01-Mar-2022

ପଦ୍ମପୁର: ରାଜ୍ୟ ସରକାର ସରକାରୀସ୍ତରରେ ଉଚ୍ଚ ବିଦ୍ୟାଳୟ ମାନଙ୍କ ଭିତ୍ତିଭୂମିର ବିକାଶ ନିମନ୍ତେ ୫-ଟି ରୂପାନ୍ତରଣ କାର୍ଯ୍ୟକ୍ରମ କରିଆସୁଛନ୍ତି । ଏହିକ୍ରମରେ ବରଗଡ଼ ଜିଲ୍ଲା ବିଜେପୁର ବ୍ଲକ ଯୋଖିପାଲି ପଞ୍ଚାୟତ ଉଚ୍ଚ ବିଦ୍ୟାଳୟରେ ମଧ୍ୟ ରୂପାନ୍ତରଣ କାର୍ଯ୍ୟକ୍ରମ ରେ ଆର୍ଥିକ ଅନୁଦାନ ପ୍ରଦାନ କରି ଭିତ୍ତିଭୂମିର ବିକାଶ କରାଯାଇଛି । ଉକ୍ତ ବିଦ୍ୟାଳୟରେ ଛାତ୍ରଛାତ୍ରୀ ମାନଙ୍କ ପାଇଁ ଲକ୍ଷାଧିକ ଟଙ୍କାରେ ବିଜ୍ଞାନାଗାର ମଧ୍ୟ ତିଆରି କରାଯାଇଛି ହେଲେ ଦୁଃଖଦ ବିଷୟ ଏହିକି ଯେ ଛାତ୍ରଛାତ୍ରୀ ମାନେ ତାହାର ଉପଯୋଗ କରିପାରୁନାହାନ୍ତି କାରଣ ଗତ ୧୮ ବର୍ଷ ହେଲା ପଞ୍ଚାୟତ ଉଚ୍ଚ ବିଦ୍ୟାଳୟ ଯୋଖିପାଲିରେ ବିଜ୍ଞାନ ଶିକ୍ଷକ ନାହାନ୍ତି । ଏନେଇ ବର୍ଷ ବର୍ଷ ଧରି ଅଭିଭାବକ ମାନେ ଦାବୀ କରିଆସୁଥିଲେ ସୁଦ୍ଧା ଗଣଶିକ୍ଷା ବିଭାଗ ତରଫରୁ କୌଣସି ପଦକ୍ଷେପ ଗ୍ରହଣ କରାଯାଉନାହିଁ । ଏହା ଏକ ବ୍ଲକ ଗ୍ରାଣ୍ଟ ସ୍କୁଲ ହୋଇଥିବାରୁ ଏଠାରେ ଚୁକ୍ତିଭିତ୍ତିକ ଶିକ୍ଷକ ମଧ୍ୟ ନିଯୁକ୍ତି ହୋଇପାରୁନାହିଁ । ଏନେଇ ଉକ୍ତ ବିଦ୍ୟାଳୟକୁ ପୋଷ୍ୟ ସ୍କୁଲ ଭାବେ ଗ୍ରହଣ କରିଥିବା ଯୁବକ ଦିବସ କୁମାର ସାହୁ ବିଜେପୁର ଗୋଷ୍ଠୀ ଶିକ୍ଷା ଅଧିକାରୀ ଙ୍କୁ ଯୋଗାଯୋଗ କରିବା ପରେ ଉଚ୍ଚ କର୍ତ୍ତୃପକ୍ଷଙ୍କ ସହ ଆଲୋଚନା କରି ପଦକ୍ଷେପ ଗ୍ରହଣ କରାଯାଇପାରିବ ବୋଲି କହିଛନ୍ତି । ଅପରପକ୍ଷରେ ସ୍ଥାନୀୟ ଅଭିଭାବକ ତୁରନ୍ତ ଉକ୍ତ ବିଦ୍ୟାଳୟକୁ ପାଖ କୌଣସି ବିଦ୍ୟାଳୟରୁ ଡେପୁଟେସନ ଜରିଆରେ ଅନ୍ୟୁନ ତିନିଦିନ ଶିକ୍ଷାଦାନ କରିବା ବ୍ୟବସ୍ଥା କରିବାକୁ ଦାବୀ କରିଛନ୍ତି ।