16-Jul-2022

ବରଗଡ଼(ନିରଞ୍ଜନ ତ୍ରିପାଠୀ): ଆଜି ବିକାଶ ଲ’ ସ୍କୁଲ୍‌ରେ ବିଶ୍ୱ ଯୁବ ଦକ୍ଷତା ଦିବସ ପାଳିତ ହୋଇଯାଇଛି । ଏହି ଅବସରରେ ବିକାଶ ଲ’ ସ୍କୁଲ, ବିକାଶ ଡିଗ୍ରୀ କଲେଜ, ବିକାଶ ସ୍କୁଲ୍ ଅଫ୍ ବିଜ୍‌ନେସ୍ ମ୍ୟାନେଜ୍‌ମେଣ୍ଟ, ବିକାଶ ଇନ୍‌ଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜି ଓ ବିକାଶ ନର୍ସିଂ କଲେଜ ର ମିଳିତ ଆନୁକୂଲ୍ୟରେ ଏକ ଯୁବ କୌଶଳ କର୍ମଶାଳା ଆୟୋଜିତ ହୋଇଥିଲା । ଲ’ ସ୍କୁଲ୍‌ର ଅଧ୍ୟକ୍ଷ ପ୍ରଫେସର୍ ଡ.ବିକ୍ରମ କୁମାର ଦାସ ପ୍ରାରମ୍ଭିକ ଭାଷଣ ପ୍ରଦାନ କରିଥିଲେ । ଏହି ଅବସରରେ ମୁଖ୍ୟ ଅତିଥି ଭାବରେ ସମ୍ମାନୀୟ ବରଗଡ଼ ଡିଷ୍ଟ୍ରିକ୍ଟ୍ ଏବଂ ସେସନ୍ ଜଜ୍ ଶ୍ରୀ ଅସୀମ କୁମାର ଦଳବେହେରା ଯୋଗଦେଇ ନିଜର ବକ୍ତବ୍ୟରେ ଯୁବବର୍ଗ ନିଜର ବ୍ୟକ୍ତିଗତ ସମସ୍ୟାରେ ବିଚଳିତ ନ ହୋଇ ଛାତ୍ରଜୀବନରୁ ହିଁ ଦେଶସେବାରେ ନିଜକୁ ନିୟୋଜିତ କରିବା ପାଇଁ ଉଦ୍‌ବୋଧନ ଦେଇଥିଲେ । ବକ୍ତା ତଥା ରିସୋର୍ସ୍ ପର୍ସନ୍ ଭାବରେ ବ୍ରିଗେଡିୟର୍ ଶ୍ରୀ ବିଦ୍ୟୁତ୍ କୁମାର ଦାଶ (ଚେୟାର୍ ପର୍ସନ୍‌, ଡିଷ୍ଟ୍ରିକ୍ଟ୍ ଚାଇଲ୍ଡ୍ ୱେଲ୍‌ଫେୟାର୍ କମିଟୀ, ବରଗଡ଼) ଯୋଗଦେଇ ଛାତ୍ରଛାତ୍ରୀମାନେ ବିଭିନ୍ନ କ୍ଷେତ୍ରରେ କିପରି ନେତୃତ୍ୱ ନେବାର ଅଧିକାରୀ ହୋଇପାରିବେ, “ୟୁଥ୍ ସ୍କିଲ୍ ଡେଭେଲପ୍‌ମେଣ୍ଟ୍‌” ବିଷୟବସ୍ତୁ ମାଧ୍ୟମରେ ନିଜର ଉପସ୍ଥାପନା ରଖିଥିଲେ । ଅନ୍ୟତମ ବକ୍ତା ତଥା ରିସୋର୍ସ୍ ପର୍ସନ୍ ଭାବରେ ଡ.ରମାକାନ୍ତ ଶତପଥୀ (ପ୍ରେସିଡେଣ୍ଟ୍‌, ଡିଷ୍ଟ୍ରିକ୍ଟ୍ କଞ୍ଜ୍ୟୁମର୍ ରିଡ୍ରେସାଲ୍ କମିଶନ୍‌, ସମ୍ବଲପୁର) “ସ୍କିଲ୍ ଡେଭେଲପ୍‌ମେଣ୍ଟ୍ ଅନ୍ ରାଇଟ୍ ଟୁ ଇନ୍‌ଫର୍ମେସନ୍‌” ଉପରେ ଗୁରୁତ୍ୱାରୋପ କରି ଭାରତ ସରକାରଙ୍କ ରାଇଟ୍ ଟୁ ଇନ୍‌ଫର୍ମେସନ୍ ମାଧ୍ୟମରେ ସାଧାରଣ ଜନତା କିପରି ଜଣେ ସରକାରୀ ଏଡ୍‌ମିନିଷ୍ଟ୍ରେନ୍ ରେ କାର୍ଯ୍ୟରତ ଅଧିକାରୀଙ୍କ ପରି କ୍ଷମତାସମ୍ପନ୍ନ, ସେ ବିଷୟରେ ଛାତ୍ରଛାତ୍ରୀମାନଙ୍କୁ ଅବଗତ କରାଇଥିଲେ । ବିକାଶ ଗ୍ରୁପ୍‌ର ଏକ୍‌ଜିକ୍ୟୁଟିଭ୍ ଡାଇରେକ୍ଟର ଶ୍ରୀ ଡି.ନାଗେଶ୍ୱର ରାଓ ନିଜର ଅଭିଭାଷଣରେ ଯୁବବର୍ଗରେ ଦକ୍ଷତା ଓ କୌଶଳର ବିକାଶ ଉପରେ ଗୁରୁତ୍ୱାରୋପ କରିଥିଲେ । ବିକାଶ ଗ୍ରୁପ୍ ର ଡାଇରେକ୍ଟର ଡ.ସମରେନ୍ଦ୍ର ନାଥ ପଣ୍ଡା ମୁଖ୍ୟ ଅତିଥିଙ୍କୁ ଧନ୍ୟବାଦ ଅର୍ପଣ କରିବା ସହିତ ଯୁବମାନଙ୍କ ବର୍ଗରେ ଥିବା ଲୁକ୍କାୟିତ ଦକ୍ଷତାର ସନ୍ଧାନ ସମ୍ବନ୍ଧରେ ଆଲୋକପାତ କରିଥିଲେ । କାର୍ଯ୍ୟକ୍ରମରେ ଲ’ ସ୍କୁଲର ଅଧ୍ୟାପକ ଶ୍ରୀ ଅଭିନନ୍ଦନ ଖୁଣ୍ଟିଆ ଅତିଥିମାନଙ୍କର ପରିଚୟ ପ୍ରଦାନ କରିଥିଲେ ଓ ଅଧ୍ୟାପିକା ନୀରଜା ଅଗ୍ରୱାଲ୍ କାର୍ଯ୍ୟକ୍ରମ ପରିଚାଳନା କରିଥିଲେ । ମୁଖ୍ୟ ଅତିଥିଙ୍କ ସହିତ ସେକ୍ରେଟାରୀ, ଡିଏଲ୍‌ଏସ୍‌ଏ, ବରଗଡ଼ ଶ୍ରୀ ବିଭୁ କଲ୍ୟାଣ ପାଢ଼ୀ ଓ ରେଜିଷ୍ଟ୍ରାର୍‌, ଡିଷ୍ଟ୍ରିକ୍ଟ୍ କୋର୍ଟ୍‌, ବରଗଡ଼, ଶ୍ରୀ ବିଶ୍ୱ ବିସୃତ କର ପ୍ରମୁଖ ଯୋଗଦେଇଥିଲେ । କାର୍ଯ୍ୟକ୍ରମରେ ବିକାଶ ଡିଗ୍ରୀ କଲେଜ, ବିକାଶ ସ୍କୁଲ୍ ଅଫ୍ ବିଜ୍‌ନେସ୍ ମ୍ୟାନେଜ୍‌ମେଣ୍ଟ, ବିକାଶ ଇନ୍‌ଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜି ଓ ବିକାଶ ନର୍ସିଂ କଲେଜର ଅଧ୍ୟକ୍ଷ, ଉପାଧ୍ୟକ୍ଷମାନେ ଉପସ୍ଥିତ ଥିଲେ । କାର୍ଯ୍ୟକ୍ରମରେ ବିକାଶ ଲ’ ସ୍କୁଲ୍‌ର ଅଧ୍ୟାପକ ଶ୍ରୀ ଶିବାନନ୍ଦ ସାହୁ, ଶ୍ରୀ ନୟନଜ୍ୟୋତି ଦାସ, ରୋଜି ମେହେର, ସାରିକା ଦାଶ ଓ ସାଗରିକା ବିଶ୍ୱାଳ ସହଯୋଗ କରିଥିଲେ । ବିକାଶ ଅଣ୍ଡରଗ୍ରାଜୁଏଟ୍ କ୍ୟାମ୍ପସ୍‌ର ସମସ୍ତ ବିଭାଗର ଛାତ୍ରଛାତ୍ରୀ ବହୁସଂଖ୍ୟାରେ ଯୋଗଦେଇ କାର୍ଯ୍ୟକ୍ରମକୁ ସାଫଲ୍ୟମଣ୍ଡିତ କରିଥିଲେ । ଶେଷରେ ଅଧ୍ୟାପକ ଶ୍ରୀ ଜୈମିନୀ କୁମାର ସାହୁ ଧନ୍ୟବାଦ ଅର୍ପଣ କରିଥିଲେ ।