30-May-2022

ପାଟଣାଗଡ଼: ଖପ୍ରାଖୋଲ ଦାଦନ ପ୍ରବଣ ଅଞ୍ଚଳରେ ଦାଦନ ରୋକିବା ପାଇଁ ନିଜ ଭିଟା ମାଟିରେ ଦାଦନ ପେଟକୁ ଦାନା ଦେବା ପାଇଁ ସରକାର ମନରେଗା ଯୋଜନାରେ କୋଟି କୋଟି ଟଙ୍କା ଯୋଗାଇ ଦେଉଛନ୍ତି । ନିଜ ଭିଟା ମାଟିରେ ରହି କାମ କରି ବଞ୍ଚିବା ସହିତ ନିଜେ ଆତ୍ମନିର୍ଭରଶୀଳ ହେବା ପାଇଁ ବିଭିନ୍ନ କାମ ଗୁଡିକ ଯୋଗାଇ ଦେବା ଲକ୍ଷ୍ୟରେ ସରକାର ଜମି ଉନ୍ନତିକରଣ, ବହୁମୁଖୀ ପୋଖରୀ, ଗାଈ ଗୁହାଳ, ଛେଳି ଗୁହାଳ ନିର୍ମାଣ କରି ଗରିବ ଶ୍ରମିକ ସ୍ୱାବଲମ୍ବୀ ହେବା ସହିତ ଆର୍ଥିକ ଉନ୍ନତିର ଅଗ୍ରଗତି ନିମନ୍ତେ ଯୋଜନା କରିଛନ୍ତି । କିନ୍ତୁ ବିଭାଗୀୟ ଅଧିକାରୀଙ୍କ ବେପାରୁଆ ମନୋଭାବ ପାଇଁ ହିତାଧିକାରୀ ଏହି ସବୁ ଯୋଜନାରେ କାମକରି ମାସ ମାସ , ବର୍ଷ ବର୍ଷ ପର୍ଯ୍ୟନ୍ତ ମଜୁରୀ ପାଉନାହାନ୍ତି । ସରକାରଙ୍କ ମନରେଗା ଯୋଜନା ଦିଗହରା ହୋଇ ପଡିଛି । ଏପରି ଏକ ଅଭିଯୋଗ ଆସିଛି ବଲାଙ୍ଗୀର ଜିଲ୍ଲା ଖପ୍ରାଖୋଲ ବ୍ଲକ ଖପ୍ରାଖୋଲ ଗ୍ରାମ ପଞ୍ଚାୟତର ହିତାଧିକାରୀଙ୍କ ଠାରୁ । ସୂଚନାଯୋଗ୍ୟ ଖପ୍ରାଖୋଲ ପଞ୍ଚାୟତର ବଡ଼ଗୁର୍ଜିଭଟା, ମହୁରୁଣ୍ଡି, କର୍ଲାକୁଟୁନା, କୁର୍ଲୁମାଲ , ଗୁଣ୍ଡୁରୁପାଲି ଓ ଖପ୍ରାଖୋଲ ଗ୍ରାମର ଲୋକ ମାନେ ମନରେଗା ଯୋଜନାରେ ଜମି ଉନ୍ନତି କାମ କରି ଥିବାବେଳେ ବିଭାଗୀୟ ଜେଇ ଓ ଜି ଆର ଏସ ଙ୍କ ପିସି ଭାଗ ବଣ୍ଟା ଛିଣ୍ଡୁ ନ ଥିବାରୁ ଗରିବ ମୁଜୁରିଆ ପେଟକୁ ଦାନା ଯୋଗାଇବା ଆଶା, ଆଶାରେ ରହିଯାଇଛି ବୋଳି ମହୁରୂଣ୍ଡି ଗ୍ରାମର ଗୁଣମଣି ଭୋଇ ହିତାଧିକାରୀ ଅଭିଯୋଗ କରିଛନ୍ତି । ସେ ଦୀର୍ଘ ଏକ ବର୍ଷ ହେଲା ଜମି ଉନ୍ନତିକରଣ କାମ କରି ପଇସା ପାଇ ନାହାନ୍ତି । ନିଳାମ୍ବର ଭୋଇ, ପରମା ନନ୍ଦ ପଧାନ, ରବୀନ୍ଦ୍ର ଭୋଇ ବର୍ତ୍ତମାନ ପର୍ଯ୍ୟନ୍ତ କାମ କରି ପଇସା ପାଇନାହିଁ । ସେହିପରି ଚିତ ଭୋଇ , ବିପିନ ଭୋଇ ମଧ୍ୟ ଅଧ ଅଧ ପଇସା ପାଇ ବାକି ରହି ଯାଇଥିବାରୁ ହିତାଧିକାରୀ ଧାଇଁ ଧାଇଁ ନୟାନ୍ତ ହେଲେଣି କିନ୍ତୁ କେହି କର୍ଣପାତ କରୁନାହାନ୍ତି । ଖପ୍ରାଖୋଲ ପଞ୍ଚାୟତର ଜେଇ ଦାଇତ୍ଵରେ ରାଜକିଶୋର ନାଏକ ରହିଥିବା ବେଳେ ନୀଳମଣି ଜାଲ ଜି.ଆର.ଏସ ଦାଇତ୍ୱ ରେ ରହିଥିବା ଜଣାପଡିଛି । ହିତାଧିକାରୀ ବିଲ ପାଇଁ ଜେଇ ପାଖକୁ ଗଲେ ଜି ଆର ଏସ ଫାଇଲ ଅପ ଟୁ ଡେଟ କରୁ ନାହାନ୍ତି ବୋଲି କହୁ ଥିବା ବେଳେ ଜି ଆର ଏସ ଧାରା ଛୁଆଁ ଦେଉ ନାହାନ୍ତି । ମନରେଗା ଯୋଜନାରେ ସରଲୀକରଣ ଓ ସୁବିଧା ରେ ଏହି ଯୋଜନାକୁ ଫଳପ୍ରଦ କରିବା ପାଇଁ ଜି ଆର ଏସ ମାନଙ୍କୁ ପଞ୍ଚାୟଚା କାର୍ୟଳୟରେ ସବୁ ଦିନ ଉପସ୍ଥିତ ରହି ଜନସାଧାରଣଙ୍କ କାମ କରିବା ପାଇଁ ସରକାର ନିଯୁକ୍ତି ଦେଇଥିବା ବେଳେ ଖପ୍ରାଖୋଲ ପଂଚାୟତର ଜି ଆର ଏସ ଜାଲ ବାବୁ କୁଆଡେ ଅନ୍ତର୍ଧ୍ୟାନ ହୋଇ ଯାଇ ଥିବା ଅଭିଯୋଗ ହୋଇଛି । ଜେଇ ପାଖକୁ ଗଲେ ଜେଇ ରାଜ କିଶୋର ବାବୁ ଙ୍କ ରାଜାଠାଣି ଗରିବ ଶ୍ରମିକଙ୍କୁ ଅତିଷ୍ଠ କରି ପକାଉଛି । ଶ୍ରମିକଙ୍କ କାମର ନିଜ ପକେଟ ଗରମ ପାଇଁ ଭାଗ ଛିଣ୍ଡୁ ନ ଥିବାରୁ ଫାଇଲ ମାସ ମାସ  ପଡ଼ି ରହିଥିବା ବେଳେ ଠିକାଦାରଙ୍କ ଫାଇଲ ରାତାରାତି ସମାପନ ହୁଏ ବୋଲି ଚର୍ଚ୍ଚା ହେଉଛି । ଅନ୍ୟପଟେ ଏହି ପଂଚାୟତର ପିଇଓ ଆଉ ଜଣେ କରିତକର୍ମା ଅଧିକାରୀ । ନୀଳ ବାବୁ ଓ ପିଇଓ ଙ୍କ ମଧୁଚନ୍ଦ୍ରିକାରେ ମନରେଗା ଯୋଜନାରେ ବିଗତ ବର୍ଷରେ ଅଧ କୋଟି ରୁ ଉର୍ଦ୍ଧ୍ବ ଟଙ୍କା ଆତ୍ମସାତ ହୋଇ ଥିବା ଜନସାଧାରଣ ରେ ଚର୍ଚ୍ଚା । ପିଇଓ ବାହୁବଳେନ୍ଦ୍ର ବାହୁ ବଲ ତ ନୁହଁ ତୀକ୍ଷ୍ମଣ ବୁଦ୍ଧିବଳରେ କାମ ନ କରି ଅଧକୋଟିରୁ ଉର୍ଦ୍ଧ୍ବ ଟଙ୍କା ଚଳୁ ହୋଇ ଥିବାରୁ ଦୀର୍ଘ ଦୁଇ ମାସ ହେବ ନୂତନ ଭାବେ ଯୋଗ ଦେଇଥିବା ପିଇଓ ମନୋଜ ସାହୁଙ୍କୁ ଚାର୍ଜ ଦେଇନାହାନ୍ତି । କାମ ସମ୍ୱନ୍ଧୀୟ ପଚାରିଲେ ମତେ ଚାର୍ଜ ଦେଇ ନଥିବା ରୁ ମୁଁ କିଛି ଜାଣି ନାହିଁ ବୋଲି ପିଇଓ ମନୋଜ ସାହୁ କହିଛନ୍ତି । ପିଇଓ , ଜି.ଆର.ଏସ ଓ ଜେଇ ଉତ୍ତମ ସମ୍ପର୍କ ସ୍ଥାପନ କରି ମାଲେ ମାଲ ହେଉ ଥିବା ବେଳେ ଜନସାଧାରଣ ଘାଂଟି ଚକଟି ହେଉଥିବା ଜଣାଯାଇଛି । ଏନେଇ ବିଡିଓ ରଶ୍ମିରଞ୍ଜନ ରାଉତ ଙ୍କୁ ପଚାରିବାରୁ ହିତାଧିକାରୀଙ୍କ ଅଭିଯୋଗ କ୍ରମେ ତାଗିଦ କରାଯାଇଛି ଓ ଆଗକୁ ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି । ଖପ୍ରାଖୋଲ ପଞ୍ଚାୟତରେ ଦୁର୍ନୀତି ଚରମ ସୀମାରେ ପହଂଚି ଥିବା ବେଳେ ଉଚିତ ତଦନ୍ତ କଲେ ଲୋକଲୋଚନକୁ ଆସିବ ବୋଲି ବୁଦ୍ଧିଜୀବୀ ମହଲରେ ଆଲୋଚନା ହେଉଛି । ଏଥି ପ୍ରତି ଜିଲ୍ଲା ପ୍ରଶାସନ ଦୃଷ୍ଟି ଦେବାକୁ ପଂଚାୟତବାସୀ ଦାବୀ କରିଛନ୍ତି ।