25-Nov-2020

ବଲାଙ୍ଗିର,(ସନ୍ତୋଷ କୁମାର ଠାକୁର) - ବଲାଙ୍ଗୀର ସାମ୍ବାଦିକ ଭବନ ଠାରେ ବିଶିଷ୍ଟ ସାରସ୍ୱତ ସାଧକ ତଥା ଶିକ୍ଷାବିତ୍ ପ୍ରଫେସର ନାରାୟଣ ପୃଷେଠ୍‌ଙ୍କ ନବମ ଶ୍ରାଦ୍ଧ ସମାରୋହ ସ୍ମୃତି କମିଟି ତରଫରୁ ବୁଧବାର ଅନୁଷ୍ଠିତ ହୋଇଥିଲା । ରାଜେନ୍ଦ୍ର ବିଶ୍ୱବିଦ୍ୟାଳୟ ପିଜି କାଉନ୍‌ସିଲ ଚେୟାରମେନ୍ ପ୍ରଫେସର ରବିଶଙ୍କର ପାଣ୍ଡିଆଙ୍କ ଅଧ୍ୟକ୍ଷତାରେ ଅନୁଷ୍ଠିତ ଶ୍ରାଦ୍ଧ ସମାରୋହରେ ମୁଖ୍ୟଅତିଥି ଭାବେ ଜିଲ୍ଲା ସଂସ୍କୃତି ଅଧିକାରୀ ବିଜୟ କୁମାର ଶତପଥି, ସମ୍ମାନିତ ଅତିଥି ଭାବେ ବରିଷ୍ଠ କଳାକାର ତଥା ସାମ୍ବାଦିକ ସତ୍ୟନାରାୟଣ ବେହେରା, ଚିତ୍ରଶିଳ୍ପୀ ଓ ସ୍ଥପତି ଅନ୍ତର୍ଯ୍ୟାମୀ ମେହେର ଓ ଇଣ୍ଡିଆନ୍ ଇଷ୍ଟିଚ୍ୟୁଟ୍ ଅଫ୍ ପବ୍ଳିକ୍ ଆଡମିନିଷ୍ଟ୍ରେସନ୍ (ଆଇଆଇପିଏ)ର ଆସୋସିଏଟ୍ ପ୍ରଫେସର ତଥା ସ୍ୱର୍ଗତ ପୃଷେଠ୍‌ଙ୍କ ସୁପୁତ୍ର ଡ. ସୁଜିତ କୁମାର ପୃଷେଠ୍ ଯୋଗଦାନ କରିଥିଲେ । ସ୍ମୃତି କମିଟି ଆବାହକ ସନ୍ଦୀପ କୁମାର କୁଅଁର ସଭା ପରିଚାଳନା କରିଥିଲେ । ଅତିଥିମାନେ ସ୍ୱର୍ଗତ ପୃଷେଠ୍‌ଙ୍କ ରଚିତ ଗଳ୍ପର ସଙ୍କଳନ ‘ହଳଦୀ ବସନ୍ତ’କୁ ଲୋକାର୍ପଣ କରିଥିଲେ । ୧୯୭୧ ମସିହାରେ ସାହିତ୍ୟ ପତ୍ରିକା ଝଙ୍କାର ଏବଂ ୧୯୮୫ ମସିହାରେ ଓଡିଶା ସାହିତ୍ୟ ଏକାଡେମୀ ପକ୍ଷରୁ ମହାପାତ୍ର ନୀଳମଣି ସାହୁଙ୍କ ଦ୍ୱାରା ସଙ୍କଳିତ ଶ୍ରେଷ୍ଠ ଓଡିଆ ଗଳ୍ପ ସଙ୍କଳନରେ ସ୍ଥାନିତ ଭୂତର ଛାଇ ଗଳ୍ପ ସହ ସମୁଦାୟ ୧୯ଟି ଗଳ୍ପ ଏହି ସଙ୍କଳନରେ ରହିଛି । ସ୍ୱୟଂସିଦ୍ଧା ଫାଉଣ୍ଡେସନ୍ ପକ୍ଷରୁ ଏହି ସଙ୍କଳନ ପ୍ରକାଶ ପାଇଛି । ସ୍ୱର୍ଗତ ପୃଷେଠ୍ ସାରସ୍ୱତ ସାଧନା ସହ ସାମାଜିକ ସଶକ୍ତିକରଣରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ ବୋଲି ମୁଖ୍ୟଅତିଥି ଜିଲ୍ଲା ସଂସ୍କୃତି ଅଧିକାରୀ ଶତପଥି କହିଥିଲେ । ସମ୍ମାନିତ ଅତିଥି ବେହେରା ୭୦ ଓ ୮୦ ଦଶକରେ ଅବିଭକ୍ତ ବଲାଙ୍ଗୀର ଓ କଳାହାଣ୍ଡି ଜିଲାର ମରୁଡି, ଅନାହାର ଓ ଦାରିଦ୍ର‌୍ୟ ଉଜାଗର କରି ଜାତୀୟ ସ୍ତରରେ ଦୃଷ୍ଟି ଆକର୍ଷଣ କରିଥିଲେ ବୋଲି କହିଥିଲେ । ସଭାପତୀୟ ଅଭିଭାଷଣରେ ପ୍ରଫେସର ପାଣ୍ଡିଆ ଉତ୍ତରପିଢ଼ିଙ୍କ ଭିତରେ ପ୍ରେରଣା ଭରିବାରେ ସ୍ୱର୍ଗତ ପୃଷେଠ୍ ଅଗ୍ରଗଣ୍ୟ ବୁଦ୍ଧିଜୀବୀ ଥିଲେ ବୋଲି କହିଥିଲେ । ଡ. ସୁଜିତ ପୃଷେଠ୍ ଗଳ୍ପ ସଙ୍କଳନ ଉପରେ ସୂଚନା ଦେଇଥିଲେ । ଏହି ଅବସରରେ ଅତିଥିମାନେ ଖ୍ୟାତିସମ୍ପନ୍ନ ସ୍ଥପତି ଅନ୍ତର୍ଯ୍ୟାମୀ ମେହେର ଓ ତାଙ୍କ ପୁତ୍ର ଯୁବଚିତ୍ରଶିଳ୍ପୀ ଅଭିଳାଷ ମେହେରଙ୍କୁ ସମ୍ବର୍ଦ୍ଧିତ କରିଥିଲେ । ଅନ୍ୟମାନଙ୍କ ମଧ୍ୟରେ ପୂର୍ଣ୍ଣଚନ୍ଦ୍ର ପଣ୍ଡା, ରାଜେଶ ଝାଙ୍କର, ତ୍ରିଲୋଚନ ନନ୍ଦ ଓ କୁନା ବାଗ ସ୍ୱର୍ଗତ ପୃଷେଠ୍‌ଙ୍କ ସ୍ମୃତିଚାରଣ କରିଥିଲେ । ଶେଷରେ ବୀରେନ୍ଦ୍ର କୁମାର ଝାଙ୍କର ଧନ୍ୟବାଦ ଅର୍ପଣ କରିଥିଲେ । କୋଭିଡ ନିୟମାନୁସାରେ ସଭା ଅନୁଷ୍ଠିତ ହୋଇଥିଲା ।