ୍ତଦୁଇ ପାଠ ପାଇଁ ନାମଲେଖା ଚାଲିଛି । ସେହିକ୍ରମରେ ବଲାଙ୍ଗୀର ରାଜେନ୍ଦ୍ର ସେକେଣ୍ଡାରୀ ସ୍କୁଲରେ ମଧ୍ୟ ନାମଲେଖା ଚାଲିଛି । ଦୁଇଟି ପର୍ଯ୍ୟାୟରେ ନାମଲେଖା ସରିଥିବା ବେଳେ ଗତକାଲି ସ୍ପଟ ଆଡମିସନ ପାଇଁ ତାଲିକା ପ୍ରକାଶ ପାଇଛି । ତେବେ ଏହି ତାଲିକାରେ ହେରାଫେରି କରାଯାଇଥିବା ଅଭିଯୋଗ ହୋଇଛି । ୭୮.୬୬% ନମ୍ବର ରଖିଥିବା ଜଣେ ଛାତ୍ରଙ୍କର ନାମ ଆସିନଥିବା ବେଳେ ୭୬% ତଥା ୭୫% ନମ୍ବର ରଖିଥିବା ଛାତ୍ରଛାତ୍ରୀଙ୍କ ନାମ ତାଲିକାରେ ପ୍ରକାଶ ପାଇଛି । ଏପରିକି ଏହି ରାଜେନ୍ଦ୍ର ସେକେଣ୍ଡାରୀ ସ୍କୁଲରେ ଦ୍ୱିତୀୟ ପର୍ଯ୍ୟାୟରେ ନାମ ଲେଖାଇ ସାରିଥିବା କିଛି ଛାତ୍ରଙ୍କର ନାମ ପୁଣି ଷ୍ପଟ ଆଡମିସନ ତାଲିକାରେ ରହିଥିବା ଦେଖାଯାଇଛି । ଯାହାକୁ ନେଇ ଛାତ୍ରଛାତ୍ରୀଙ୍କ ମଧ୍ୟରେ ସନ୍ଦେହ ପ୍ରକାଶ ପାଇଛି । ତାଲିକାରେ ଚଞ୍ଚକତା କରାଯାଇଥିବା ଦେଓଗାଁ ବ୍ଲକର ଉପରଝର ପଞ୍ଚାୟତର କୁହିମୁଣ୍ଡା ଗ୍ରାମର ଶମ୍ଭୁଭୂଷଣ ସାହୁ ଅଭିଯୋଗ କରିଛନ୍ତି । ତାଙ୍କ ପୁଅର ମାଟ୍ରୀକରେ ୭୮.୬୬% ନମ୍ବର ଥିବା ବେଳେ ତାଙ୍କ ନାମ ସ୍ପଟ ଆଡମିସନରେ ବାହାରିନାହିଁ । ତାଙ୍କ ପୁଅ ଲିପୁନ ସାହୁ ଅନଲାଇନରେ ଆବେଦନ ବେଳେ ରାଜେନ୍ଦ୍ର ସେକେଣ୍ଡାରୀ ସ୍କୁଲକୁ ୧ନମ୍ବର ପ୍ରାଥମିକତା ଦେଇଥିଲେ । କିନ୍ତୁ ଟିଟିଲାଗଡ ଡିଏଭି କଲେଜରେ ତାଙ୍କର ପ୍ରଥମ ପର୍ଯ୍ୟାୟରେ ନାମଲେଖା ତାଲିକା ପ୍ରକାଶ ପାଇଥିଲା । ତେଣୁ ସେଠାରେ ସେ ଆଡମିସନ କରିଥିଲେ । ଆଡମିସନ ବେଳେ ମଧ୍ୟ ରାଜେନ୍ଦ୍ର ସେକେଣ୍ଡାରୀ ସ୍କୁଲର ଅପସନ ଆସିଲେ ସେ ସେଠାରେ ଆଡମିସନ କରିବେ ବୋଲି ଲେଖିଥିଲେ । କିନ୍ତୁ ସ୍ପଟ ଆଡମିସନ ବେଳେ ତାଙ୍କୁ ବାଦଦେଇ ତାଙ୍କ ଠାରୁ କମ ମାର୍କ ପାଇଥିବା ଛାତ୍ରଛାତ୍ରୀଙ୍କୁ ଚୟନ କରି ତାଲିକା ପ୍ରସ୍ତୁତ କରାଯାଇଥିବା ଅଭିଯୋଗ କରି ଏହାର ତଦନ୍ତ ଦାବି କରିଛନ୍ତି । ତେବେ ଏହି ଅଭିଯୋଗ ଉପରେ ରାଜେନ୍ଦ୍ର ସେକେଣ୍ଡାରୀ ସ୍କୁଲର ନାମଲେଖା ଦାୟୀତ୍ୱରେ ଥିବା ପ୍ରଦୀପ ସାହୁ ନାମକ  ଅଧ୍ୟାପକଙ୍କୁ ଫୋନରେ ପଚାରିବାରୁ ସେ ଏହା ଅଟୋସିଲେକ୍ସନ ହେଉଛି ବୋଲି ସେ କହିବା ସହିତ ଦ୍ୱିତୀୟ ପର୍ଯ୍ୟାୟ ଆଡମିସନ ବେଳେ ଅପସନ କ୍ଲିକ କରିନଥିବା କାରଣରୁ ସ୍ପଟ ଆଡମିସନ ବେଳେ ତାଙ୍କ ନାମ ଆସିନାହିଁ ବୋଲି କହିଥିଲେ । ତେବେ ରାଜେନ୍ଦ୍ର ସେକେଣ୍ଡାରୀ ସ୍କୁଲରେ ଆଡମିସନ କରିଥିବା ଅନ୍ୟଛାତ୍ରଙ୍କର ନାମ ପୁଣି କିଭଳି ତାଲିକା ପ୍ରକାଶ କରାଗଲା ବୋଲି ଶମ୍ଭୁ ଅଭିଯୋଗ କରିଛନ୍ତି । ଏହାର ଏକ ଉଚ୍ଚସ୍ତରୀୟ ତଦନ୍ତ କରାଯିବାକୁ ଶ୍ରୀ ସାହୁ ଦାବି କରିଛନ୍ତି ।