11-Jul-2022

ବିନିକା(ହିମାଂଶୁ ଶେଖର ପୁଟେଲ) ବିଧିବଦ୍ଧ ଭାବେ ଆଦର୍ଶ ବିଦ୍ୟାଳୟ ଉଦ୍ଘାଟନ ହୋଇ ନଥିଲେ ମଧ୍ୟ ବିଭିନ୍ନ ଶିକ୍ଷାନୁଷ୍ଠାନରେ ଅଧ୍ୟୟନ ରତ ଛାତ୍ରଛାତ୍ରୀଙ୍କ ଶିକ୍ଷାଦାନରେ ବାଧା ଉପୁଜିବାରୁ ବାଧ୍ୟ ହୋଇ ନୂତନ କୋଠାଘରେ ଚଳିତ ୨୦୨୨ବର୍ଷ ଏପ୍ରିଲ ପ୍ରଥମ ସପ୍ତାହରୁ ଏଠାରେ ପାଠପଢା ଆରମ୍ଭ ହୋଇଛି ।ବର୍ତମାନ ଏହି ବିଦ୍ୟାଳୟରେ ଷଷ୍ଠ,ସପ୍ତମ ଓ ଅଷ୍ଟମ ଶ୍ରେଣୀର ସର୍ବମୋଟ ୨୩୦ରୁ ଅଧିକ ଛାତ୍ରଛାତ୍ରୀ ପାଠ ପଡ଼ୁଛନ୍ତି ।ନୂତନ ସ୍କୁଲରେ ଶିକ୍ଷାଦାନ ଆରମ୍ଭ ହେବାପରେ ଛାତ୍ରଛାତ୍ରୀ ଙ୍କ ଠୁଁ ଆରମ୍ଭ କରି ଅଭିଭାବକ,ଶିକ୍ଷାପ୍ରେମି,ଅଞ୍ଚବାସୀଙ୍କ ଆଶା ଥିଲା ଏହି କୋଠାଘର ଓ ତାର ଚତୁର୍ପାର୍ଶ୍ଵ ନିର୍ଦ୍ଧାରିତ ସମୟରେ ସମ୍ପୂର୍ଣ୍ଣ ହୋଇ ଶିକ୍ଷା ବିଭାଗକୁ ହସ୍ତାନ୍ତର ହେବ କିନ୍ତୁ ଅତ୍ୟନ୍ତ ପରିତାପର ବିଷୟ ବହୁ କିଛି କାମ ଏବେ ବି ଅସମ୍ପୂର୍ଣ୍ଣ ରହିଥିବାରୁ କେବେ ଏହା ସମ୍ପୂର୍ଣ୍ଣ ହେବ ଏବଂ କେବେ ଉଦ୍ଘାଟନ ହେବ ତାହା ସମୟକୁ ଅପେକ୍ଷା ।ତେବେ ସେ ଯାହା ବି ହେଉ ବର୍ତମାନ ଉକ୍ତ ଶିକ୍ଷାନୁଷ୍ଠାନକୁ ଦୈନିକ ଦିନ ଛାତ୍ରଛାତ୍ରୀ ଅଧ୍ୟୟନ ପାଇଁ ଆସୁଛନ୍ତି। ବିନିକା ସହର ଠାରୁ ପାପକ୍ଷୟକୁ ଯାଇଥିବା ରାସ୍ତାର ୨କିମି ଗଲାପରେ ଅଧୁନା ତାରାପୁର ଗଡରେ ନିର୍ମାଣାଧୀନ ଆଦର୍ଶ ବିଦ୍ୟାଳୟ ସମ୍ଭୁଖ ରାସ୍ତା ବର୍ତମାନ ବର୍ଷା ପାଇଁ କାଦୁଅ ସରସର ହୋଇପଡ଼ିଛି । ନୂଆଁ ମାଟି ଯୋଗୁଁ କେତେକ ସ୍ଥାନ ସ୍ଲିପ ହେଉଥିବାରୁ ସମସ୍ତଙ୍କ ପାଇଁ ବିପଦ ସୃଷ୍ଟି କରିଛି ।ଅନ୍ୟ ପକ୍ଷରେ ଦୂରଦୂରାନ୍ତରୁ ଆସୁଥିବା ଛାତ୍ରଛାତ୍ରୀଙ୍କ ଗାଡ଼ି କାଦୁଅରେ ଅଟକି ରହୁଛି ।ସାଇକଲ ଯୋଗେ ଆସୁଥିବା କେତେକ ଛାତ୍ରଛାତ୍ରୀ କାଦୁଅରେ ଚଳାଇ ନପାରି ବାଧ୍ୟ ହୋଇ ଧୀରେ ଧୀରେ ଚାଲି ଚାଲି ସ୍କୁଲକୁ ଯାଉଥିବା ଦେଖିବାକୁ ମିଳୁଥିବା ବେଳେ ଆଉ କେତେକ ସାମାନ୍ୟ ଅସାବଧାନତା ଯୋଗୁଁ କାଦୁଅରେ ସ୍ଲିପ ହୋଇ ପଡି ଯାଉଛନ୍ତି। ଫଳରେ ଏନେଇ ଅଭିଭାବକ ମହଲରେ ଅସନ୍ତୋଷ ପ୍ରକାଶ ପାଇଛି ।ରାସ୍ତା ସମସ୍ୟା ନେଇ ବିଦ୍ୟାଳୟ କର୍ତୁପକ୍ଷଙ୍କ ସମେତ ବିଦ୍ୟାଳୟ ନିର୍ମାଣ ଦାୟିତ୍ୱରେ ଥିବା ଠିକାସଂସ୍ଥା ଏବଂ ତଦାରକ କରୁଥିବା ପୂର୍ତ୍ତ ବିଭାଗ ଜାଣିଥିଲେ ମଧ୍ୟ ଅଦ୍ୟାବଧି ସମାଧାନ ନକରିବା ଆଶ୍ଚର୍ଯ୍ୟର ବିଷୟ। ବୋଧେ କୌଣସି ଅଘଟଣ ଘଟିଲେ ଯାଇ ପ୍ରଶାସନିକ ସ୍ତରରେ କୁମ୍ଭକର୍ଣ୍ଣ ନିଦ୍ରା ଭାଙ୍ଗିବ କି ବୋଲି ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି ।ଅନ୍ୟ ପକ୍ଷରେ ପୁଣ୍ୟପୀଠ ପାପକ୍ଷୟ ରାସ୍ତାକୁ ସଂଯୋଗ କରୁଥିବା ଏହି ବିଦ୍ୟାଳୟ ରାସ୍ତା ଓ ଉଲ୍ଲେ ଗ୍ରାମ କୁ ଯାଇଥିବା ରାସ୍ତାର ଛକ  (ତ୍ରିକୋଣିଆ ଛକ) ଗୁରୁତ୍ତ୍ୱପୂର୍ଣ ହୋଇଥିବାରୁ ଛାତ୍ରଛାତ୍ରୀଙ୍କ ସୁବିଧା ଦୃଷ୍ଟିରୁ ଏବଂ ଗାଡ଼ି ମଟର ସ୍ପିଡ ନିୟନ୍ତ୍ରଣ ପାଇଁ ଟ୍ରାଫିକ ପୋଷ୍ଟ ବ୍ୟବସ୍ଥା କରିବା ଦିଗରେ ପଦକ୍ଷେପ ନେବା ଜରୁରୀ ହୋଇ ପଡ଼ିଛି ।